Náa numuu gíʼmaa majmañaaʼ má xúʼko̱ ga̱jma̱a̱ numuu Jeobá rá.

1. Xú káʼnii gambáyaaʼ rí matanigajmaa̱ má xúʼko̱ Biblia rá.

Rí niguámbaʼ nitraxnuu náa folleto rígi̱ nimbáyaʼ maʼnda̱ʼ xtayáá itháan Jeobá. Rígi̱ ñajunʼ rí phú gíʼdoo ma̱ta̱ya̱a̱ ginii rí naʼsngáa náa Biblia. Mámbá mbiʼi rí nanújngoo gíʼmaa maʼndulú kuʼyáá itháan Jeobá (1 Pedro 2:2). Ikháánʼ ma̱ndoo maraxtaa kámuu mbiʼi á mu naraxtaa mijngii náa Dios ga̱jma̱a̱ á mu natanigajmaa̱ Ajngá rawunʼ. Atraxnuu Juan 17:3 ga̱jma̱a̱ Judas 21.

Á mu na̱dxu̱ʼ ratatsiʼniiʼ itháan Dios, fe ndrígáʼ maʼne̱ itháan gujkhuʼ. Fe rúʼko̱ mambáyaʼ matane̱ rí enigu̱ʼ Jeobá (Hebreos 11:1, 6). Fe ndrígáʼ maʼne̱ rí mata̱nga̱a̱ a̱jkia̱nʼ matani rí májánʼ ga̱jma̱a̱ matriʼkuminaʼ mu xúʼko̱ ma̱ndoo maraxtaa májánʼ. Atraxnuu Hechos 3:19.

2. Xú káʼnii gándoo gátambáñun iʼwíínʼ xa̱bu̱ ga̱jma̱a̱ rí natayáá numuu Dios rá.

Ikháánʼ maʼnda̱ʼ marathu̱u̱n iʼwíínʼ rí nijmañaʼ, xúgiáanʼ nanigulúʼ muʼthá ajngáa dí májánʼ. Á mu ikháánʼ natatsigajmaa má xúʼko̱ Biblia, itháan gájma̱ñaaʼ majmaaʼ mu marathu̱u̱n iʼwíínʼ xa̱bu̱ ga̱jma̱a̱ fe rí xtaʼdáá náa Jeobá ga̱jma̱a̱ ajngáa rí májánʼ. Atraxnuu Romanos 10:13-15.

Mbaʼin wéñuʼ xa̱bu̱ nugi̱ʼdi̱i̱ nutún ajngáa rí májánʼ bi̱ nambáxu̱u̱n májánʼ gajmiún o xa̱bu̱ bi̱ kuñún. Araʼdáá gamajkuaʼ índo̱ gárathu̱u̱n xa̱bu̱, xárathu̱u̱n dí raʼkhí fe ndrígu̱ún, arathún rí ekudaminaʼ maʼni Dios ga̱jma̱á numulúʼ. Garmáʼáan a̱jkia̱nʼ dí xa̱bu̱ nudxawíín rí ikháánʼ naratá mu itháan nuyaxi á mu ikháánʼ natani rí májánʼ. Atraxnuu 2 Timoteo 2:24, 25.

3. Xú káʼnii gándoo ikháánʼ manindxa̱ʼ xa̱bi̱i̱ Jeobá rá.

Dí muʼnigajmaa Ajngá rawunʼ Dios mambáyuluʼ maʼndulú kuʼyáá itháan. Ikháánʼ nda̱wa̱á ma̱ndoo manindxa̱ʼ xa̱bi̱i̱ Jeobá ga̱jma̱a̱ manindxa̱ʼ xóo A̱ʼdióo. Atraxnuu 2 Corintios 6:18.

4. Xú káʼnii gándoo gájmañaaʼ itháan ga̱jma̱a̱ numuu Jeobá rá.

Xátatsiʼñáanʼ ratanigajmaa Ajngá rawunʼ Dios (Hebreos 5:13, 14). Atanda̱ʼa̱a̱ mbáa bi̱ naʼtaraʼa numuu Jeobá mú maʼsngááʼ ga̱jma̱a̱ numuu Biblia ga̱jma̱a̱ libro Ndiéjunʼ phú eʼsngáa náa Biblia rá. Á mu najmañaʼ itháan numuu Ajngá rawunʼ Dios, maraxtaa itháan májánʼ. Atraxnuu Salmo 1:1-3 ga̱jma̱a̱ 73:27, 28.

Ajngáa rí májánʼ na̱ʼkha̱ náa Jeobá Dios bi̱ xtáa gagi. Ikháánʼ ma̱ndoo mi̱dxu̱ʼnú itháan mijngii náa Dios á mu nataxuʼmaminaʼ náa xa̱bi̱i̱ ikhaa (Hebreos 10:24, 25). Á mu tsetatsiñaʼ ratani rí naniguʼ Jeobá, natagíiʼ mataxkamaa dí maraxtaa kámuu mbiʼi. Rí mi̱dxu̱ʼnú mijngii náa Dios ñajunʼ dí phú itháan májánʼ rí ma̱ndoo matane̱. Atraxnuu 1 Timoteo 1:11 ga̱jma̱a̱ 6:19.