“Gaʼguala ga̱jma̱a̱ gusngún xa̱bu̱”

1-6. Arathá xóo etaraʼa Testigos náa mixtiʼkhu xuajen.

MBÁA ndxájulú ndxáʼgú bi̱ mbiʼyuu Rebecca, bi̱ na̱ʼkha̱ náa Ghana, ndiʼyoo dí ma̱ndoo maʼtáraʼa náa escuélóo. Ikha jngóo nayéjkha̱ tikhu i̱yu̱lúʼ mu maʼtárúʼún eʼwíinʼ mámbá índo̱ nagájnuu recreo, asndu nigíʼdu̱u̱ má niʼsngúún mbaʼin bi̱ naʼnigajmaa̱ gajmíi̱n.

² Náa isla dí rígá náa Madagascar dí naguanúu xígií náa África, ikhí kúwá xa̱bu̱ gajmii bi̱ nindxu̱ún precursores bi̱ ndayóoʼ magún mbá 25 kilómetros mu magún gúni̱ mbaʼa estudio náa mbá xuajen, nagún maski ajndu naʼni mijkha wéñuuʼ.

³ Náa rawuunʼ mañu dí mbiʼyuu Paraguay ga̱jma̱a̱ i̱mba̱ dí mbiʼyuu Paraná, rígá xuajen dí naʼni mingíjyúuʼ magún gutaraʼa. A̱ngiu̱lú bi̱ kúwá náa xuajen rígi̱ ga̱jma̱a̱ mbá 15 xuajen mba̱ʼu̱, nini mbá barco mba̱a̱ dí maʼngo̱o̱ magu̱ mbá 45 toneladas dí miki̱wu̱n. Náa barco rígi̱, naʼngo̱o̱ nagún mbá 12 a̱ngiu̱lú, rígi̱ niyambáá dí mutaruʼúún ajngáa rí májánʼ bi̱ kúwá náa xuajen rúʼko̱.

⁴ A̱ngiu̱lú bi̱ kúwá náa Alaska najmún májánʼ mbiʼi índo̱ naʼni ruʼphu mu mutaraʼa. Índo̱ naguánú xa̱bu̱ bi̱ naguwáʼ náa mixtiʼkhu xuajen, a̱ngiu̱lú nuguájun náa rawuunʼ iyaʼ kudúún carrito náa kajti mbaʼa wéñuuʼ i̱yi̱ʼ dí mixtiʼkhu ajngáa. Náa Alaska ra̱ʼkhá tháán eyambáá avioneta mu ma̱ndoo mutaraʼa ajngáa rí májánʼ náa xa̱bu̱ bi̱ kúwá náa xuajen ma̱jkha̱ʼ, xóo aleutiana, atabascana, chimesiana ga̱jma̱a̱ coluchana.

⁵ Mbáa ndxájulú bi̱ na̱ʼkha̱ náa Texas (Estados Unidos) bi̱ mbiʼyuu Larry, naʼtáraʼa náa guʼwá rí kúwíin xabuanii dí rígá náa xtáa. Maski ajndu na̱jkha̱ ga̱jma̱a̱ silla de rueda mú ikhaa tséniñuuʼ raʼni ñajunʼ rígi̱. Ikhaa naʼthúún xúgíinʼ ga̱jma̱a̱ numuu Xa̱bu̱ Ñajunʼ ndrígóo Dios asndu naʼthúún dí ikhaa mata̱nga̱a̱ maʼga̱ mbujuáaʼ (Is. 35:5, 6).

⁶ Mbá nguéjmi̱i̱n Testigo bi̱ naguwáʼ náa Myanmar (nákha ginii mbiʼyuu Birmania), nigájnún náa xuajen Mandalay mu magún ajtsú mbiʼi ga̱jma̱a̱ barco náa mbá asamblea dí rígá i̱mba̱ níʼkhóo xuajen. Numuu dí nandún mutaraʼa, ikha jngóo niyégun tikhu i̱yu̱lúʼ mu xúʼko̱ muxnún bi̱ nagún gajmiún. Mámbá índo̱ nawi̱ji̱ barco ikhú naguájta̱a̱, nagún mbá nacha̱ mu muxnaraʼa i̱yu̱lúʼ. Mú natsimún eʼwíinʼ xa̱bu̱ náa barco, ikha jngóo índo̱ natangi̱i̱n nuxkamiin eʼwíinʼ mu mutaruʼúún.

7. Xú káʼnii etaraʼa xa̱bi̱i̱ Jeobá ga̱jma̱a̱ ndiéjuunʼ dí mbóó kúwá runi̱ xá.

⁷ Rígi̱ nindxu̱u̱ tikhu xkri̱da náa nusngajma xa̱bi̱i̱ Jeobá dí kúwá runi tsiakimijna mutaraʼa “kájxi̱ ga̱jma̱a̱ numuu Xa̱bu̱ Ñajunʼ ndrígóo Dios” náa xúgíʼ numbaaʼ (Hech. 28:23). Nagún rutaraʼa náa mámbá guʼwá, náa kamba̱a̱, nuni̱ carta ma̱ngaa najmún teléfono. Tséniña̱a̱ʼ rutaraʼa índo̱ nagún náa autobús ga̱jma̱a̱ índo̱ nagún náa parque ma̱ngaa índo̱ ndu̱ya̱a̱ xu̱únʼ náa nuñajunʼ. Mixtiʼkhu xóo etaraʼa, mú mbóó má dí kúwá runi̱, ikhaa nindxu̱u̱ rí mutaraʼa ajngáa rí májánʼ asndu náá má kúwá xa̱bu̱ (Mat. 10:11).

8, 9. a) Náá numuu rí nagui̱i̱ majuiʼtáraʼa má xúʼko̱ ga̱jma̱a̱ numuu Xa̱bu̱ Ñajunʼ ndrígóo Dios rá. b) Ndiéjunʼ gándoo gúraximíjna̱ ga̱jma̱a̱ ndiéjunʼ gándoo gúʼni̱ mu maxtiʼña̱a̱ rá.

⁸ Ndiéjunʼ gándoo gúʼthá ga̱jma̱a̱ numaaʼ ikháán rá. Lá nindxa̱a̱ʼ mbáa bi̱ naʼtáraʼa náa itháan dí 235 países ráʼ. Á mu xúʼko̱, xtaa ratiambáá mu majuiʼtáraʼa ajngáa rí májánʼ ga̱jma̱a̱ numuu Reino, dí nindxu̱u̱ mbóó ñajunʼ dí nagui̱i̱ wéñuuʼ náa xúgíʼ tsu̱du̱u̱ numbaaʼ. Tséʼniuu á mu nurikulú muʼtáraʼa, nuni̱ gínáán o i̱ʼwáʼ xkujndu dí nuraʼníí, mú kuwáánʼ ru̱ʼni̱ dí xúgíinʼ xa̱bu̱ bi̱ kúwá náa xúgíʼ xuajen mudrigú káxi̱ ajngáa dí najkua kuʼyúlú ga̱jma̱a̱ numuu Xa̱bu̱ Ñajunʼ ndrígóo Dios.

⁹ Índo̱ nundxaʼwamíjna̱ ga̱jma̱a̱ numuu xúgíʼ rígi̱, mbáa naʼni murajximíjnalú: Náá numuu rí nimbáa tséʼngo̱o̱ gárikoo ñajunʼ rígi̱ ni má Gixa̱a̱ rá. Mu ma̱ndoo muriʼña̱a̱lú graxe̱ rígi̱, gíʼmaa mbuʼyáá dí nirígá nákhá siglo timbá, numuu dí ikháanʼ bi̱ ni̱ndxu̱lú Testigos de Jeobá i̱ndó nu̱ʼni̱ mbá ñajunʼ dí nigi̱ʼdu̱u̱ nákha ikhú.

Mbá ñajunʼ rí mbajyúuʼ mba̱yu̱u̱ʼ

10. Ndiéjunʼ ñajunʼ nigíʼdu̱u̱ niʼni Jesús ga̱jma̱a̱ ndiéjunʼ ni̱jkha̱nú ndiʼyoo xá.

¹⁰ Jesucristo, bi̱ nigíʼ congregación cristiana niʼtáráʼa ajngáa rí májánʼ xó má eʼngo̱o̱. Ikhaa niʼthí: “Ndayóoʼ rí mataráʼa náa i̱ʼwáʼ xuajen ajngáa rí májánʼ ga̱jma̱a̱ numuu Xa̱bu̱ Ñajunʼ ndrígóo Dios, ikhaa numuu rúʼko̱ ni̱ʼkhá” (Luc. 4:43). Jesús má ndiʼyoo rí nditháan má xámbóo raʼni ñajunʼ rí nigíʼdu̱u̱, numuu dí nákha inu makhañúu niʼthí dí ndayóoʼ majuiʼtáraʼa ajngáa rí májánʼ “náa xúgíʼ xuajen” (Mar. 13:10). Mú tsíín gúni̱ ñajunʼ rúʼko̱ ga̱jma̱a̱ xú káʼnii gúni̱ xá.

11. Ndiéjunʼ ñajunʼ nixnún muni̱ xa̱bi̱i̱ Jesús ga̱jma̱a̱ ndiéjunʼ niʼthún dí mámbáñún xá.

¹¹ Índo̱ Jesús nitujxi̱i̱ nisngájmaminaʼ náa inún xa̱bi̱i̱ ga̱jma̱a̱ nixnún mbá ñajunʼ rí muni̱, niʼthún: “Ikha jngóo gaʼguala ga̱jma̱a̱ gusngún xa̱bu̱ bi̱ kúwá náa xúgíʼ xuajen mu mani̱ndxu̱ún xa̱bi̱ʼ. Guxuʼmíinʼ iyááʼ ga̱jma̱a̱ mbiʼyuu Anu̱ʼ, mbiʼyuu Ada̱ ga̱jma̱a̱ espíritu santo. Gusngúnla munimbáníí xúgíʼ rí ikhúúnʼ nitañájuanla. Ga̱jma̱a̱ garmáʼáan a̱jkia̱la rí ikhúúnʼ maxtáá ga̱jma̱á nindxa̱la asndu índo̱ gártumuu mbiʼi” (Mat. 28:19, 20). Índo̱ niʼthí “maxtáá ga̱jma̱á nindxa̱la”, Cristo nisngájma rí ikhaa mambáñún mu mutaraʼa ga̱jma̱a̱ musngáa numuu Xa̱bu̱ Ñajunʼ ndrígóo Dios. Gajkhun má dí mbaʼñúun rí mixtambáñúún numuu dí nákha wapháá niʼthí dí ‹xúgíinʼ xa̱bu̱ mawiñu̱u̱nʼ kuñún› (Mat. 24:9). Nákha xóó tséjkha̱a̱ mekhuíí niʼthún dí marigá imbo̱o̱ʼ dí mambáñún, ikhaa nindxu̱u̱ espíritu santo rí maxnún tsiakii mu mani̱ndxu̱ún xa̱bi̱i̱ “asndu náa naguámbári̱go̱o̱ numbaaʼ” (Hech. 1:8).

12. Ndiéjunʼ graxe̱ rí gíʼdoo numuu rígá, ga̱jma̱a̱ ndíjkha rí ndayóoʼ mbuʼyáá xóo exti̱ʼña̱a̱ rá.

¹² Mú, ndiéjunʼ nini apóstoles ga̱jma̱a̱ eʼwíinʼ cristianos bi̱ nikúwá nákha siglo timbá rá. Lá ndiyáá dí gíʼdoo numuu ñajunʼ dí nikhánún muni xáʼ. Lá niʼngu̱u̱n nitaraʼa kájxi̱ ga̱jma̱a̱ numuu Xa̱bu̱ Ñajunʼ ndrígóo Dios maski ajndu rambáʼiin ga̱jma̱a̱ niguma gíníin xáʼ. Lá gajkhun Jeobá nimbáñún ga̱jma̱a̱ espíritu santo xáʼ. Xúgíʼ graxe̱ rígi̱ ga̱jma̱a̱ i̱ʼwáʼ naxtiʼña̱a̱ náa i̱yi̱i̱ʼ ndrígóo Hechos. Gíʼdoo wéñuuʼ numuu mbuʼyáá xóo exti̱ʼña̱a̱, numuu dí Jesús niʼthí rí ñajunʼ rígi̱ marigá má xúʼko̱ “asndu índo̱ gártumuu mbiʼi”. Ikháánʼlú bi̱ kuwáánʼ náa iwáá mbiʼi, kaʼyulú xóó mu̱ʼni̱ ñajunʼ rígi̱. Ikha jngóo gíʼdoo numuu mbuʼyáá dí naʼthí náa i̱yi̱i̱ʼ ndrígóo Hechos.

Dí naʼthí náa i̱yi̱ʼ ndrígóo Hechos rí nini̱ Apóstoles

13, 14. a) Tsáá niʼnirámáʼ Hechos ga̱jma̱a̱ xú káʼnii ndiʼyoo dí maʼnirámáʼ xá. b) Ndiéjunʼ e̱ʼkha̱ raʼthí náa Hechos rá.

¹³ Tsáá niʼnirámáʼ libro rígi̱ rá. Maski ajndu náa awúu̱n libro rígi̱ tséʼkha̱ mbiʼyuu bi̱ niʼnirámáʼ, mú ajngáa rí xóo nagi̱ʼdu̱u̱ ga̱jma̱a̱, nasngájma kaʼwu dí niʼnirámáʼ Lucas (Luc. 1:1-4; Hech. 1:1, 2). Ikha jngóo, asndu má nákhá ginii nuthi dí ikhaa niʼnirámáʼ, bi̱ nindxu̱u̱ “médico bi̱ nandún kuyáá” mbáa bi̱ niʼni tsumáá wéñuuʼ (Col. 4:14). Libro rígi̱ na̱ʼkha̱ raʼthí dí nirígá mbá 28 tsiguʼ. Nagi̱ʼdu̱u̱ naʼthí índo̱ Jesús ni̱jkha̱a̱ mekhuíí dí tsiguʼ 33 tsiguʼ nda̱wa̱á, asndu índo̱ Pablo ni̱jkha̱ guʼwá e̱jua̱nʼ náa Roma mijngíí tsiguʼ 61. Maski ajndu bi̱ niʼnirámáʼ na̱nguá ekudaminaʼ náa xtáa raʼthí, mú nguáná naʼthí ga̱jma̱a̱ numuu. Lucas ma̱ngaa nixtáa náa mbaʼa dí niʼnirámáʼ, nduʼyáálú rígi̱ numuu rí nguáná niʼthí ikhiin, mú nguáná niʼthí ikháanʼxu (Hech. 16:8-10; 20:5, 6; 27:1). Rígi̱ nasngájma dí Lucas ndiyáʼ mbaʼyoo kuduun xóo nirígá, mbáa nirajxu̱u̱ Pablo, Bernabé, Felipe ga̱jma̱a̱ eʼwíinʼ.

¹⁴ Náa i̱yi̱ʼ ndrígóo Lucas itháan má naʼthí ga̱jma̱a̱ numuu ñajunʼ dí niʼni Jesús, mú náa Hechos naʼthí ga̱jma̱a̱ numún xa̱bi̱i̱. Náa i̱yi̱ʼ rígi̱ naʼthí ga̱jma̱a̱ numún xa̱bekha ga̱jma̱a̱ gu̱ʼu̱ bi̱ nini̱ ñajunʼ dí gíʼdoo wéñuuʼ numuu, maski ajndu xa̱bu̱ numbaaʼ ndiñún dí “na̱nguá guáʼdáá numún ni má tágún mitsídánʼ escuela” (Hech. 4:13). Nindxu̱u̱ mbá i̱yi̱ʼ náa na̱ʼkha̱ raʼthí xú káʼnii nigi̱ʼi̱ ga̱jma̱a̱ xóo ni̱jkha̱ ra̱ja̱a̱ congregación cristiana. Nasngájma xú kaʼnii nitaraʼa cristianos bi̱ nikúwíin nákhá siglo timbá ga̱jma̱a̱ dí támiñún mu muni̱ ñajunʼ rígi̱ (Hech. 4:31; 5:42). Ma̱ngaa naʼthí xú káʼnii espíritu santo niyambáá mu majuiʼtáraʼa ajngáa rí májánʼ (Hech. 8:29, 39, 40; 13:1-3; 16:6; 18:24, 25). Ma̱ngaa na̱ʼkha̱ raʼthí ndiéjuunʼ dí phú nagájnuriyo̱o̱ʼ náa Biblia, dí maʼngo̱o̱ maʼni Xa̱bu̱ Ñajunʼ ndrígóo Dios bi̱ nindxu̱u̱ Cristo. Dí iwáá kayuuʼ naʼthí xú káʼnii niʼngo̱o̱ nijuiʼtáraʼa ajngáa rí májánʼ maski ajndu nimíniiʼ (Hech. 8:12; 19:8; 28:30, 31).

15. Xú káʼnii gámbáyulú dí muʼnigajma̱a̱ libro ndrígóo Hechos rá.

¹⁵ Dí mbuʼyáá xú káʼnii nikúwíin xa̱bi̱i̱ Cristo nákha siglo timbá ra̱ʼkhá tháán mitsaanʼ, rúʼko̱ nambáyulú makumulú kuʼyáá itháan Dios. Rí támiñún mutaraʼa ga̱jma̱a̱ xúgíʼ a̱jkiu̱ún ma̱ngaa fe rí niguáʼdáá naxkajxáánʼ mbuʼyaridúún. Rígi̱ gámbáyulú mu muʼnimbaníí ajngáa rí niʼthí Jesús: “Gaʼguala ga̱jma̱a̱ gusngún xa̱bu̱”. Libro rígi̱ mambáyulú wéñuuʼ mu muʼnigajma̱a̱ tsumáá dí naʼthí náa Hechos.

Dí mambáyulú muʼnigajma̱a̱ Biblia

16. Náa numuu nigumaratáá libro rígi̱ rá.

¹⁶ Mbá ajtsú numuu dí nigumaratáá libro rígi̱. Timbá, mambáyulú mbuʼyáá itháán gajkhun dí Jeobá naxnúlú espíritu santo ndrígóo náa nuʼtáraʼa ga̱jma̱a̱ numuu Reino, ga̱jma̱a̱ dí nuʼsngúún xa̱bu̱. Ragajma, índo̱ gúʼyáá xkri̱da ndrígu̱ún bi̱ timbíin cristianos rúʼko̱ gáʼni dí manigulúʼ muʼtáraʼa itháán. Ragajtsú, maʼni dí mbuʼyamajkuíí itháán xuajñuu Jeobá ga̱jma̱a̱ bi̱ nuyégún edxu̱u̱ náa najuiʼtáraʼa ma̱ngaa bi̱ nuñewa̱a̱n congregación.

17, 18. a) Ndiéjunʼ e̱ʼkha̱ raʼthí libro rígi̱ rá. b) Ndiéjunʼ i̱ʼwáʼ gíʼdoo mu mambáyulú muʼnigajma̱a̱ rá.

¹⁷ I̱yi̱ʼ rígi̱ gíʼdoo mbá 8 níʼkhóo, náa mámbá na̱ʼkha̱ raʼthí mbá chíʼgíiʼ ga̱jma̱a̱ numuu libro ndrígóo Hechos. Tséʼthí ga̱jma̱a̱ numuu mámbá versículo, na̱ʼkha̱ raʼthí ndiéjuunʼ ma̱ndoo majmañulú ga̱jma̱a̱ dí nirígá, ma̱ngaa xú káʼnii muʼgíʼ muʼnimbánii. Náa nagíʼdu̱u̱ mámbá capítulo naʼthúlú mbá chíʼgíiʼ dí ma̱ʼkha̱ raʼthí náa mbá kañiiʼ capítulo ma̱ngaa náá waʼyaa texto ndrígóo nigájnuu dí ma̱ʼkha̱ raʼthí.

¹⁸ Ma̱ngaa náa libro rígi̱ na̱ʼkha̱ i̱ʼwáʼ dí ma̱ndoo mambáyulú muʼnigajma̱a̱ i̱yi̱i̱ʼ ndrígóo Hechos. Kagu̱ xtiʼkhuu mitsaan dí ma̱ndoo mambáyulú mundxa̱ʼwa̱míjna̱ ndiéjunʼ dí nirígá. Náa mbaʼa kíxnuu na̱ʼkha̱ kúgumaʼá náa naʼthúlú itháan xóó, tikhu naʼthí ga̱jma̱a̱ numún xa̱bi̱i̱ Dios bi̱ niguáʼdáá fe, numuu xuajen dí nirígá nákhá ikhú, dí naguʼwún nuni̱ xa̱bu̱ ga̱jma̱a̱ na̱ʼkha̱ raʼthí mbiʼñún eʼwíinʼ xa̱bu̱ bi̱ naguwáʼ náa i̱yi̱i̱ʼ ndrígóo Hechos. Náa mámbá níjniúu naguanúu náa ma̱ndoo muʼnirámáʼ dí nandulú.

19. Ndiéjunʼ gíʼmaa murajximíjna̱lú rá.

¹⁹ Libro rígi̱ mambáyulú mbuʼyáá xóo ni̱ndxu̱lú. Tséʼniuu á mu mba̱yu̱u̱ʼ o ndiʼkhu̱ún kuwáánʼ ruʼtáraʼa ga̱jma̱a̱ numuu Reino, májánʼ gáʼni mbuʼyáá ndiéjuunʼ dí itháan gíʼdoo numuu náa vida ndrígulú, ma̱ngaa xú káʼnii eʼyáá ñajunʼ dí muʼtáraʼa ga̱jma̱a̱ dí muʼsngúún xa̱bu̱ (2 Cor. 13:5). Guraximíjna̱lú: “Lá nani mbá nacha̱ ñajunʼ rígi̱ xó má eni̱ nákha ginii ráʼ.” (1 Cor. 7:29-31.) “Lá nataráʼa má xúʼko̱ ga̱jma̱a̱ gagi ma̱ngaa ga̱jma̱a̱ xúgíʼ a̱jkiu̱nʼ ráʼ.” (1 Tes. 1:5, 6.) “Lá nani xó má eʼngo̱o̱ náa nataráʼa ráʼ.” (Col. 3:23.)

20, 21. Ndíjkha rí ndayóoʼ mu̱ʼni̱ mbá nacha̱ ñajunʼ rígi̱ ga̱jma̱a̱ ndiéjunʼ dí gíʼmaa mu̱ʼni̱ rá.

²⁰ Nditháan xámbumulú dí ñajunʼ dí nikhánulú muʼni, gíʼdoo wéñuʼ numuu. Ndayóoʼ muʼtáraʼa nacha̱ numuu dí na̱ʼkha̱ rajngiyuu mbiʼi, gamíi dí mbaʼin xa̱bu̱ makhañún. Tséʼyáá nguáthi̱i̱n xa̱bu̱ gúdxawíín ajngáa rígi̱, mú ikháanʼ kajkuáa ñawúnlú dí mumbañún xa̱bu̱ nákhá xóó tséʼkha̱nú mbiʼi ndrígóo Jeobá (Hech. 13:48; 1 Tim. 4:16).

²¹ Májánʼ gáʼni dí mbuʼyaridúún a̱ngiu̱lú bi̱ nikúwi̱i̱n nákhá siglo timbá. Índo̱ gúʼnigajma̱a̱ libro rígi̱, gíʼmaa dí maxkajxáánʼ mámbá mbiʼi muʼtáraʼa ga̱jma̱a̱ gagi ma̱ngaa dí xámiñulúʼ ga̱jma̱a̱ makuwáánʼ xawii muʼtáraʼa “kájxi̱ ga̱jma̱a̱ numuu Xa̱bu̱ Ñajunʼ ndrígóo Dios” (Hech. 28:23).