Jesús niʼnimbo̱o̱ má xúʼko̱

Lá ra̱mingíjyúuʼ dí muʼnimbulúʼ kuʼyáá anu̱lú ga̱jma̱a̱ ru̱dúlú ráʼ... Nguáná má mingíjyúuʼ, lá ragájkhun ráʼ. Mú, lá natayáá rí gambayaaʼ matatsimbaaʼ rí gúthi xáʼ. Rí ma̱ta̱ya̱a̱ xkri̱da ndrígóo Jesús. Lá natayáá rí ikhaa niʼnimbo̱o̱ má xúʼko̱ náa Jeobá ga̱jma̱a̱ náa anu̱u̱ xúʼko̱ má náa ru̱dúu̱ xáʼ... Majmañulúʼ xóó itháan ga̱jma̱a̱ numuu Jesús.

Nákha xóó tséʼkha̱ náa tsu̱du̱u̱ Ku̱ba̱ʼ, Jesús nixtáa mekhuíí ga̱jma̱a̱ Anu̱u̱, Jeobá. Mú índo̱ nixtáa náa tsu̱du̱u̱ Ku̱ba̱ʼ, Jesús nigiʼdaa anu̱u̱ ga̱jma̱a̱ ru̱dúu̱. Ikhiin nigumbiʼñún José ga̱jma̱a̱ María. Lá manigua̱ʼ ma̱ta̱ya̱a̱ xóo ni̱jkha̱nú nini̱ndxu̱u̱ a̱ʼdiún Jesús xáʼ...

Mu ma̱ndoo maxtáa Jesús náa tsu̱du̱u̱ Ku̱ba̱ʼ, Jeobá niʼni mbóo milagro. Niʼni rí Jesús, bi̱ xtáa mekhuíí, magiwa̱nʼ náa awúu̱n María. Mbá mijna gu̱wa̱ʼ gu̱nʼ, Jesús ndi̱ja̱a̱ náa awúu̱n ru̱dúu̱, xó má xúgínʼ e̱ji̱n, nda̱wa̱á nigumaa. Xúʼko̱ María nigiʼdaa mbáa cháñaʼ. Ikhaa ga̱jma̱a̱ ajmbio̱o̱, José, ninimba̱ja̱a̱ Jesús.

Índo̱ raʼkhún gíʼdoo gu̱wa̱ʼ i̱jma̱ tsiguʼ, Jesús niʼni mbóo rí nisngájma dí nandoo kaʼyoo Anu̱u̱ bi̱ xtáa mekhuíí, Jeobá. Rígi̱ nirígá índo̱ Jesús gajmíi̱n a̱ngui̱i̱n nigún náa xuajin Jerusalén rí mitsínguánʼ wéñuʼ. Nigún ikhí mu muxnáá gamajkhu Jeobá. Índo̱ naguwáanʼ má náa guʼwún, José ga̱jma̱a̱ María ndiyáá rí Jesús na̱nguá eʼkha̱ gajmíi̱n. ¡Na̱nguá kujma̱a̱! Ndiéjunʼ lá niʼni José ga̱jma̱a̱ María ku̱ma̱ʼ ikháánʼ rá...

Ikhiin nitangi̱i̱n nacha̱ wéñuʼ náa xuajen Jerusalén mu mbuyáaʼ Jesús. Ajtsú mbiʼi ndiyáaʼ xúgíʼ ikhí. ¡Ra̱ʼkhá tháán exmiéjúnʼ! Asndu ndiʼkhún nixkamaa. Lá natayáá náa xtáa xáʼ... Xtáa náa templo. Náa numuu xtáa ikhí xá. Numuu rí ikhí ma̱ndoo majmañuu mbaʼa ga̱jma̱a̱ numuu Jeobá. Jesús nandoo kaʼyoo anu̱u̱ ga̱jma̱a̱ nindoo maʼni rí maʼniuu maxtáa tsímáá. Índo̱ Jesús ndi̱ja̱a̱, niʼnimbo̱o̱ má xúʼko̱ kaʼyoo Jeobá. Ikhaa niʼnimbo̱o̱ má xúʼko̱, maski ajndu nguáná niʼniuu miʼskhaa numuu dí nikuwa xa̱bu̱ bi̱ nini̱i̱ dí raʼkhí wéñuʼ. Lá naku̱ma̱ʼ ikháánʼ rí niʼnimbo̱o̱ Jesús kaʼyoo José ga̱jma̱a̱ María ráʼ... Náa Biblia naʼthí dí niʼnimbo̱o̱.

Lá nitayáá rí Jesús niʼnimbo̱o̱ má xúʼko̱ ráʼ... Rúʼko̱ naʼsngúlúʼ mbóo rí gíʼdoo wéñuʼ numuu: Maski ajndu nguáná mingíjyúuʼ, gíʼmaa matatsimbaaʼ xtayáá ana̱ʼ ga̱jma̱a̱ ru̱dáʼ. Lá matatsimbaaʼ ikháánʼ ráʼ...