Kíxnuu 10

Xú káʼnii guxkamaa kamba̱a̱ rí naʼsngáá gajkhun

Ámu nandaaʼ mambaxa̱ʼ májánʼ ga̱jma̱ʼ Dió, giʼdo mi̱dxu̱ʼ náa kamba̱a̱ rí enigu̱ʼ. Jesús niʼthi «tsí gako rí muni mba̱a̱» mbuyamajkuí Dió xó má eʼsngáá rí «gako» (Juan 4:23, 24). Kha̱ʼ mbóó kamba̱a̱ jmbuu rí nayejkha mbuʼyamajkuí Dió (Efesios 4:4-6). Kamba̱a̱ gajkhun na̱jkha̱kaguanʼ makuwánʼ kámuu mbiʼi, kamba̱a̱ rí ragajkhun na̱jkha̱kaguanʼ maʼnimbáti̱gáanʼ (Mateo 7:13, 14).

Maguguambayulúʼ mbuʼyaa náa kamba̱a̱ gajkhun ámu nduʼñún xú ekúwi̱i̱n xa̱bu̱ bí naguun ikhí. Xó máʼ Jeobá xa̱bu̱ májánʼ nindxu̱u̱, xúʼkhii̱n má xa̱bi̱i̱ bí nduyamajkuíí rí gajkhun giʼmín manindxu̱u̱n míjínʼ. Xó má mbó ixi̱ láxa̱ májánʼ, naxná láxa̱ májánʼ, xúʼkhii̱n má kamba̱a̱ rí naʼsngáá rí májánʼ nakúwi̱i̱n xa̱bu̱ míjínʼ (Mateo 7:15-20).

Bí nambáxu̱u̱n májánʼ gajmiún Jeobá nduyamajkuíí wéñuʼ ajngáa raunʼ Dió. Ndu̱ya̱a̱ rí ajngáa raunʼ Dió na̱ʼkha̱ náa ikhaa. Ikha jngó, nuniñanʼ rí ajngáa raunʼ Dió maʼtún xú káʼnii gakuwá, munijmbi̱i̱ ajngáá rí guaʼda mangoo mambáñuun muniʼnííʼ Dió (2 Timoteo 3:16). Ikhaa má mangoo, nugi̱ʼ nuni rí eti.

Bí nambáxu̱u̱n májánʼ gajmiún Dió nandún kuyamijná ki̱nikhiin. Jesús nisnga̱jma̱ rí nindoo kaʼñún wéñuʼ xa̱bu̱, niʼsngún ga̱jma̱a̱ numuu Dió mangoo niʼni̱i̱ xa̱bu̱ bí nakañun. Xúʼkhii̱n má mangoo bí nagun náa kamba̱a̱ gajkhun nusnga̱jma̱ rí nandun kuñún eʼwíínʼ xa̱bu̱. Xó má Jesús, tsiwiñunʼ kuñún xa̱bu̱ gíníín, xa̱bu̱ miʼxíín xa̱bu̱ skuniúnʼ. Jesús niʼthi rí xa̱bu̱ mbuyaa tsíín bí nagun ki̱dxu̱ʼ numuu rí ki̱nikhiin eñun kuyamijná wéñuʼ (Juan 13:35).

Bí nambáxu̱u̱n májánʼ gajmiún Dió ndu̱yáá rí ra̱ʼkhá tháán giʼdo numuu nambiʼyuu: Jeobá. Ámu mbáá xandoo gajmuu nambiʼyaa, lá manindxu̱u̱ mbáá bí mambaxa̱ʼ májánʼ ga̱jma̱a̱ʼ xí. Xandoo ka. Índo̱ nambáxulúʼ májánʼ gajmiulúʼ mbáá, nuʼtháán ga̱jma̱a̱ nambiʼyuu mangoo nuʼthúún eʼwíínʼ rí májánʼ numuu ikhaa. Ikha jngó, bí nandun mambaxúún májánʼ gajmiún Dió guaʼda rí majmún nambiʼyuu, mangoo mutún eʼwíínʼ xa̱bu̱ ga̱jma̱a̱ numuu ikhaa. Jeobá nandoo muʼni xúʼkhii̱n (Mateo 6:9; Romanos 10:13, 14).

Xó máʼ Jesús, bí nambáxu̱u̱n májánʼ gajmiún Dió nusngúún eʼwíínʼ xa̱bu̱ ga̱jma̱a̱ numuu Reino ndrigóó Dió. Reino ndrigóó Dió nindxu̱u̱ ná ethañajunʼ mekuíí, ikhaa maʼni̱i̱ ku̱ba̱ʼ mitsaan numbaa rígi̱. Bí nambáxu̱u̱n májánʼ gajmiún Dió nutún eʼwíínʼ xa̱bu̱ ajngáa rí májánʼ ga̱jma̱a̱ numuu Reino ndrigóó Dió (Mateo 24:14).

Bí nutaraʼa numuu Jeobá nugi̱ʼ mambaxúún májánʼ gajmiún Dió. Nduyamajkuíí Biblia, mangoo nandun kuyamijná ki̱nikhiin. Kámí najmún nambiʼyuu Dió ikhaa máʼ ndu̱ya̱a̱ rí giʼdo wéñuʼ numuu nambiʼyuu, mangoo nusngúún eʼwíínʼ xa̱bu̱ ga̱jma̱a̱ numuu Reino ndrigóó Dió. Rí mbiʼi xúgi̱ náa tsu̱du̱u̱ ku̱ba̱ʼ bí nutaraʼa numuu Jeobá naguun kamba̱a̱ rí gajkhun.