Xú káʼnii xtáa organizado ñajunʼ ndrígáxoʼ rí nawaʼtaraʼa rá.

Itháan tígo̱o̱ makhañúu Jesús índo̱ niʼthí rígi̱: “Jame miʼtaraʼa apa ajnga ri majan nuxiʼ numu ri naʼ-tañajun mba xuguinʼ xabo gentil, aʼkue ri mariguo” (Mateo 24:14). Xú káʼnii gándoo guʼtaraʼa náa xúgíʼ tsu̱du̱u̱ numbaaʼ rá. Índo̱ nuʼni xó má niʼni Jesús nákha nixtáa náa tsu̱du̱u̱ Ku̱ba̱ʼ (Lucas 8:1).

Na̱jkuá gúñu̱u̱nxo xa̱bu̱ náa guʼwún. Jesús niʼsngúún discípulos ndrígóo rí mutaraʼa náa mámbá guʼwá ajngáa rí májánʼ (Mateo 10:11-13; Hechos 5:42; 20:20). Timbíin discípulos bi̱ nikuwa nákha ikhú nijuixnún xuajin náa ma̱ndoo mutaraʼa (Mateo 10:5, 6; 2 Corintios 10:13). Xúʼko̱ má ñajunʼ rí nutaráʼaxo rí mbiʼi xúgi̱, ga̱jma̱a̱ mámbá congregación najuiʼthún náa minaʼ gutaraʼa. Xúʼko̱ ma̱ndoo munimbaníí xtángoo ndrígóo Jesús rí mutaruʼun xa̱bu̱ ga̱jma̱a̱ rí “mutaraʼa apaxo” (Hechos 10:42).

Nonexo mbá tsiakii mu mbuʼñíinʼxo xa̱bu̱ asndu náa má kuwa. Jesús ma̱ngaa nigíiʼ mbá xkri̱da índo̱ niʼtaraʼa náa kuwa mbaʼin xa̱bu̱, xó má náa rawunʼ lamáa o náa pozo dí rígá náa xuajen (Marcos 4:1; Juan 4:5-15). Xúʼko̱ má mangáanʼxo nutamíjná gajmiáxo xa̱bu̱ ga̱jma̱a̱ numuu Biblia asndu náa má nandoo: Náa kamba̱a̱, náa naxtango̱jo̱o̱, náa parque o náa teléfono. Ma̱ngaa nuthu̱u̱n rí enimbaxoʼ xa̱bu̱ bi̱ kúwi̱i̱n náa mijngii kuwáanʼxo, xa̱bu̱ bi̱ kuwa náa nuñajonʼxo, bi̱ nunigajmaa̱ náa guʼwá nisngáá ga̱jma̱a̱ xa̱bu̱ bi̱ kuñu̱u̱nxo. Xúgíʼ rígi̱ naʼni rí mbaʼin wéñuʼ xa̱bu̱ bi̱ kuwa náa xúgíʼ tsu̱du̱u̱ numbaaʼ mudxawíín ‹ajngáa rí májánʼ rí maʼni makáwíin› (Salmo 96:2).

Atatsaʼwáminaʼ ga̱jma̱a̱ numuu mbáa xa̱bu̱ bi̱ naniguaʼ maratha̱a̱n ajngáa rí májánʼ ndrígóo Reino ga̱jma̱a̱ ndiéjunʼ eyoo gáʼthi rí magruigú nda̱wa̱á. Xatiexíi índo̱ ikháánʼ ajngáa májánʼ rí nijmañaʼ. Atani rí xa̱bu̱ muniʼnúnʼ nacha̱ ajngáa rígi̱.

• Ndiéjunʼ ñajunʼ “ajnga ri majan” dí rígá mutaráʼaxo rá.

• Ikháanʼxo bi̱ nutaráʼa numuu Jeobá, xú káʼnii eyaridááxo xkri̱da ndrígóo Jesús índo̱ nutaráʼaxo rá.