KÍXNUU 8
Josías niraʼwíin májánʼ bi̱ nimbáxu̱u̱ gajmíi̱n
Lá naku̱ma̱ʼ ikháánʼ dí ra̱mingíjyúuʼ matani dí nandoo Jeobá ráʼ... Mbaʼin xa̱bu̱ naku̱mu̱ún dí gakhi̱i̱ wéñuʼ. Mú náa Biblia naʼsngáa dí na̱nguá má gakhi̱i̱. Ikhí na̱ʼkha̱ raʼtulúʼ ga̱jma̱a̱ numuu Josías, mbáa dxámá bi̱ nigíminaʼ wéñuʼ maʼni ñajunʼ Jeobá. Mbóo dí nimbáyúu nindxu̱u̱ dí niraʼwíin májánʼ bi̱ nimbáxu̱u̱ gajmíi̱n. Gajmañulú itháan ga̱jma̱a̱ numuu Josías ma̱ngaa bi̱nimbáxu̱u̱ májánʼ gajmíi̱n.
Anu̱u̱ Josías nigumbiʼyuu Amón ma̱ngaa niʼtáñajunʼ náa Judá. Amón ninindxu̱u̱ mbáa xa̱bu̱ bi̱ ra̱májánʼ ma̱ngaa ndiʼyamajkhún dios bi̱ ragájkhun. Índo̱ nikháñu Amón, Josías ninindxu̱u̱ rey náa Judá. Lá natayáá nguáthá tsiguʼ Josías índo̱ nigíiʼ xóo rey xáʼ. ¡Kaʼníí gíʼdoo migiñuʼ tsiguʼ! Lá niʼni dí ra̱májánʼ ma̱ngaa xó má anu̱u̱ xáʼ... Na̱nguá, táʼni xúʼko̱.
Sofonías niʼthún xa̱bu̱ dí raʼkhí mbuyamajkún dios bi̱ ragájkhun
Asndu nákha chíʼgíʼ, Josías nindoo maʼni ñajunʼ Jeobá. Ikha jngó niraʼwíin májánʼ bi̱ mambáxu̱u̱ gajmíi̱n. Niraʼwíin bi̱ nandún kuyáá Dios, ikhiin nimbayíí mú maʼnimbo̱o̱ kaʼyoo Jeobá. Tsíin lá ninindxu̱ún bi̱ nimbáxu̱u̱ gajmíi̱n Josías rá.
Mbáa dí ikhaa ninindxu̱u̱ gaʼyee Sofonías. Ikhaa kaʼyoo maʼthúún ajngáa rígi̱ xa̱bu̱ bi̱ nikúwi̱i̱n náa xuajen Judá: “Xí nduyamajkhún má xúʼko̱ dios bi̱ ragájkhun, nditháan xákuwáanʼlá májánʼ”. Ndiéjunʼ niʼni Josías rá. Lá niʼnimbo̱o̱ dí niʼthí gaʼyee xá. ¡Xúʼko̱! niʼnimbo̱o̱. Ikha jngó, ndiʼyamajkuu má xúʼko̱ Jeobá, raʼkháa dios bi̱ ragájkhun.
Jeremías nindxu̱u̱ imba̱a̱ bi̱ nimbáxu̱u̱ ga̱jma̱a̱ Josías. Ikhiin mbríguu má wáa tsiguúnʼ, nákhi xóó jiáma ñajúnʼ, mijngii kayuʼ nikúwi̱i̱n. Jeremías ga̱jma̱a̱ Josías nimbayimíjná mu muni ñajunʼ Jeobá. Ra̱ʼkhá tháán májánʼ nimbáxu̱u̱n ikha jngó índo̱ nikháñu Josías, Jeremías niʼni mbóo ajmúú náa niʼthí dí xtáa gíná wéñuʼ.
Jeremías ga̱jma̱a̱ Josías nimbayimíjná mu muni ñajunʼ Jeobá
Lá ragájkhun dí ma̱ndoo majmañulúʼ wéñuʼ ga̱jma̱a̱ numuu xkri̱da ndrígóo Josías ráʼ... Asndu nákhi chíʼgíʼ ikhaa nindoo maʼnimbo̱o̱ kaʼyoo Dios. Mu ma̱ndoo maʼni xúʼko̱, ikhaa ndiyóoʼ maraʼwíin bi̱ nandún kuyáá Jeobá mú mambaxúu gajmíi̱n. Lá nandaʼ matani ñajunʼ Jeobá mangáán ráʼ. A mu xúʼko̱, gíʼdoo numuu mataʼñíinʼ bi̱ nandún kuyáá ikhaa mú mambaxáʼ gajmiáanʼ.