Jesús natanga̱a̱ mekhuíí

NANÚJNGOO mbaʼa mbiʼi rí Jesús nasngájmaminaʼ mbaʼa nutu náa xa̱bi̱i̱. Mbóo mbiʼi ndiyáá mbá 500 discípulos. Lá natayáá ndiéjunʼ niʼthún Jesús índo̱ nisngájmaminaʼ ráʼ. Niʼthún ga̱jma̱a̱ numuu reino ndrígóo Dios. Jeobá nikunguanʼ Jesús náa tsu̱du̱u̱ Ku̱ba̱ʼ mu maʼsngáa ga̱jma̱a̱ numuu Reino. Ga̱jma̱a̱ ikhaa naʼni má xúʼko̱ rígi̱ asndu nda̱wa̱á rí ikhaa nituxi̱i̱ náa majñúnʼ xa̱bu̱ bi̱ nikháñun.

Lá narmáʼáan a̱jkia̱nʼ ndiéjunʼ ñajunʼ reino ndrígóo Dios ráʼ. Ikhaa nindxu̱u̱ mbáa bi̱ phú Xa̱bu̱ Ñajunʼ ndrígóo Dios bi̱ xtáa mekhuíí, ga̱jma̱a̱ Dios ndiyáaʼ Jesús mu manindxu̱u̱ rey. ¡Xóo má ndiʼyáá, Jesús nisngájma dí ra̱ʼkhá tháán májánʼ gáʼni índo̱ ikhaa gánindxu̱u̱ rey numuu rí ikhaa nixniʼtsun mbaʼin wéñuʼ xa̱bu̱ bi̱ naxkidxu̱u̱n, niʼni thanún xa̱bu̱ bi̱ naʼniún nandii, asndu nikuxi̱i̱n xa̱bu̱ bi̱ nikháñun!

Ikha jngó, índo̱ Jesús gáʼtañajunʼ asndu mekhuíí mbá míí tsiguʼ, ndiéjunʼ garigá náa tsu̱du̱u̱ Ku̱ba̱ʼ rá. Xúʼko̱, náa xúgíʼ tsu̱du̱u̱ Ku̱ba̱ʼ maʼni̱i̱ mitsaan wéñuʼ. Ní xárígá itháan guerra, ní xárígá delito, ní xárígá nandii, asndu ní xákhañun xa̱bu̱. Nduʼyáá rí xúʼko̱ kaʼnii gáʼni numuu rí Dios niʼni Ku̱ba̱ʼ mu maʼni̱i̱ mitsaan náa makuwá xa̱bu̱. Ikha jngó niʼni i̱xi̱ ri̱ʼi̱ Edén. Jesús maʼganú maʼni xóo má eyoo Dios.

Ni̱jkha̱nú mbiʼi rí Jesús matanga̱a̱ mekhuíí. Mbá 40 mbiʼi nisngájmaminaʼ náa discípulos ga̱jma̱a̱ ikhiin nduyáá rí ikhaa ndaʼya. Mú nákha xóó tséjkha̱a̱ mekhuíí ikhaa naʼthúún: ‹Aguanalá náa xuajin Jerusalén asndu índo̱ mundrígú espíritu santo›. Rígi̱ nindxu̱u̱ tsiakii ndrígóo Dios, rí nindxu̱u̱ xóo giñáʼ rí naxnúu, rí mambáñún xa̱bi̱i̱ mu muni ñajunʼ Dios. Nda̱wa̱á kayuʼ, Jesús naʼthí: ‹Ikháanʼ mutaraʼa ga̱jma̱a̱ numuʼ asndu náa xuajin dí rígá itháan mitsinguánʼ›.

Nda̱wa̱á rí naʼthí rígi̱ narígá mbá rí tsékujmaa kayuʼ. Ikhaa nagíʼdu̱u̱ na̱jkha̱a̱ mekhuíí xó má tayáá gi̱i̱. Ikhú mbá du̱u̱n narkaʼwii, ga̱jma̱a̱ discípulos nánguá eyáá itháan. Jesús najkha̱a̱ mekhuíí, ga̱jma̱a̱ nagíʼdu̱u̱ naʼtañajúnʼ asndu ikhí xa̱bi̱i̱ bi̱ kuwa náa tsu̱du̱u̱ Ku̱ba̱ʼ.