A̱jmi̱i̱n gu̱ʼu̱ bi̱ tsimiñun

ÍNDO̱ rí xa̱bu̱ israelitas nuxuda̱mi̱jna̱ náa xkujndu, ikhú ikhiin nutháán Jeobá mu mambañuun. Ikhaa eriʼña̱a̱ índo̱ rí naxnún xa̱bu̱ ede̱ bi̱ tsimiñun mu mumbañún. Náa Biblia naxná mbiʼñún jueces. Josué ninindxu̱u̱ timbáa juez, ga̱jma̱a̱ eʼwíínʼ jueces bi̱ nikuwa nda̱wa̱á rí ikhaa nixtáa ninindxu̱ún: Otniel, Aod ga̱jma̱a̱ Samgar. Mú a̱jmi̱i̱n xa̱bu̱ bi̱ niruguambáá náa xuajin Israel ninindxu̱ún gu̱ʼu̱ bi̱ nigumbiʼñún Débora ga̱jma̱a̱ Jael.

Débora ni̱ndxu̱u̱ bi̱ naʼtiriyaʼ dí marigá. Jeobá eʼthúu̱n dí wíji̱ ma̱ʼkha̱ nda̱wa̱á, ikhú ikhaa eʼtaruʼun xa̱bu̱ rí Jeobá eʼthí. Ma̱ngaa Débora ni̱ndxu̱u̱ juez. Nagi̱ʼi̱ náa kúbá náa agoo ixi̱ ida ga̱jma̱a̱ ikhí má eguwáʼ xa̱bu̱ mu mambañuun maʼnimbánuu xkujndu ndrígúun.

Ikhú nixtáa Jabín xóo rey náa Canaán. Gíʼdoo mbá 900 carro rí najmún mu muni̱ aguʼ. Ra̱ʼkhá tháán migújkuínʼ xa̱bi̱i̱ rí asndu mbaʼin israelitas naguanu nuñajunʼ ga̱jma̱a̱ numuu Jabín. Xa̱bu̱ bi̱ phú kayá edxu̱u̱ náa xa̱bu̱ bi̱ nuni̱ aguʼ ndrígóo Jabín nagumbiʼyuu Sísara.

Mbóo mbiʼi Débora nandxa̱ʼóo juez Barac, ga̱jma̱a̱ naʼthúu̱n: ‹Jeobá niʼthí: “Ayuʼ xtiin náa kúbá Tabor mbá 10,000 xa̱bekha. Ikhí gáʼkhá ka̱ya̱a̱ náa ikháánʼ Sísara. Ga̱jma̱a̱ ikhúúnʼ gání rí maʼngaaʼ náa ikhaa xúʼko̱ má náa xa̱bi̱i̱ bi̱ nuni̱ aguʼ”.›

Barac eʼthúu̱n Débora: ‹Maʼgá á mu rí na̱dxu̱ʼ ga̱jma̱á ni̱ndxu̱ʼ›. Débora na̱jkha̱, mú naʼthúu̱n Barac: ‹Índo̱ rí gaʼngaʼ mataxmínaʼ, xúyamajkuaʼ ikháánʼ, numuu rí Jeobá majmiuu mbáa a̱ʼgu̱ mu maxíyáa Sísara›. Rígi̱ ni̱ndxu̱u̱ rí narígá.

Barac nakajta̱a̱ náa kúbá Tabor mu maxkamaminaʼ gajmíi̱n soldados ndrígio̱o̱ Sísara. Mbá nacha̱, Jeobá naʼni rí majníʼ iyaʼ, ga̱jma̱a̱ mbaʼin bi̱ sia̱nʼ naguʼwi̱i̱n. Sísara nakajta̱a̱ náa carro ndrígóo ga̱jma̱a̱ nagáyúu.

Nda̱wa̱á Sísara na̱ʼkha̱nú náa guʼwá xtíin ndrígóo Jael. Ikhaa naʼthúu̱n mato̱ʼo̱o̱ náa goʼwóo, ga̱jma̱a̱ naxnúu cháji̱nʼ yaʼdu. Rígi̱ naʼni rí migu nacha̱. Ikhú Jael nda̱yáaʼ mbá ixi̱ rí kúdú náa goʼwóo ga̱jma̱a̱ naʼdumaʼan náa edxu̱u̱. ¡Nda̱wa̱á, índo̱ Barac na̱ʼkha̱, Jael nasngájmiuu Sísara bi̱ nikháñu! Rí niʼthí Débora nimbánuu.

Nda̱wa̱á kayuʼ nuxiyáa rey Jabín; ga̱jma̱a̱ israelitas nandoo nakuwa tsímáá nguátha mbiʼi.