KÍXNUU 2
Ndíjkha rí nagumbiʼyaxo bi̱ nutaráʼa numuu Jeobá rá.
Noé
Abrahán ga̱jma̱a̱ Sara
Moisés
Jesucristo
Mbaʼin xa̱bu̱ nakumún rí ikháanʼxo bi̱ nutaráʼa numuu Jeobá ni̱ndxa̱xoʼ mbá religión nuxi̱ʼ. Mú niʼni má itháan rí 2,700 tsiguʼ, rí xabi̱i̱ Dios bi̱ gajkhun nagumbiʼñún xóo bi̱ nutaraʼa numuu ikhaa (Isaías 43:10-12). Nákha xóó tséʼni tsiguʼ 1931 nijmaʼniáanʼ xóo xa̱bu̱ bi̱ nunigajmaa̱ Biblia. Náa numuu nithaxo rí magumbiʼyaxo xóo bi̱ nutaraʼa numuu Jeobá rá.
Numuu rí nasngájma tsáa nindxu̱u̱ Dios ndrígáxo. Mbiʼyuu Dios, Jeobá, nakujmaa itháan rí 7,000 nuthu náa Biblia, xó má esngájma mbaʼa i̱yi̱i̱ʼ rí nigumarámáʼ nákha wajyúúʼ. Náa mbaʼa Biblia niriʼkuriyaʼ mbiʼyuu Jeobá ikhí nigumarámáʼ xóo Señor o Dios. Mú Dios bi̱ gajkhun niʼthúu̱n Moisés rí ikhaa mbiʼyuu Jeobá ga̱jma̱a̱ niʼthí: “Rígi̱ ñajunʼ mbiʼyuuʼ asndu kámuu mbiʼi” (Éxodo 3:15). Xúʼko̱ kaʼnii rí ikhaa niʼni mixtiʼkuii náa iʼwíínʼ dios bi̱ ragájkhun. Ikháanʼ nadxaxoʼ wéñuʼ rí muʼguá kuyaxo mbiʼyuu Dios rí ñajunʼ kaʼwu.
Numuu rí nasngájma rí nuʼni. Mugíʼdi̱i̱ ga̱jma̱a̱ Abel mbáa xa̱bu̱ jmbi, ra̱ʼkhá tháán mbaʼin xa̱bu̱ bi̱ niguwáʼ rutaraʼa ga̱jma̱a̱ numuu fe ndrígu̱ún rí guáʼdáá náa Jeobá. Índo̱ ninújngoo tsiguʼ, eʼwíínʼ, xóo Noé, Abrahán, Sara, Moisés ga̱jma̱a̱ David, niwi̱i̱n náa mbaʼin xa̱bu̱ bi̱ nutaraʼa (Hebreos 11:4–12:1). Xó má mbáa xa̱bu̱ nandoo naʼthí náa inún Xa̱bu̱ Ñajunʼ ga̱jma̱a̱ numuu imba̱a̱ xa̱bu̱ bi̱ nda̱a̱ rí niʼni, xúʼko̱ má mangáanʼxo nuta rí gajkhun rí nijmañaxoʼ ga̱jma̱a̱ numuu Dios.
Kúwáanʼxo ruyaridáá rí niʼni Jesús. Biblia naxná mbiʼyuu Jesús testigo “su jmbi ri su naʼtan rí ŋacun” (Rí huasjŋgajma Juan [Apocalipsis] 3:14). Jesús mínaʼ niʼthí: “Ikun niniloʼ ri muninuhuinʼ mbiʼyaʼ” ma̱ngaa ni̱ʼkha̱ gáʼthi rí ñajunʼ gajkhun ga̱jma̱a̱ numuu Dios (Juan 17:26; 18:37). Ikha jngó, bi̱ gajkhun ñajúnʼ discípulos ndrígóo ndayóoʼ musngajma rí kuya̱ mbiʼyuu Jeobá ga̱jma̱a̱ nuni rí majmaʼnuʼ mbiʼyuu. Ikhaa rúʼko̱ nindxu̱u̱ rí nuʼgíiʼ nunixo bi̱ nutaráʼaxo numuu Jeobá.
Náa numuu bi̱ nunigajmaa̱ Biblia niti rí magumbiʼñún xóo bi̱ nutaraʼa numuu Jeobá rá.
Nguátha mba̱yu̱ʼ eʼni rí Jeobá gíʼdiin bi̱ nutaraʼa numuu náa tsu̱du̱u̱ Ku̱ba̱ʼ rá.
Tsáa ninindxu̱u̱ testigo ndrígóo Jeobá bi̱ itháan májánʼ rá.