Jesús xtáa ga̱jma̱a̱ a̱ʼgu̱ náa ga̱jnu̱ʼ iyaʼ

JESÚS nawi̱ji̱ mbayáa xu̱ʼ náa mijngii ga̱jnu̱ʼ iyaʼ, dí rígá náa xuajen Samaria. Discípulos ndrígóo nigún náa xuajen mu mutsi ganitsu. A̱ʼgu̱ bi̱ xtáa raʼtamijna ga̱jma̱a̱ Jesús ni̱ʼkha̱ gariyaʼ iyaʼ. Ikhaa naʼthúu̱n: ‹Araxnúʼ iyaʼ maga̱nʼ›.

Rígi̱ naʼniu maguanúu tsiánguá a̱ʼgu̱. Lá natayáá náa numuu ráʼ. Jesús ñajunʼ judío, ga̱jma̱a̱ a̱ʼgu̱ ñajunʼ samaritana. Ga̱jma̱a̱ mbaʼin judíos tsíñún kuñún xa̱bu̱ samaritanos. ¡Asndu tsetun! Mú Jesús nandoo kaʼñúún xúgínʼ enii xa̱bu̱. Ikhaa naʼthúu̱n: ‹Asndu tsétayáá tsáa xtáa randaʼaʼ iyaʼ maga̱a̱n, ikháánʼ matanda̱ʼa̱a̱, ga̱jma̱a̱ ikhaa gáxnáʼ iyaʼ rí ma̱ndoo maraxtaa›.

Aʼgu̱ naʼthí: ‹Tátá, mi̱jnu̱ʼ náa gajnu̱ʼ iyaʼ, ga̱jma̱a̱ ikháánʼ na̱nguá jchá náa mataxíñaʼ. Náa gakánaʼ iyaʼ rígi̱ rí maʼni maraxtaa rá.›

Jesús naʼthí: ‹Á mu nagi̱i̱n iyaʼ rí ga̱jnu̱ʼ gi̱i̱ makandawaʼ mbu̱júu̱. Mu iyaʼ rí gáxna̱ ikhúúnʼ maʼni rí mbáa maxtáa kámuu mbiʼi›.

A̱ʼgu̱ naʼthí: ‹Tátá, ¡araxnúʼ iyaʼ rígi̱! Ikhú ní xákandawuʼ nditháan. Ga̱jma̱a̱ nimbá miʼtsú ní xáʼkhá gi̱i̱ gariyaʼ iyaʼ›.

A̱ʼgu̱ nindxa̱ʼwáminaʼ rí Jesús xtáa raʼthúu̱n ga̱jma̱a̱ numuu iyaʼsui. Mú ikhaa xtáa raʼthúu̱n rí gajkhun ga̱jma̱a̱ numuu Dios ma̱ngaa reino ndrígóo, rí ñajunʼ xóo iyaʼ rí naʼni makuwalu. Ma̱ndoo maʼni rí makuwáanʼ kámuu mbiʼi.

Rí xúgi̱ Jesús naʼthúu̱n a̱ʼgu̱: ‹Ayuʼ gátandxa̱ʼwa̱a̱ ajmbiaʼ ma̱ʼkha̱ ga̱jma̱a̱ ayaʼ gi̱i̱ mbu̱juáʼ›.

A̱ʼgu̱ naʼthí: ‹Ikhúúnʼ na̱nguá gúʼdaa ajmbioʼ›.

Jesús naʼthí: ‹Májánʼ niratá. Mú niraʼdiin má witsun ajmbiaʼ, ga̱jma̱a̱ raʼkháa ajmbiaʼ ñajunʼ xa̱bu̱ bi̱ gajma̱ʼ xúgi̱›.

Asndu tsiánguá niguanúu aʼgu̱, numuu rí xúgíʼ rígi̱ ni̱ndxu̱u̱ gajkhun. Xú káʼnii eʼyoo rígi̱ Jesús rá. Xúʼko̱, numuu rí Jesús ñajunʼ bi̱ nixnáa Dios ga̱jma̱a̱ Dios má niʼni mbaʼyoo xúgíʼ rígi̱. Rí xúgi̱ discípulos ndrígóo Jesús natangi̱i̱n, ga̱jma̱a̱ asndu tsiánguá guanún índo̱ nduyáá rí Jesús xtáa raʼtámijna ga̱jma̱a̱ a̱ʼgú samaritana.

Ndiéjunʼ ejmañulúʼ náa xúgíʼ rígi̱ rá. Rí Jesús májánʼ a̱jkiu̱u̱n gajmíi̱n xúgínʼ enii xa̱bu̱. Xúʼko̱ má gíʼmaa muʼni mangáanʼ; ragíʼmaa mundxaʼwamíjna rí mbáa xa̱bu̱ ñajunʼ ra̱májánʼ numuu rí imba̱ raza ñajunʼ. Jesús nandoo rí xúgínʼ xa̱bu̱ muniʼnúnʼ rí gajkhun rí na̱jkha̱ kaguáanʼ makuwáanʼ kámuu mbiʼi. Ga̱jma̱a̱ ikháanʼ gíʼmaa rí maʼndulúʼ mumbañún xa̱bu̱ majmañún rí gajkhun.