Xú káʼnii gándoo muruguambá mu muñewa̱a̱n Guʼwá náa nagimbáanʼ rá.

Xúgíʼ Guʼwá náa nagimbáanʼxo bi̱ nutaráʼaxo numuu Jeobá gíʼdoo mbiʼyuu kaʼwu ndrígóo Dios, ikha jngó gíʼmaa muñewa̱a̱n mu maʼni kaʼwu ga̱jma̱a̱ makujmaa májánʼ, ga̱jma̱a̱ xúgiáanʼxo ma̱ndoo muñajunʼxo. Gíʼdoo wéñuʼ numuu rígi̱ numuu rí nuʼni mba̱a̱ Jeobá, ga̱jma̱a̱ xúgiáanʼ ma̱ndoo muʼni rígi̱.

Guxnaxímíjná muni kaʼwi̱i̱ índo̱ niguámbá nigimbáanʼ. Nda̱wa̱á rí niguámbá náa nigimbáanʼ, bi̱ kuwa náa congregación nuxnaximijna̱ muni kaʼwi̱i̱ ikhí; mbá miʼtsú rí mbá xmáná nuni kaʼwi̱i̱ mbá xúgíʼ kayuʼ. Mbáa bi̱ kayá edxu̱u̱ o mbáa siervo ministerial naʼthí xú káʼnii maguma ñajunʼ, nuni xó má na̱ʼkha̱ náa lista ñajunʼ rí gíʼmaa muni: Nugi̱xi̱i̱, nujñáa o nuni aspirar piso; nuxudíi ga̱jma̱a̱ nudriga̱a̱ májánʼ xílí; nujñáa baño; nuxudi̱i̱ ventana ga̱jma̱a̱ niwanʼ; nuxidíí náska, ma̱ngaa ndayóoʼ maguma kaʼwi̱i̱ mbajndi náa guʼwá nagimbáanʼ. Mámbá miʼtsú rí mbá tsiguʼ nagájnuu awan mu maguma kaʼwi̱i̱ xúgíʼ guʼwá. Rí mixnún ñajunʼ muni e̱ji̱n mambáñún mu maguaʼdáá gamajkún náa guʼwá rí nduyamajkuíí Jeobá (Eclesiastés 5:1).

Guruguambáá náa ndayóoʼ rí maguma̱a̱. Mámbá tsiguʼ a̱ngia̱xo nduyáá májánʼ awúun xó má rexa̱a̱ náa guʼwá nagimbáanʼ mu mbuyáá á mu rígá rí ndayóoʼ maguma̱a̱, nuni rígi̱ numuu rí nandún mbajyúuʼ xóó itháan guʼwá rígi̱ ga̱jma̱a̱ rí xúninumáá itháan mba̱a̱ mbújkha̱a̱ nda̱wa̱á (2 Crónicas 24:13; 34:10). Guʼwá náa nagimbáanʼ rí nakujmaa mikaʼwu ga̱jma̱a rí nakujmaa májánʼ nindxu̱u̱ náa ma̱ndoo mbuʼyamajkuíí májánʼ wéñuʼ Dios ndrígáxo. Á mu nuxnaxímíjná muʼni̱i̱ náa ndayóoʼ maguma kaʼwi̱i̱, musngajmá dí ra̱ʼkhá tháán gíʼdoo numuu náa ikháanʼlu guʼwá náa nagimbáanʼ ga̱jma̱a̱ musngajmá dí ra̱ʼkhá tháán eyaloʼ kuʼyáá Jeobá (Salmo 122:1). Ma̱ngaa rígi̱ naxná mbá xkri̱da májánʼ náa xuajin (2 Corintios 6:3).

• Náa numuu rí gíʼmaa muñewa̱a̱n guʼwá náa nduʼyamajkuíí Jeobá rá.

• Xú káʼnii eguma ñajunʼ mu marigá mikaʼwu náa Guʼwá nagimbáanʼ rá.