NÍʼKHÓO 5

Tsáa niʼdxaun Diúu̱ nákha xóó tséxnúu Ruʼwambiiʼ rá.

Mbaʼin xa̱bu̱ nini dí ra̱májánʼ nákha nixtáa Noé (Génesis 6:5)

Ángeles nurtaximi̱jna̱ xóo xa̱bu̱ numbaaʼ mu mudiin gu̱ʼu̱

Adán ga̱jma̱a̱ Eva niwaʼdiin e̱jñún, ga̱jma̱a̱ nikuwa mbaʼin wéñuʼ xa̱bu̱ náa tsu̱du̱u̱ Ku̱ba̱ʼ. Tikhuun ángeles ninimbu̱ún náa Satanás.

Ikhiin niwájtaa náa tsu̱du̱u̱ Ku̱ba̱ʼ xóo xa̱bu̱ mu munigu̱nʼ gajmiún gu̱ʼu̱. Gu̱ʼu̱ niguáʼdiin e̱jñún bi̱ mixtiʼkun wéñuʼ ki xóo ikháanʼ: Ninindxu̱ún migújkuínʼ wéñuʼ ga̱jma̱a̱ na̱nguá egáwiinʼ a̱jkiún kuñún xa̱bu̱.

Nakujmaa mbáa a̱ʼgu̱ kayáa ada̱ mú bi̱ i̱mba̱a̱ ada̱ xtáa raxnúu; nefilim, e̱jñu̱ún ángeles bi̱ xkawi̱i̱nʼ, nuni̱ gíníin eʼwíinʼ

Mbaʼin xa̱bu̱ nigi̱ʼdi̱i̱ nini dí ra̱májánʼ wéñuʼ. Náa Biblia naʼthí rí ninindxu̱ún ra̱míjínʼ xa̱bu̱. Xúgíʼ rí nundxa̱ʼwa̱míjna̱ ga̱jma̱a̱ xúgíʼ rí e̱ni̱ ninindxu̱u̱ ra̱májánʼ wéñuʼ.

Noé niʼdxaun Diúu̱ ga̱jma̱a̱ niʼni mbá arca (Génesis 6:13, 14, 18, 19, 22)

Noé ninindxu̱u̱ mbáa xa̱bu̱ májánʼ. Jeobá niʼthúu̱n rí maʼni gámbíin xúgínʼ xa̱bu̱ bi̱ ra̱míjínʼ náa mbá ruʼwambiiʼ.

Noé gajmíi̱n bi̱ kúwá náa goʼwóo nuni̱ arca

Diúu̱ niʼthúu̱n rí maʼni mbá e̱jna̱ mba̱a̱ wéñuʼ, rí nagumbiʼyuu arca, ga̱jma̱a̱ ikhí gakudiinʼ xúgínʼ bi̱ kuwa náa goʼwóo ga̱jma̱a̱ mbaʼin xujkhúʼ.

Noé naʼthúún xa̱bu̱ dí maxnúu Ruʼwambiʼ, mú ikhiin káaʼ nundu̱ʼwa̱á

Noé niʼtáruʼun xa̱bu̱ rí na̱ʼkha̱ mbá Ruʼwambiiʼ, mú nimbáa na̱nguá niʼdxun. Tikhuun ninduʼwajmaa, ga̱jma̱a̱ eʼwíínʼ nikiʼníin kuyáá mbanda̱ʼkho.

Noé gajmíi̱n bi̱ kúwá náa goʼwóo nugimbúun xujkhúʼ mu matu̱ʼu̱u̱n náa arca

Índo̱ guámbóo niʼni arca, ikhú nikudiinʼ xujkhúʼ ikhí.