Kuwa a̱jkhu̱u̱n jiáma náa Babilonia

REY Nabucodonosor na̱jkha̱ kagu̱u̱n náa Babilonia israelitas bi̱ niwaʼsngúún májánʼ wéñuʼ. Nda̱wa̱á naraʼwíin jiáma bi̱ itháan mitsiʼñíin ga̱jma̱a̱ bi̱ guáʼdáá wéñuʼ edxu̱ún. Gi̱i̱ natañún a̱jkhu̱u̱n. Mbáa ni̱ndxu̱u̱ Daniel, ga̱jma̱a̱ bi̱ ajtsúun jiáma, babilonios nuxna mbiʼñún Sadrac, Mesac ga̱jma̱a̱ Abednego.

Nabucodonosor nandoo maʼsngúún mu muñajunʼ náa palacio ndrígóo. Ajtsú tsiguʼ nda̱wa̱á rí niwaʼsngúún, mbañíinʼ i̱ndó bi̱ najmañún wéñuʼ mu mumbayíí munimbaníí xkujndu. Nandoo rí jiáma manindxu̱ún migújkuínʼ, ikha jngó nakuʼma rí mixnún ganitsu rí naʼkhu ikhaa ga̱jma̱a̱ vino rí naʼga̱a̱n ikhaa gajmíi̱n bi̱ kuwa náa goʼwóo.

Atayáá dxámá Daniel. Lá natayáá rí xtáa raʼthúu̱n xa̱bu̱ bi̱ nagumbiʼyuu Aspenaz, xa̱bu̱ ndrígóo Nabucodonosor bi̱ phú kayá edxu̱u̱ náa eʼwíínʼ xa̱bu̱ bi̱ nuñajunʼ ráʼ. Naʼthúu̱n rí tsíyoo gíkhu ganitsu miʼtsí dí rígá náa mesa ndrígóo rey. Mú Aspenaz naxmiéjunʼ. Ikhaa naʼthí: ‹Rey niʼthí má rí gíʼmaa muphu̱ ga̱jma̱a̱ rí gíʼmaa muwa̱a̱n. Ga̱jma̱a̱ á mu nakujmaa rí na̱nguá kuwáanʼ májánʼ xóo eʼwíínʼ jiáma, mbáa asndu maxíñu̱u̱n rey›.

Ikha jngó Daniel naʼthúu̱n guardia bi̱ nigíiʼ Aspenaz mañewu̱u̱n ikhaa gajmíi̱n ajtsúun jiáma bi̱ nambáxu̱u̱ gajmíi̱n. Ikhaa eʼthí: ‹Atani̱ rígi̱ ga̱jma̱á nindxuxuʼ mbá 10 mbiʼi. Araxnúxuʼ muphú vegetales ga̱jma̱a̱ iyaʼ muwánxu. Ikhú atayáá xú káʼnii nindxu̱ún eʼwíínʼ jiáma bi̱ naʼphu̱ ganitsu ndrígóo rey, ga̱jma̱a̱ ikhú gátaya̱a̱ tsáa ni̱ndxu̱u̱ bi̱ nakujmaa itháan májánʼ›.

Guardia naʼthí rí xúʼko̱ gáʼni. Ga̱jma̱a̱ índo̱ na̱jkha̱nú naʼni mbá 10 mbiʼi, Daniel gajmíi̱n ajtsúun jiáma bi̱ nambáxu̱u̱ gajmíi̱n nakujmiin itháan májánʼ ki xóo eʼwíínʼ jiáma, ga̱jma̱a̱ tséʼphu̱ ganitsu rí naxná rey ga̱jma̱a̱ nuniñunʼ rí ikhiin muphu̱ vegetales.

Nda̱wa̱á índo̱ naʼni ma ajtsú tsiguʼ nagún kudiin xúgínʼ jiáma náa rey Nabucodonosor. Nda̱wa̱á dí guámbóo raʼthún, rey ndaʼyoo rí Daniel ga̱jma̱a̱ ajtsúun jiáma bi̱ nambáxu̱u̱ gajmíi̱n ni̱ndxu̱ún bi̱ najmañún wéñuʼ. Ikha jngó, naʼni rí ikhiin mumbayíí náa palacio. Ga̱jma̱a̱ índo̱ rí rey na̱ʼkha̱ náa Daniel, Sadrac, Mesac ga̱jma̱a̱ Abednego mu maraxu̱u̱n ga̱jma̱a̱ rí munimbaníí xkujndu ndrígóo, ikhiin najmañún 10 nuthu itháan ki xóo ndxajkun o xa̱bu̱ bi̱ guáʼdáá wéñuʼ edxu̱ún bi̱ kuwa náa rey.