Kíxnuu 5

Káʼnii gaʼni Dió ga̱jma̱a̱ numuu ku̱ba̱ʼ rá.

Káʼnii numuu niʼni ku̱ba̱ʼ Jeobá. (1, 2)

Káʼnii numuu nánguá nindxu̱u̱ ku̱ba̱ʼ mitsaan numbaa xúgi̱ rá. (3)

Káʼnii lá gugiʼnii xa̱bu̱ bí ra̱míjínʼ. (4)

Káʼnii gaʼni Jesús nda̱wa̱á jma̱a̱ numúun bí guaʼda nandii, xa̱bu̱ buanuu, bí nikhañun rá. (5, 6)

Káʼnii giʼmáánʼ matani mú mandoo matrigú rí májánʼ nda̱wa̱á. (7)

1. Jeobá niʼni Ku̱ba̱ʼ rígi̱ mú xa̱bu̱ numbaa makuwíín gagi ikhí kámuu mbiʼi. Ikhaa nindoo rí ikhí makuwíín má xúʼkhii̱n gagi xa̱bu̱ bí nuni rí jmbu (Salmo 115:16; Isaías 45:18). Ku̱ba̱ʼ nánguá xú mandatiga̱a̱, marigá kámuu mbiʼi (Salmo 104:5; Eclesiastés 1:4).

2. Nákha xó tseʼnii xa̱biya̱, Dió niraʼwí mbá chiʼgi̱ʼ ku̱ba̱ʼ, niʼni mbóó ku̱ba̱ʼ nagui̱i̱ ikhú nixná mbiʼyu «Edén ku̱ba̱ʼ mitsaan». Ikhí nikumíínʼ timbáá xa̱biya̱ jma̱a̱ timbáá aʼgu̱: Adán ga̱jma̱a̱ Eva. Dió nindoo rí maguaʼdíin e̱jñún mú rí majtíín xúgíʼ ku̱ba̱ʼ. Mañú mañú gagun runi̱i̱ ku̱ba̱ʼ mitsaan xúgíʼ numbaa (Génesis 1:28; 2:8, 15).

3. Adán ga̱jma̱a̱ Eva nixudamijna̱ aʼkhá mú taʼndun gunimbu̱u̱n xtángoo ndrigóó Dió. Núkhu, Jeobá, nixkawíín ná Edén ikhú ku̱ba̱ʼ mitsaan nijkaxiyáá (Génesis 3:1-6, 23). Mú Jeobá tagumatigo̱o̱ rí niʼti maʼni jma̱a̱ numuu ku̱ba̱ʼ. Ikhaa naʼthi maʼni̱i̱ ku̱ba̱ʼ mitsaan makuwíín kámuu mbiʼi xa̱bu̱ numbaa. Xú káʼnii gaʼni xá. (Salmo 37:29.)

4. Nákha xó tseʼni̱i̱ ku̱ba̱ʼ mitsaan, gini giʼmaa mandatigi̱i̱n xa̱bu̱ bí ra̱míjínʼ (2 Pedro 2:9). Rígi̱ garígá náa Armagedón, ikhaa nindxu̱u̱ agu̱ʼ ndrigóó Dió rí maʼnigambáá dí ra̱májánʼ. Nda̱wa̱á, Gixa̱a̱ muruguaraʼa mbá míí tsiguʼ, ikhaa eyoo gaʼti rí ní xaguanu̱u̱ nimbáá xa̱bu̱ bí ra̱májánʼ maʼnigachúú numbaa. Indió bí makawíín, ikhíínʼ má xojñun Dió (Rí huasjŋgajma Juan 16:14, 16; 20:1-3).

5. Ikhú Jesukristo maʼtañajunʼ xóo rey náa tsu̱du̱u̱ ku̱ba̱ʼ mbá míí tsiguʼ (Rí huasjŋgajma Juan 20:6) mangoo wa̱wa̱ gaʼga raʼnimbátiga̱a aʼkhá ndrigóó edxulúʼ ga̱jma̱a̱ ná xuyuluʼ. Maʼninʼ xóo xa̱bu̱ kaʼwanʼ xóo ninindxu̱u̱ Adán ga̱jma̱a̱ Eva nákha xó tsexuda̱mijna̱ aʼkhá. Ikhú ná xaríga̱ itáan nandii, rí nakhi̱i̱ xa̱bu̱, rí nakháñu. Xa̱bu̱ bí guaʼda nandii magumatanún, xa̱bu̱ buanuu maʼni tikhuu xa̱bu̱ (Job 33:25; Isaías 33:24; Rí huasjŋgajma Juan 21:3, 4).

6. Índo̱ Jesús gaʼtañajunʼ mbá míí tsiguʼ xó Rey, xa̱bu̱ bí nuni rí májánʼ muñajunʼ muni̱i̱ xúgíʼ numbaa mbóó ku̱ba̱ʼ mitsaan (Mateo 5:5). Xúʼkhii̱n má mangoo mbíʼín wéñuʼ bí nikhañun majngabi̱i̱n mukuwá mbujúu xó xa̱bu̱ numbaa náa tsu̱du̱u̱ ku̱ba̱ʼ (Hechos 24:15). Ámu ikhíínʼ nuni rí Dió e̱nda̱ʼa̱ muni, makuwíín má xúʼkhii̱n kámuu ná tsu̱du̱u̱ ku̱ba̱ʼ. Ámu nangua eni xúʼkhii̱n, mandatigi̱i̱n kámuu (Juan 5:28, 29; Rí huasjŋgajma Juan 20:11-15).

7. Xúʼkhii̱n gambanuu rí naʼti maʼni Dió náa tsu̱du̱u̱ ku̱ba̱ʼ. Lá naniguaʼ ikháánʼ matrigú rí májánʼ nda̱wa̱á rí. Ámu xúʼkhii̱n, giʼmáánʼ mi̱dxu̱ʼ rajmañaʼ ga̱jma̱a̱ numuu Jeobá mangoo matatsimbaa má xúʼkhii̱n rí xtanda̱ʼa̱. Rí mambayaaʼ matani xúʼkhii̱n rí mi̱dxu̱ʼ ná guʼwá ná eniga̱jma̱a̱ bí nutaraʼa numuu Jeobá náa xuajñanʼ (Isaías 11:9; Hebreos 10:24, 25).

[Xtiʼkhu rí na̱ʼkha̱ náa ináa 10]

Ku̱ba̱ʼ mitsaan rí nindátiga̱

[Xtiʼkhu rí na̱ʼkha̱ náa ináa 11]

Ambá nirígá Armagedón, numbaa maʼni̱i̱ ku̱ba̱ʼ mitsaan