David gakhi̱i̱ a̱jkiu̱u̱n

Ndiéjunʼ tani ikháánʼ índo̱ namíñaʼ rá... Mbáa mata̱nda̱ʼa̱a̱ ana̱ʼ ga̱jma̱a̱ ru̱dáʼ rí mambáyaʼ. Mú xtáa imba̱a̱ bi̱ ma̱ndoo mambáyaʼ. Ikhaa itháan mixkujiʼ ki xóo imba̱a̱ xa̱bu̱. Lá natayáá tsáa nindxu̱u̱ xáʼ... Xúʼko̱, ikhaa Jeobá. Ma̱ndoo mata̱nda̱ʼa̱a̱ ikhaa mambáyaʼ má xúʼko̱. Rúʼko̱ niʼni David. Ikhaa ninindxu̱u̱ mbáa dxámá bi̱ ra̱ʼkhá tháán gakhi̱i̱ a̱jkiu̱u̱n numuu rí niku̱mu̱u̱ kaʼyoo Jeobá. Xúgíʼ rí niʼni na̱ʼkha̱ raʼthí náa Biblia.

Asndu nákha chíʼgíʼ David, anu̱u̱ ga̱jma̱a̱ ru̱dúu̱ nisngáá xóo ma̱ndoo kaʼyoo Jeobá. Ikha jngó ikhaa támiñuu maski ajndu ikhaa nigíʼnuu mbaʼa rí migamíi wéñuʼ. Ikhaa ndaʼyoo má rí Jeobá gámbáyúu numuu rí nambáxu̱u̱ ga̱jma̱a̱. Mbá miʼtsú, índo̱ David xtáa rañe̱wu̱u̱n mu̱giu̱u̱, ¡ni̱ʼkha̱ mbáa león ga̱jma̱a̱ ni̱jkha̱ kayáa mbáa mu̱giu̱u̱! Lá natayáá ndiéjunʼ niʼni David ráʼ. Ni̱jkha̱ raxkoo león, mbáa nixíyáa ga̱jma̱a̱ ñawúunʼ. Ga̱jma̱a̱ índo̱ oso nindoo gíkhu̱u̱n mu̱giu̱u̱, nixíyáa ma̱ngaa. Tsáa nimbáyúu David mu maʼni gakhi̱i̱ a̱jkiu̱u̱n rá... Gajkhun má, ikhaa Jeobá.

Mbuʼyáá imbo̱o̱ miʼtsú índo̱ támiñuu David. Ikhú nákha kuwa ragiʼdu̱u̱n xa̱bu̱ israelita gajmiún xa̱bu̱ filisteo. Mbáa soldado filisteo nigumbiʼyuu Goliat ikhaa nindxu̱u̱ mbáa xa̱bu̱ bi̱ mba̱yi̱ʼ wéñuʼ, ra̱ʼkhá tháán mba̱yi̱ʼ. Goliat ninduʼwájmiin soldado israelita ga̱jma̱a̱ ninduʼwájmaa Jeobá. Niʼthún soldado: “¡Tsáa tsímiñuu ma̱ʼkha̱ maxmínaʼ gajmuʼ!”. Mú xúgínʼ nimiñun kuyáá ga̱jma̱a̱ nimbáa tsíyoo gáʼga gaxmínaʼ ga̱jma̱a̱. Índo̱ David niʼdxuun rí niʼthí Goliat, ikhú niʼthí: “¡Ikhúúnʼ maxmínaʼ ga̱jma̱ʼ! ¡Jeobá gambáyuʼ mu maʼngoʼ!”. Lá gájkhun rí David támiñuu ráʼ... Xúʼko̱, ra̱ʼkhá tháán gakhi̱i̱ a̱jkiu̱u̱n. Ndiéjunʼ nirígá nda̱wa̱á rá.

David niguxi witsu itsí rí nujndu ga̱jma̱a̱ ndiyáá xkarajtsi, ikhú nigájnuu mu maʼga̱ gaxmínaʼ ga̱jma̱a̱ xa̱bu̱ bi̱ mba̱yi̱ʼ wéñuʼ. Índo̱ Goliat ndiʼyoo rí David nindxu̱u̱ mbáa dxámá, ninduʼwájmaa. Ikhú David niʼthúu̱n: “Ikháánʼ nadxa̱ʼ náa ikhúúnʼ ga̱jma̱a̱ mbá chídí rí a̱jma̱ rawunʼ, ¡mu ikhúúnʼ na̱jkhá náa ikháánʼ ga̱jma̱a̱ nambiʼyuu Jeobá!”. Ikhú David, nigáyúu ni̱jkha̱ náa wíji̱ xa̱bu̱ bi̱ mba̱yi̱ʼ wéñuʼ. Nda̱wa̱á nirajkuáa itsí náa xkarajtsi ikhú nidoʼ. Itsí rúʼko̱ nijkuáa phú náa xkídoo, ¡ikhú Goliat nigu̱mbri̱ga̱a̱, nikháñu! Índo̱ filisteo ndiyáá rí nirígá nimiñun wéñuʼ ikhú ningujuíin ragáñun. ¡Mbáa dxámá xóo David niʼngo̱o̱ nixíyáa Goliat xa̱bu̱ bi̱ mba̱yi̱ʼ wéñuʼ! Náa numuu rí niʼngo̱o̱ nixíyáa ku̱ma̱ʼ ikháánʼ rá... Numuu rí Jeobá nimbáyúu, ¡ga̱jma̱a̱ ikhaa itháan mixkujiʼ ki xóo mbáa xa̱bu̱ bi̱ mba̱yi̱ʼ wéñuʼ!

Ndiéjunʼ eʼsngúlúʼ rí nigíʼnuu David rá... Rí Jeobá gíʼdoo itháan tsiakii ki xóo eʼwíínʼ xa̱bu̱. Ikha jngó, á mu nguáná naku̱ma̱ʼ rí namíñaʼ, garmáʼáan a̱jkia̱nʼ rígi̱: Jeobá nindxu̱u̱ bi̱ nambáxa̱ʼ ga̱jma̱ʼ ma̱ngaa ikhaa gámbáyaʼ mu maʼni gakhi̱i̱ a̱jkia̱nʼ.