Kíxnuu 3
Tsáa lá nindxu̱u̱ Jesukristo.
Ná numuu egumbiʼyuu Jesús aʼdá «giʼnii» ndrigóó Dió. (1)
Ná numuu egumbiʼyuu «ajngáá». (1)
Ná numuu ni̱ʼkha̱ Jesús ná numbaa xóo mbáá xa̱biya̱. (2-4)
Ná numuu niʼni milagru. (5)
Káʼnii gaʼni Jesús nda̱wa̱á. (6)
1. Jesús nixtáa mekuíí xóo mbáá ánkli, nákha xó tse̱ʼkha̱ náa numbaa. Ikhaa phú gini kayiiʼ bí niʼnii Dió; ikha jngó nagumbiʼyuu aʼdá «giʼnii» ndrigóó Dió (Colosenses 1:15; Revelación 3:14). Nda̱wa̱a̱ tsáa imbáá xtáa, indió Dió xtáa índo̱ niʼnii aʼdió Jesús. Jeobá nijmiu Jesús nákha xó tse̱ʼkha̱ ná tsu̱du̱u̱ ku̱ba̱ʼ, xó mbáá «bí nañajunʼ mangoo giʼdo wéñuʼ edxu̱u̱» índo̱ niʼni xúgíʼ dí rígá mekuíí jma̱a̱ náa tsu̱du̱u̱ ku̱ba̱ʼ (Proverbios 8:22-31; Colosenses 1:16, 17). Mangoo Dió nijmiu xó mbáá bí phú nixí. Ikha jngó Jesús nagumbiʼyuu «Ajngáá» (Juan 1:1-3; Rí huasjŋgajma Juan 19:13).
2. Dió nikunguanʼ aʼdió náa tsu̱du̱u̱ ku̱ba̱ʼ nikumáanʼ náa awu̱u̱n María. Jesús tagiʼda mbá anu̱u̱ xa̱biya̱; ikha jngó taxtaa ga̱jma̱a̱ aʼkhá jma̱a̱ dí ra̱májánʼ. Dió nikunguanʼ Jesús náa numbaa ga̱jma̱a̱ ajtsú numuu: 1) numuu rí maʼsngulúʼ rí gajkhun ga̱jma̱a̱ numuu Dió (Juan 18:37), 2) ikhaa nixtáa kañiʼ ga̱jma̱a̱ rí jmbu má xúʼkhii̱n mú magi̱ʼ mbó xkrida muʼni mangáanʼ (1 Pedro 2:21), mangoo 3) mú maxnáximinaʼ numuu rí maʼni kawanʼ jma̱a̱ aʼkhá jma̱a̱ rí nakhañulúʼ. Ná numuu eyooʼ rí maxnáximinaʼ xá. (Mateo 20:28, AMM.)
3. Timbáá xa̱biya̱ Adán taʼnimbo̱o̱ rí niʼthi Dió, nikudamináʼ «aʼkhá» xó eʼthi Biblia. Ikha jngó Dió niʼthi rí makañúú (Génesis 3:17-19). Numuu rí nangua nimbánuu ga̱jma̱a̱ xtángoo Dió, ikha jngó nangua ninindxu̱u̱ xa̱bu̱ kaʼwi. Mañú mañú nijkha rakhi̱i̱, nda̱wa̱á nikhañu. Adán niniñúunʼ ga̱jma̱a̱ aʼkhá e̱ji̱i̱n. Ikha jngó mangáanʼ naganianʼ, naʼniulu nandii, ajndu nakhañulúʼ. Xú káʼnii gando gakawín xa̱bu̱ numbaa rá. (Romanos 3:23; 5:12.)
4. Jesús ninindxu̱u̱ mbáá xa̱bu̱ kaʼwi xó má Adán. Mú mbá nutu kayuuʼ nijkha ikhaa, numuu rí Jesús xúgíʼ rí niʼthi Dió niʼnimbo̱o̱, maskijndu nigiʼnu wéñuʼ rí gaki̱i̱. Ikha jngó, nindoo nixnaraʼaminaʼ xó xa̱bu̱ kaʼwi mú maʼni numuu aʼkhá rí nikudamináʼ Adán. Náa ajngáa raunʼ Dió naʼthi rí rígi̱ nindxu̱u̱ «maxná rí ndayooʼ». Xúʼkhii̱n e̱ji̱i̱n Adán mandoo makáwíín ná rí makañún. Ámu nuʼnimbalúʼ kuʼyaa Jesús, aʼkhulúʼ mandoo majngudi̱i̱ jamí mandoo makuwanʼ kámuu mbiʼi (1 Timoteo 2:5, 6; Juan 3:16; Romanos 5:18, 19).
5. Índo̱ nixtáa ná tsu̱du̱u̱ ku̱ba̱ʼ, Jesús niʼni tanun bí niʼniún nandii, nixniʼtsun xa̱bu̱ bí nixkidxu̱u̱n mangoo niʼni ma̱wi̱ji̱ ruʼwa mbiiʼ. Ajndu nikuxi̱i̱n bí nikháñun. Ná numuu niʼni milagru xá. 1) Nigawínʼ a̱jkiu̱u̱n kaʼñun xa̱bu̱ bí kuwa tsingíná mangoo nindoo mambañuun. 2) Milagru rí niʼni nisngájma rí ikhaa nindxu̱u̱ aʼdió Dió. 3) Milagru rígi̱ nisngájma rí maʼni ga̱jma̱a̱ numúun xa̱bu̱ bí nunimbu̱u̱n índo̱ gaxtáa maʼtáñajunʼ xóo Rey náa tsu̱du̱u̱ ku̱ba̱ʼ (Mateo 14:14; Marcos 2:10-12; Juan 5:28, 29).
6. Jesús nikháñu, niʼningabi̱i̱ Dió xóo mbáá ánkli mangoo nigutanga̱a̱ mekuíí (1 Pedro 3:18). Nda̱wa̱á niʼnii Rey. Jesús maʼnigambáá nacha̱ rí mixkawiʼ wéñuʼ ga̱jma̱a̱ xúgíʼ tsingíná dí rígá náa numbaa (Salmo 37:9-11; Proverbios 2:21, 22).
[Xtiʼkhu rí na̱ʼkha̱ náa ináa 7]
Ñajunʼ rí nigiʼdo ikhaa, Jesús nisngáá, niʼni milagru ajndu nixnáximináʼ ga̱jma̱a̱ numulúʼ