“Na̱nguá guáʼdáá numún ni má tágún mitsídánʼ escuela”

1, 2. Ndiéjunʼ milagro niʼni Pedro ga̱jma̱a̱ Juan náa mijngii xkrugoo guʼwá rí nduyamajkuíí Dios rá.

GUNDXAʼWAMÍJNA̱ dí xtáa rarígá, nindxu̱u̱ mbá wakhaʼ índo̱ na’ni mijkha wéñuuʼ, xa̱bu̱ kúwá ratu̱ʼu̱u̱n náa guʼwá rí nduyamajkuíí Dios. Inu má mugi̱ʼdi̱i̱ “mutajkáan” (Hech. 2:46; 3:1).a Pedro ga̱jma̱a̱ Juan nigún ranújngún náa majñúúnʼ mbaʼin xa̱bu̱, mu matu̱ʼu̱u̱n náa xkrugoo guʼwá rí nduyamajkuíí Dios, rí nuxna mbiʼí Mitsaanʼ. Gakhi̱i̱ ewáán ethi xa̱bu̱ ga̱jma̱a̱ asndu nawáán xóo egún, maski ajndu xúʼko̱, nawáán dí eʼthí mbáa xa̱bu̱ gúʼxíiʼ, bi̱ xúʼko̱ má nigumaa bi̱ xtaa na̱nda̱ʼa̱ mbújkha̱a̱ (Hech. 3:2; 4:22).

² Índo̱ Pedro ga̱jma̱a̱ Juan kúwá ratu̱ʼu̱u̱n náa guʼwá, xa̱bu̱ gínáa bugi̱ tséniñuuʼ raʼtákháñún dí muxnáá mbújkha̱a̱. Índo̱ niguánú náa gíʼ, niʼni̱i̱ a̱jkiu̱u̱n, nikumu̱u̱ dí muxnáá mbújkha̱a̱. Mú Pedro niʼthúu̱n: “Ragúʼdoo plata ni má oro, mú maxna̱a̱ʼ rí gúʼdoo. ¡Ga̱jma̱a̱ mbiʼyuu Jesucristo bi̱ na̱ʼkha̱ náa Nazaret, ayuʼ kruíga̱a̱ʼ!”. Xa̱bu̱ bi̱ kúwá ikhí niguanún tsiánguá índo̱ ndiyáá dí Pedro nigujtuun ñawúunʼ, nindxu̱u̱ timbá miʼtsú dí xa̱bu̱ bugi̱ nawi̱ji̱ (Hech. 3:6, 7). Lá nundxaʼwamíjna̱ xú káʼnii gagi nixtáa xa̱bu̱ bigi̱ índo̱ ndiʼyoo dí niʼni̱i̱ rajkúu ga̱jma̱a̱ nandoo na̱jkha̱ kruígo̱o̱ ráʼ. ¡Ra̱ʼkhá tháán nidxuu dí asndu nigíʼdu̱u̱ nikijxi̱i̱ ga̱jma̱a̱ niʼni mba̱a̱ Dios!

3. Ndiéjunʼ niʼthúún xa̱bu̱ Pedro rá.

³ Xa̱bu̱ bi̱ kúwá ikhí nidxún wéñuuʼ, ikha jngóo mbá nache̱ nigún gúyaa Pedro ga̱jma̱a̱ Juan bi̱ kúwá má ratu̱ʼu̱u̱n náa corredor ndrígóo Salomón, ikhí náa nixtáa raʼsngáa Jesús, Pedro naʼthúún xa̱bu̱ bi̱ nagimbíi̱n’ xú kaʼnii niguma thanáá bi̱ gúʼxíiʼ (Juan 10:23). Apóstol Pedro naʼthúún mbá dí itháán gíʼdoo numuu, dí raʼkháa nindxu̱u̱ oro ga̱jma̱a̱ plata, nindxu̱u̱ dí mata̱nga̱a̱ a̱jkiu̱ún ga̱jma̱a̱ dí majngudi̱i̱ aʼkhúún, mu xúʼko̱ ma̱ndoo magún kidxuuʼ Cristo bi̱ Jeobá nigíiʼ mu mayéʼga “edxu̱u̱ bi̱ naxná rí ndaʼya” (Hech. 3:15).

4. a) Ndiéjunʼ nirígá nda̱wa̱á dí niguma thanáá xa̱bu̱ rá. b) Ndiéjunʼ guʼyáá náa capítulo rígi̱ rá.

⁴ Nindxu̱u̱ mitsaanʼ wéñuuʼ dí nirígá mbiʼi rúʼko̱, mbáa xa̱bu̱ niguma thanáá ga̱jma̱a̱ nandoo na̱jkha̱ kruígo̱o̱, ma̱ngaa ra̱ʼkhá tháán mbaʼin xa̱bu̱ nindoo niniʼniiʼ Dios ga̱jma̱a̱ niguáʼdiin nini̱ xó má eyoo ikhaa (Col. 1:9, 10). Mú, rígi̱ maʼni dí xa̱bu̱ ñajunʼ xúniñu̱u̱nʼ mutaraʼa apóstoles (Hech. 1:8). Náa capítulo rígi̱ mbuʼyáá xú kaʼnii Pedro ga̱jma̱a̱ Juan nitaraʼa ga̱jma̱a̱ numuu Reino, ndiéjunʼ nini̱ ga̱jma̱a̱ xú káʼnii nikumu̱ún, maski ajndu xa̱bu̱ ñajunʼ ndiñún xóo bi̱ “na̱nguá guáʼdáá numún ni má tágún mitsídánʼ escuela” (Hech. 4:13).b Ma̱ngaa mbuʼyáá ndiéjunʼ ejmañulú xóo nini̱ ikhiin ga̱jma̱a̱ eʼwíinʼ discípulos índo̱ niraʼníí xkujndu.

Tárígá “ga̱jma̱a̱ tsiakii ndrígúxu̱” (Hechos 3:11-26)

5. Ndiéjunʼ eʼsngúlú xóo Pedro niʼtáruʼun mbaʼin xa̱bu̱ rá.

⁵ A̱jmi̱i̱n apóstoles bugi̱ támiñún muthi náa inún mbaʼin xa̱bu̱, maski ajndu nduyáá dí ikhí ma̱ndoo makuwá bi̱ nithi dí Jesús majuiʼdumaa náa ixi̱ (Mar. 15:8-15; Hech. 3:13-15). Pedro támiñuu maʼthí dí ga̱jma̱a̱ mbiʼyuu Jesús niguma thanáá xa̱bu̱. Ikhaa tániñuuʼ raʼtáraʼa náa inún mbaʼin xa̱bu̱ ma̱ngaa nisngájma dí guáʼdáá aʼkhúún dí nikháñuu Jesús. Táʼthúu̱n rígi̱ numuu rí nakiʼnáa kaʼñún, niʼthún rígi̱ numuu rí ndiʼyoo dí ikhiin ‹tséyáá dí nini̱› (Hech. 3:17). Ikha jngóo niʼthún dí nindxu̱ún ‹a̱ngui̱i̱n› ga̱jma̱a̱ niʼthún ajngáa rí májánʼ ndrígóo Reino. Á mu natanga̱a̱ a̱jkiu̱ún ga̱jma̱a̱ naguáʼdáá fe náa Cristo, Jeobá má gáʼni̱i̱ a̱jkiu̱ún (Hech. 3:19). Mangáanʼ xámiñulúʼ muʼthúún mbájmbu xa̱bu̱ dí Dios inu má mandi̱ʼíín cuenta. Mú, ikháanʼ na̱nguá nindxu̱lú mbáa juez náa inún, ikha jngóo ikháanʼ ragíʼmaa muʼthúún ga̱jma̱a̱ ajngáa gujkhuʼ o mijkoo. Gu̱ʼni̱ xó má niʼni Pedro, guʼñún xóo a̱ngiu̱lú ga̱jma̱a̱ guʼthúún ajngáa rí májánʼ ndrígóo Reino.

6. Xú káʼnii nisngájma Pedro ga̱jma̱a̱ Juan dí ninindxu̱ún xa̱bu̱ guabiinʼ rá.

⁶ Apóstoles bugi̱ nindxu̱ún xa̱bu̱ guabiinʼ, na̱nguá nindúún mbiʼyamajkún ga̱jma̱a̱ numuu milagro dí nini̱. Ikha jngóo Pedro nirajxu̱u̱n: “Náá numuu rí nduyuxu̱ xóo asndu ikháanʼ ni̱nixu̱ maʼga kruígo̱o̱ xa̱bu̱ bugi̱ ga̱jma̱a̱ tsiakii ndrígúxu̱ o ga̱jma̱a̱ rí nduyamajkuííxu Dios rá.” (Hech. 3:12.) Pedro ga̱jma̱a̱ eʼwíinʼ apóstoles, niguánú ndiyáá dí xúgíʼ dí niʼngu̱u̱n nini̱ nindxu̱u̱ ga̱jma̱a̱ numuu tsiakii ndrígóo Dios, raʼkháa ga̱jma̱a̱ tsiakii ndrígu̱ún ikhiin. Niniña̱a̱nʼ dí maʼga gamajkhu náa Jeobá ga̱jma̱a̱ náa Jesús.

7, 8. a) Ndiéjunʼ ma̱ndoo muʼni ga̱jma̱a̱ numún xa̱bu̱ rá. b) Xú káʼnii xtáa rambánuu kiʼtáriyaʼ dí maguma májáanʼ xúgíʼ rá.

⁷ Dí mbiʼi xúgi̱, mangáanʼ ndayóoʼ manindxu̱lú xa̱bu̱ guabaaʼ índo̱ nuʼtáraʼa. Gajkhun má dí nánguá ekhánúlú espíritu santo mu mu̱ʼni̱ thanún xa̱bu̱. Mú rígá dí ma̱ndoo mu̱ʼni̱ ga̱jma̱a̱ numún, ikhaa nindxu̱u̱ dí mumbáñún muguáʼdáá fe náa Dios ga̱jma̱a̱ náa Cristo. Ma̱ngaa ma̱ndoo mu̱ʼni̱ xó má niʼni Pedro, dí mumbáñún matanga̱a̱ a̱jkiu̱ún ga̱jma̱a̱ má Jeobá maʼni̱i̱ a̱jkiu̱ún. Mámbá tsiguʼ mbaʼin xa̱bu̱ nundrigú ajngáa rígi̱ ga̱jma̱a̱ najngún iyááʼ mu mani̱ndxu̱ún xa̱bi̱i̱ Cristo.

⁸ Kuwáanʼ náa mbiʼi dí xtáa raguma mbánuu ‹xó má Dios niʼthún profetas bi̱ nikúwá nákha wájyúuʼ›, ga̱jma̱a̱ xó má niʼthí Pedro xtáa ‹raguma májáanʼ xúgíʼ›. Rígi̱ nigi̱ʼdu̱u̱ índo̱ Xa̱bu̱ Ñajunʼ ndrígóo Dios niʼtáñajunʼ mekhuíí nákha tsiguʼ 1914 (Hech. 3:21; Sal. 110:1-3; Dan. 4:16, 17). Nda̱wa̱á Jesús niʼni májáanʼ náa mbiʼyamajkuíí Anu̱u̱ xó má kaʼyoo náa tsu̱du̱u̱ ku̱ba̱ʼ. Asndu nákha ikhú mbaʼin wéñuuʼ xa̱bu̱ nigíʼdi̱i̱ niguwáʼ náa xuajñuu Dios. Niniña̱a̱nʼ runi̱ xúgíʼ dí ra̱májánʼ mu xúʼko̱ mugi̱ʼdi̱i̱ muni̱ “xó má Dios nandoo” (Efes. 4:22-24). Jeobá nixnúu tsiakii Pedro mu maʼni thanuu xa̱bu̱. Xúʼko̱ má xúgi̱ ma̱ngaa, xa̱bu̱ nuriʼkhumijná ga̱jma̱a̱ numuu espíritu santo ndrígóo Dios, raʼkháa ga̱jma̱a̱ tsiakii ndrígúlú. Xó má niʼni Pedro, nuʼnimíjna̱ majmulú májánʼ Biblia ga̱jma̱a̱ tsémíñulúʼ mu muʼsngúún xa̱bu̱. Xúgíʼ dí naʼngo̱o̱ nuʼnilú mu mumbáñún xa̱bu̱ mu mani̱ndxu̱ún xa̱bi̱i̱ Jesús, nindxu̱u̱ numuu tsiakii ndrígóo Jeobá, raʼkháa ga̱jma̱a̱ tsiakii ndrígulú ikháanʼ.

“Ikháanʼxu xándoo muniʼñááʼ ru̱ta̱” (Hechos 4:1-22)

9-11. a) Ndiéjunʼ nini̱ bi̱ ku̱ya̱ edxu̱u̱ náa judío índo̱ ndiyáá dí Pedro ga̱jma̱a̱ Juan kúwá rutaraʼa rá. b) Ndiéjunʼ nini̱ apóstoles rá.

⁹ Dí niʼthí Pedro ga̱jma̱a̱ xóo gagi nixtáa xa̱bu̱ bi̱ niguma thanáá, niʼni dí mbaʼin wéñuuʼ xa̱bu̱ niguáʼdiin nithi ga̱jma̱a̱ numuu dí nirígá. Ikha jngóo, bi̱ nayéjkha̱ edxu̱u̱ náa nañewu̱u̱n guʼwá náa nduyamajkuíí Dios gajmíi̱n mbá nguéjmi̱i̱n ndxajkun bi̱ kuya̱ edxu̱u̱ náa saduceos nigún gúyaa ndiéjuunʼ xtaa rarígá. Bi̱ saduceos guáʼdaa wéñuuʼ mbújkha̱a̱, tsiakii náa política ga̱jma̱a̱ numbayíí Roma, tsénimbu̱u̱n xtángoo dí guáʼdáá fariseos, i̱ndó nutsijma índo̱ eʼwíinʼ nuthi dí magabiín xa̱bu̱.c Ikha jngóo ra̱ʼkhá tháán nikiʼníin índo̱ ndiyáá dí Pedro ga̱jma̱a̱ Juan nusngáa dí Jesús nigabi̱i̱.

¹⁰ Ra̱ʼkhá tháán nikiʼníin dí asndu nixuda̱a̱ʼ náa guʼwá e̱jua̱nʼ Pedro ga̱jma̱a̱ Juan, i̱mba̱ néjtsuu nigún kudiin náa guʼwá ñajunʼ mba̱a̱ ndrígu̱ún judíos. Bi̱ nuyégún edxu̱u̱ ndiñún xóo “na̱nguá guáʼdáá numún ni má tágún mitsídánʼ escuela”. Ikha jngóo na̱nguá gíʼdoo numuu musngáa náa templo. Xa̱bu̱ ñajunʼ bi̱ ninimbaníí numún, niʼñúún tsiánguá índo̱ ndiyáá dí tsémiñún muthi ga̱jma̱a̱ nusngáa májánʼ. Náá numuu dí támiñún xá. Mbá numuu nindxu̱u̱ dí “nikúwá gajmiún Jesús” (Hech. 4:13). Ikhaa niʼsngúún xó má kaʼyoo raʼkháa xóo nuni̱ bi̱ nusngáa xtángoo (Mat. 7:28, 29).

¹¹ Xa̱bu̱ ñajunʼ nithúún apóstoles dí muniña̱a̱nʼ rutaraʼa. Nákha mbiʼi rúʼko̱, dí nunda̱ʼa̱ ikhiin, ndayóoʼ maguma tsiakii dí mambanúu. Ikhiin má nindxu̱ún bi̱ niʼthí dí makhañúu Jesús mbá nguáthá xmáná wapháá (Mat. 26:59-66). Maski ajndu xa̱bu̱ ñajunʼ bugi̱, guáʼdaa mbújkha̱a̱, najmañún ga̱jma̱a̱ guáʼdaa numún, Pedro ga̱jma̱a̱ Juan támiñún muthi náa inún mú ga̱jma̱a̱ gamajkhu: “Á mu rí májánʼ eya̱a̱la náa inuu Dios rí munimbuxu ku̱ya̱la ikháanʼ, raʼkháa náa Dios, ikháanʼ má gúya̱a̱la. Mú ikháanʼxu xándoo muniʼñááʼ ru̱ta̱ rí ndi̱ya̱a̱xu ga̱jma̱a̱ dí nidxáwinxu” (Hech. 4:19, 20).

12. Ndiéjunʼ gámbáyulú mu xámiñulu muʼtáraʼa má xúʼko̱ rá.

¹² Xú káʼnii ku̱ma̱ ikháán rá. Lá namíñaʼ índo̱ naratáraʼáá xa̱bu̱ bi̱ gíʼdoo, bi̱ nijuiʼsngáá májánʼ, bi̱ nambájxáaʼ ga̱jma̱a̱, bi̱ nakro̱ʼo̱o̱, bi̱ natiajunʼ ga̱jma̱a̱ o bi̱ xtañún ráʼ. Maski ajndu ikhiin nutsijmáán ga̱jma̱a̱ numuu dí natanimbaaʼ, xámiñaʼ. Índo̱ Jesús nixtáa náa tsu̱du̱u̱ ku̱ba̱ʼ niʼsngúún xa̱bi̱i̱ dí gíʼmaa muthi má xúʼko̱ ga̱jma̱a̱ numuu dí nunimbu̱ún, mú gíʼmaa muni̱ ga̱jma̱a̱ gamajkhu (Mat. 10:11-18). Nda̱wa̱á dí nigabi̱i̱ niʼthún dí ikhaa ‹maxtáa ga̱jma̱a̱ nindxu̱ún asndu índo̱ gártumuu mbiʼi› (Mat. 28:20). Dí mbiʼi xúgi̱ Jesucristo najmiuu “ñumbáá jmbii bi̱ májánʼ endxa̱ʼwáminaʼ” mu maʼsngulúʼ mu mumbáyúmíjná ga̱jma̱a̱ numuu dí nuʼnimbulú (Mat. 24:45-47; 1 Ped. 3:15). Mbá xkri̱da, najuíʼsngúlú náa reunión Xóo kúwi̱i̱n ga̱jma̱a̱ xóo Etaraʼa Cristianos ga̱jma̱a̱ náa i̱ʼwáʼ dí nagájnuu náa Biblia, xóo “Graxe̱ rí nuni̱ ga̱jma̱a̱ numuu Biblia” dí rígá náa jw.org. Á mu nuʼgíʼ edxu̱lúʼ náa xúgíʼ rígi̱, maʼni itháan gújkhúʼ fe ndrígulú ga̱jma̱a̱ xákawabáanʼ. Xó má nini̱ apóstoles, xúniʼñáánʼ dí nimbá marikhulú mu muʼthá má xúʼko̱ numuu xúgíʼ rí mitsaan dí nijmañulúʼ, dí ndiʼyáá ma̱ngaa dí niʼdxawíín.

“Mbá kambájxu̱u̱n nitajkáan náa Dios” (Hechos 4:23-31)

13, 14. Á mu naguma gínáán, ndiéjunʼ gíʼmaa mu̱ʼni̱ ga̱jma̱a̱ náa numuu rá.

¹³ Nda̱wa̱á rí niniñu̱u̱nʼ magúun, Pedro ga̱jma̱a̱ Juan mbá nacha̱ ndiwi̱ín gajmíi̱n eʼwíinʼ a̱ngui̱i̱n, mu mutajkáan mbá kambájxu̱u̱n náa Dios mu maxnún tsiakii mutaraʼa má xúʼko̱ (Hech. 4:24). Pedro ni̱jkha̱nú ndiʼyoo gajkhun dí á mu nandulú mu̱ʼni̱ dí Jeobá nandoo, xándoo gúʼni̱ i̱ndó ga̱jma̱a̱ tsiakii ndrígúlú. Numuu dí xmáná wapháá ikhaa nikumu̱u̱ kaʼyaminaʼ wéñuuʼ, índo̱ niʼthúunʼ Jesús: “Maski ajndu eʼwíinʼ muniña̱a̱nʼ, mú ¡ikhúúnʼ nditháan xániʼñáaʼ!”. Mú, nda̱wa̱á nirígá xó má niʼthí wapháá Jesús, Pedro nimíñuu ga̱jma̱a̱ niʼni gaʼduunʼ dí naniniiʼ maestriu̱u̱, bi̱ nambájxu̱u̱ ga̱jma̱a̱. Ikhaa nánguá ku̱mu̱u̱ kaʼyaminaʼ i̱ndó ikhaa, dí xúgi̱ naku̱mu̱u̱ kaʼyoo Jeobá (Mat. 26:33, 34, 69-75).

¹⁴ Raʼkháa i̱ndó ndayóoʼ muʼthá dí ni̱ndxu̱lú xa̱bi̱i̱ Cristo. Á mu bi̱ tsíñún gúyulú nuni̱ dí makáwabaaʼ fe ndrígulú ga̱jma̱a̱ dí muniʼñááʼ ruʼtáraʼa, májánʼ gáʼni̱ dí mbuʼyaridáá xkridoo Pedro ga̱jma̱a̱ Juan. Gunda̱ʼa̱a̱ Jeobá rí maxnúlú tsiakii ga̱jma̱a̱ gúmbáyúmíjná náa congregación ma̱ngaa guʼthúún bi̱ kuya̱ edxu̱u̱ ga̱jma̱a̱ eʼwíinʼ a̱ngiu̱lú dí kuwáánʼlú ruraʼníí. Xámbumulú dí índo̱ nutajkháan eʼwíinʼ ga̱jma̱a̱ numulú, rúʼko̱ gáxnulú itháan tsiakii (Efes. 6:18; Sant. 5:16).

15. Ndiéjunʼ gándoo gámbáyáaʼ á mu nitatsíñaaʼ raʼtáraʼa mbá miʼtsú rá.

¹⁵ Á mu mbá miʼtsú nitatsíñaaʼ raʼtáraʼa ga̱jma̱a̱ numuu dí eʼwíinʼ nitsudáanʼ, xákawabáanʼ. Garmáʼáan a̱jkia̱a̱nʼ dí asndu apóstoles niniñaaʼ rutaraʼa índo̱ nikháñuu Jesús, mú mbá nacha̱ má nitangiín nini mbu̱júu̱ʼ ñajunʼ rígi̱ (Mat. 26:56; 28:10, 16-20). Xágáwíinʼ a̱jkia̱a̱nʼ ga̱jma̱a̱ numuu dí nikiéʼkháanʼ nákha ginii. Itháan májánʼ dí matani̱ tsiakimínáʼ mu xátani ikháá má kayuuʼ ga̱jma̱a̱ʼ atambáñun eʼwíinʼ ga̱jma̱a̱ dí nitraʼníí ikháán.

16, 17. Ndiéjunʼ eʼsngúlú ga̱jma̱a̱ numuu dí nitajkháan xa̱bi̱i̱ Jesús náa Jerusalén rá.

¹⁶ Ndiéjunʼ gándoo gúnda̱ʼa̱a̱ Dios índo̱ xa̱bu̱ ñajunʼ nuni̱ gináanʼ rá. Xó má nini̱ xa̱bi̱i̱ Jesús, na̱nguá ninda̱ʼa̱a̱ Dios dí marígúu tsáʼkhá dí kúwá ruraʼníí. Ikhiin nirmáʼáan a̱jkiu̱ún dí Jesús niʼthí: “Á mu ikhiin nixkoʼ, mangáanʼ má muxkala” (Juan 15:20). Ikha jngóo i̱ndó nitháán Jeobá “atayáá xóo enimiñúxu” (Hech. 4:29). Niguánú nikru̱ʼu̱u̱n dí kúwá ruraʼníí nindxu̱u̱ mu mambanúu dí kiʼtáriyaʼ. Ndiyáá gajkhun dí mambanúu tsiakii dí nandoo Dios náa tsu̱du̱u̱ ku̱ba̱ʼ, xó má niʼtájkháan Jesús, tséʼñuu asndu ndiéjúúnʼ má gúni̱ xa̱bu̱ ñajunʼ (Mat. 6:9, 10).

¹⁷ Numuu dí nandún muni̱ xó má nandoo Jeobá, ikha jngóo nitháán: “Atani̱ rí xa̱bia̱a̱ʼ muthi má xúʼko̱ ajngá rawaanʼ ga̱jma̱a̱ rí xámiñún”. Mbá nacha̱ má nijuixtiʼñaa dí nitajkháan: “Náa nigimbíin niʼxma ga̱jma̱a̱ xúgíinʼ ikhiin nindrigú espíritu santo, ga̱jma̱a̱ nigíʼdi̱i̱ nitaraʼa ajngá rawuunʼ Dios rí asndu támiñúún” (Hech. 4:29-31). Nimbá xáʼngo̱o̱ marikhoo mu marigá dí nandoo Jeobá (Is. 55:11). Á mu nuʼtákáñíí, ikhaa maxnúlú tsiakii dí gáʼyulúʼ mu muʼtáraʼa má xúʼko̱ ajngá rawuunʼ, tséʼñuu má tsáa nindxu̱u̱ xa̱bu̱ sia̱nʼ ndrígulú o nguáthá mba̱a̱ tsáʼkhá gáʼkha̱ náa inulú.

“Tátani nduwiinʼ xa̱bu̱, Dios nitani̱ nduwaaʼ” (Hechos 4:32–5:11)

18. Xú káʼnii nimbayúmíjná a̱ngiu̱lú bi̱ nikúwá náa Jerusalén rá.

¹⁸ Congregación nuxi̱ʼ dí rígá náa Jerusalén tájyúuʼ niʼni mba̱a̱, nikúwá itháán dí 5,000 a̱ngiu̱lú.d Maski ajndu mixtiʼkhu xuajen náa eguwáʼ mu mbóó ‹nindxa̱ʼwa̱míjna̱ ga̱jma̱a̱ rí nakumu̱ún› (Hech. 4:32; 1 Cor. 1:10). Raʼkháa i̱ndó ninda̱ʼa̱a̱ Jeobá rí maʼni tsajkurámíinʼ, mangiin ninimi̱jna̱ mumbañún a̱ngiu̱ún mu mambájxuun gajmiún Jeobá ma̱ngaa nixnúún rí ndiñúnʼ a̱ngiu̱ún (1 Juan 3:16-18). Xúʼko̱ niʼni José, bi̱ apóstoles nuxna mbiʼíí Bernabé, ikhaa nigujua̱ mbayuuʼ ga̱jma̱a̱ nixnáá xúgííʼ mbújkha̱a̱, mu mambáñún a̱ngiu̱lú bi̱ naguwáʼ mitsínguánʼ mu ma̱ndoo maguanún náa Jerusalén ga̱jma̱a̱ maʼni gújkhúʼ fe ndrígu̱ún.

19. Náá numuu dí Jeobá nixiyáa Ananías ga̱jma̱a̱ Safira rá.

¹⁹ Mú mixtiʼkhu niʼni Ananías ga̱jma̱a̱ Safira índo̱ nigujua̱ mbaaʼ mu muxna mbújkha̱a̱ mu mi̱xtámbáñúún a̱ngiu̱lú. Nithi dí nixná xúgíʼ, mú ragájkhun, numuu dí ikhiin ‹niguanún ga̱jma̱a̱ tháan mbújkha̱a̱ ga̱jma̱a̱ na̱nguá nithúún nimbáa› (Hech. 5:2). Ikha jngóo Jeobá nigudíin. Raʼkháa ga̱jma̱a̱ numuu dí nixna chíʼgíiʼ mbújkha̱a̱, nindxu̱u̱ ga̱jma̱a̱ numuu dí ikhiin nininduwaʼ ma̱ngaa rí túxná ga̱jma̱a̱ xúgíʼ a̱jkiu̱ún. Ikhiin túni nduwiinʼ xa̱bu̱, nininduwaaʼ Dios (Hech. 5:4). Ninindxu̱ún xóo xa̱bu̱ bi̱ Jesús niʼthí ga̱jma̱a̱ numún, bi̱ a̱jma̱ inún, bi̱ i̱ndó nduyáʼ dí mbiʼyamajkhúún raʼkháa dí magruiguíin Dios (Mat. 6:1-3).

20. Xú káʼnii gíʼmaa muʼni ñajunʼ Jeobá rá.

²⁰ Dí mbiʼi xúgi̱ mangáanʼ numbáyíí dí majuiʼtáraʼa ajngáa rí májánʼ náa xúgíʼ numbaaʼ xó má nini̱ xa̱bi̱i̱ Jesús bi̱ nikúwá náa Jerusalén nákha siglo timbá. Índo̱ nuxná mbújkha̱a̱ ga̱jma̱a̱ najmulú tsiakii ndrígulú, nu̱ʼni̱ ga̱jma̱a̱ xúgíʼ a̱jkiu̱lú, numuu dí Jeobá tsénigu̱u̱ʼ dí mu̱ʼni̱ ga̱jma̱a̱ a̱jma̱ a̱jkiu̱lú o makumulú dí katsudáánʼ (2 Cor. 9:7). Garmáʼáan a̱jkiu̱lú dí Jeobá tseʼyoo nguáthá mbújkha̱a̱ exná, dí ikhaa ndaʼyoo nindxu̱u̱ á mu nuxná ga̱jma̱a̱ xúgíʼ a̱jkiu̱lú (Mar. 12:41-44). Índo̱ guʼtáraʼa xúʼyáʼ mundrígúlú gamajkhu o muguaʼdáá numulúʼ xó má nini̱ Ananías ga̱jma̱a̱ Safira. Guʼni ga̱jma̱a̱ numuu rí nandulú kuʼyáá Dios ma̱ngaa xa̱bu̱ numbaaʼ gajmiúlú, xó má niʼni Pedro, Juan ga̱jma̱a̱ Bernabé (Mat. 22:37-40).