KÍXNUU 6

Ndiéjunʼ guáʼthi̱i̱n bi̱ nikháñun rá.

1. Ndiéjunʼ ñajunʼ ajngáa rí májánʼ dí rígá muʼdxawíín ga̱jma̱a̱ numún xa̱bu̱ bi̱ nikháñun rá.

Marta ga̱jma̱a̱ María nundriguíi ndxájún Lázaro

Índo̱ Jesús ni̱jkha̱nú náa Betania rí naguanúu mijngii náa Jerusalén, Lázaro bi̱ nambáxu̱u̱ májánʼ ga̱jma̱a̱ Jesús niʼni má a̱jkhu̱ mbiʼi rí nikháñu. Jesús ni̱jkha̱ náa iñáʼ rí nijnguáan mbo nikháñu, ma̱ngaa ni̱jkha̱ Marta ga̱jma̱a̱ María, a̱ngui̱i̱n xa̱bu̱ bi̱ nikháñu. Na̱cha, nigimbíin mbaʼin wéñuʼ xa̱bu̱. Lá nandoo natatsaʼwáminaʼ xú káʼnii nidxún wéñuʼ Marta ga̱jma̱a̱ María índo̱ ndiyáá rí Jesús niʼnigabi̱i̱ Lázaro ráʼ. Atraxnuu Juan 11:21-24, 38-44.

Marta ndiʼyoo má májánʼ ndiéjunʼ gúgiʼnii xa̱bu̱ bi̱ nikháñun. Ikhaa ndiʼyoo rí Jeobá maʼnigabi̱ín xa̱bu̱ bi̱ nikháñun mu makuwá mbu̱júu̱ náa Ku̱ba̱ʼ mitsaan. Atraxnuu Job 14:14, 15.

2. Ndiéjunʼ egiʼnii índo̱ nakháñun xa̱bu̱ rá.

Nákha nigumaa Adán, ga̱jma̱a̱ nda̱wa̱á índo̱ nikháñu — Dios niʼthúu̱n Adán: “Yujndaʼ ni̱ndxa̱ʼ ga̱jma̱a̱ yujndaʼ má gídxúʼ.” (GÉNESIS 3:19)

Xa̱bu̱ nigumiin ga̱jma̱a̱ yujndaʼ (Génesis 2:7; 3:19). Ikháanʼ na̱nguá nindxu̱lúʼ xóo ángeles. Ikha jngó nda̱a̱ nimbá espíritu rí nagájnuu náa ikháanʼ índo̱ nakhañulúʼ. Índo̱ nakhañulúʼ, nánguá endxaʼwamíjna numuu rí ngáñáʼ ndrígulúʼ nánguá eñajunʼ. Ikha jngó, Lázaro nda̱a̱ rí niʼthí ndiéjunʼ nigíʼnuu nda̱wa̱á rí nikháñu numuu rí xa̱bu̱ bi̱ nikháñun nánguá eya. Atraxnuu Eclesiastés 9:5, 6, 10.

Lá naʼni gíníín Dios ga̱jma̱a̱ aguʼ xa̱bu̱ nda̱wa̱á rí nikháñun ráʼ. Náa Biblia nasngájma rí xa̱bu̱ bi̱ nikháñun nánguá endxaʼwamíjna̱, infierno nindxu̱u̱ mbá kiʼsngáa dí ragájkhun rí naʼthí nduwaʼ ga̱jma̱a̱ numuu Dios. Jeobá tsíniguʼ nditháan kayuʼ rí xa̱bu̱ mundxaʼwamíjna̱ rí ikhaa naʼni gíníín náa aguʼ. Atraxnuu Jeremías 7:31.

3. Lá ma̱ndoo mutulú ikháanʼ xa̱bu̱ bi̱ nikháñun ráʼ.

Xa̱bu̱ bi̱ nikháñun nánguá ethi, nánguá edxawíín (Salmo 115:17). Mú tikhun ángeles nindxu̱ún ra̱míjínʼ wéñuʼ, ikhiin nandoo nutún xa̱bu̱, nuni asndu xóo xa̱bu̱ bi̱ nikháñun (2 Pedro 2:4). Jeobá tsíyoo gáʼyoo rí ikháanʼ muraxi náa xa̱bu̱ bi̱ nikháñun. Atraxnuu Deuteronomio 18:10, 11.

4. Tsíin gátangiín makuwá mbu̱júu̱ rá.

Mbáa xa̱bu bi̱ nituxi̱i̱ mu maxtáa mbu̱júu̱ náa Ku̱ba̱ʼ mitsaan najmañuu ga̱jma̱a̱ numuu Dios. Xa̱biya̱ bugi naʼsngúún eʼwíínʼ xa̱bu̱ bi̱ nituxi̱ín makuwa mbu̱júu̱.

Ra̱ʼkhá tháán mbaʼin wéñuʼ xabu̱ bi̱ nikháñun matangi̱i̱n makuwa mbu̱júu̱ náa tsu̱du̱u̱ Ku̱ba̱ʼ. Asndu tikhun bi̱ túniʼniiʼ Dios ga̱jma̱a̱ bi̱ nini dí ra̱májánʼ matuxiín. Atraxnuu Lucas 23:43 ga̱jma̱a̱ Hechos 24:15.

Bi̱ matuxi̱i̱n ma̱ndoo majmañún rí gajkhun ga̱jma̱a̱ numuu Dios ga̱jma̱a̱ maguaʼdáá fe náa Jesús á mu rí ikhiin nunimbu̱ún (Rí huasjŋgajma Juan 20:11-13). Xa̱bu̱ mbo gatangiín makuwá mbu̱júu̱ ga̱jma̱a̱ muni rí májánʼ, ma̱ndoo makuwíin tsímáá kámuu mbiʼi náa tsu̱du̱u̱ Ku̱ba̱ʼ. Atraxnuu Juan 5:28, 29.

5. Ndiéjunʼ eʼsngulúʼ ga̱jma̱a̱ numuu Jeobá índo̱ nduʼyáá rí magabiín xa̱bu̱ mbo nikháñun rá.

Jeobá niʼni rí ma̱ngoo matuxiín mbo nikháñun índo̱ nikuʼmaa A̱ʼdióo mu makhañúu ga̱jma̱á numulúʼ. Rí magabiín xa̱bu̱ nasngájma rí Jeobá nandoo kaʼyulúʼ wéñuʼ maski ajndu ikháanʼ na̱nguá kaʼyulúʼ. Índo̱ xa̱bu̱ bi̱ nikháñun gátangiín makuwá mbu̱júu̱, tsáa phú gaʼndaʼ ma̱ta̱ya̱a̱ rá. Atraxnuu Juan 3:16 ga̱jma̱a̱ Romanos 6:23.

Á mu nandaʼ ma̱ta̱ya̱a̱ itháan, atayáá rí eʼthí capítulo 6, 7, ga̱jma̱a̱ 10 náa libro Ndiéjunʼ phú eʼsngáa náa Biblia rá.