Kíxnuu 11
Rí natatsimbaa ga̱jma̱a̱ kustumbre rí tsenigu̱ʼ Dió
Náa lá kináá dí natatsimbaa jma̱a̱ kustumbre dí raʼkhí nindxu̱u̱. (1)
Lá giʼmín munimbu̱u̱n kristiano rí Dió nindxu̱u̱ mbóó trinidáá ráʼ. (2)
Ndíjkha bí nindxuún kristiano gajkhun tseni riyaaʼ ndxa̱a̱ Nabidáá ajndu má índo̱ naʼni miʼchúú mbiʼi mangoo índo̱ rí naramaaʼ tsigúunʼ. (3, 4)
Lá mandoo bí nikháñun muniu̱u̱n dí raʼkhí bí nduya ráʼ. (5)
Lá nikháñu náa krúsiiʼ Jesús ráʼ. (6)
Nguata la numuu giʼdo muʼni rí nanigu̱ʼ Dió rá. (7)
1. Ra̱ʼkháa xúgíʼ rí natatsimbaa ga̱jma̱a̱ kustumbre nindxu̱u̱ ra̱májánʼ. Mú Dió tsenigu̱ʼ xúgíʼ rí na̱ʼkha̱ náa kamba̱a̱ dí ragajkhun o nanujngo ramuuʼ rí naʼthi náa Biblia (Mateo 15:6).
2. Trinidáá: Lá Jeobá nindxu̱u̱ mbóó Trinidáá, xó muʼthá, ajtsíín xa̱bu̱ náa mbáwii Dió ráʼ. Nangua. Jeobá, Anu̱lú, nindxu̱u̱ «mbáwii Dió gajkuwin» (Juan17:3; Marcos 12:29). Jesús nindxu̱u̱ Aʼdió bí giʼnii, naʼni rí eyoo Dió (1 Corintios 11:3). Bí Anu̱u̱ itáan má nikhi̱i̱ nangua xúʼko Aʼdió (Juan 14:28). Espíritu Santo ra̱ʼkháa mbáá xa̱bu̱; ikhaa nindxu̱u̱ sieki̱i̱ ndrigóó Dió rí najmuu mú maʼni rí nandoo ikhaa (Génesis 1:2; Hechos 2:18).
3. Nabidáá ga̱jma̱a̱ índo̱ naʼni miʼchúú mbiʼi: Jesús taxtáa 25 ñajunʼ gu̱nʼ diciembre, ikhaa nixtáa xó timbá ñajunʼ gu̱nʼ octubre, mbiʼi rí báxtuu nubajtiin mbruʼun mugiúun náa xaná (Lucas 2:8-12). Jesús taʼtun mbá kayuʼ bí kristiano muniriyaa ndxo̱o̱ rí xú nixtáa. Rí phú niʼthún rí munikuma̱a̱ rí xú nikhañu (Lucas 22:19, 20). Nabidáá ga̱jma̱a̱ kustumbre na̱ʼkha̱ náa kamba̱a̱ dí ragajkhun ajndu nákha wajyúú. Xúʼkhii̱n má ndxa̱a̱ rí naʼni miʼchúú mbiʼi. Bí kristiano ginuu nangua niniriyaa ndxa̱a̱ Nabidáá ajndu ma índo̱ naʼni miʼchúú mbiʼi, ndí má tseni kristiano gajkhun bí kúwi̱i̱n xúgi̱.
4. Índo̱ nuniriyaʼ tsigúunʼ: A̱jma̱ nutu eʼthi náa Biblia rí xa̱bu̱ bí tunimba̱a̱ Jeobá niniriyaa ndxa̱a̱ índo̱ niramáʼ tsigúunʼ (Génesis 40:20-22; Marcos 6:21, 22, 24-27). Kristiano bí nikuwá nákha gini tuni riyaaʼ ndxa̱a̱ índo̱ niramáʼ tsigúunʼ. Kustumbre ríʼkhín na̱ʼkha̱ ná kamba̱a̱ ragajkhun ajndu nákha wajyúú. Kristiano gajkhun numinunʼ eʼwíínʼ rí guaʼda mangoo nambáxuun májánʼ ajndu náa má mbiʼi̱i̱ rí mbá tsiguʼ.
5. Bí namiñún kuñún wa̱jinʼ: Bí nikháñun nandaa rí eni ajndu má nangua ekumún nditáan. Ikháanʼ nangua xú mumbañúun, ajndu má ikhíínʼ nangua muniulúʼ dí raʼkhí (Salmo 146:4; Eclesiastés 9:5, 10). Índo̱ alma nakhañu; nangua eʼya xóo itáan (Ezequiel 18:4). Mú nguána ánkli bí ra̱míjínʼ wéñuʼ, nagumbiʼñún xa̱bu̱ wéñiʼ, ikhíínʼ nuni rí xa̱bu̱ makumún rí nindxúun espíritu ndrigu̱u̱n wa̱jinʼ. Xúgíʼ kustumbre rí kagujtuminaʼ ga̱jma̱a̱ rí mamiñáanʼ o matiamajkún bí nikhañun raʼkhí nindxu̱u̱ (Isaías 8:19).
6. Krúsiiʼ: Jesús takañu náa krúsiiʼ, nikhañu náa mbóó ixi̱ jmbu. Ajngáa griego nandoo gaʼti mbó ixi̱ jmbu nirawijngáá náa mbaʼa Biblia xóo «krúú». krúú na̱ʼkha̱ náa kamba̱a̱ ragajkhun dí rígá nákha wajyúú. Kristiano ginuu tajmun krúú ajndu má tunimba̱a̱. Ikha jngó, lá nakumaʼ ikháánʼ rí májánʼ gaʼni rí majmuluʼ krúsiiʼ náa munimba̱a̱ ikhaa xáʼ. (Deuteronomio 7:26; 1 Corintios 10:14.)
7. Mbáá ajndu maʼniaʼ miʼskhaa wéñuʼ matatsiʼñanʼ tikhuu rí natsimbaa ga̱jma̱a̱ kustumbre. Ajndu makuwíín angianʼ jamí bí nambáxa̱ʼ májánʼ gajmiánʼ bí xaʼndun matriʼkuí rí natatsimbaa. Mú itáan giʼdo numuu muʼni rí nanigu̱ʼ Dió ra̱ʼkháa rí nanigu̱ʼ mbáá xa̱bu̱ numbaa gajmiulúʼ (Proverbios 29:25; Mateo 10:36, 37).
[Xtiʼkhu rí na̱ʼkha̱ náa ináa 22]
Dió nangua nindxu̱u̱ mbó Trinidáá
[Xtiʼkhu rí na̱ʼkha̱ náa ináa 23]
Nabidáá na̱ʼkha̱ náa kamba̱a̱ rí naʼsngáá ndu̱wa̱ʼ rí eríga̱ ajndu nákha wajyúú
[Xtiʼkhu rí na̱ʼkha̱ náa ináa 23]
Nda̱a̱ numuu rí mbuʼyamajkun bí nikháñun ndi má xamiñulúʼ kuʼñún