GRAXE̱ 1

Tsáa phú ni̱ndxu̱ʼ rá.

NDÍJKHA GÍʼDOO NUMUU

Rí ma̱ta̱ya̱a̱ tsáa ñajuanʼ ga̱jma̱a̱ dí gíʼdoo numuu tayáá ikháánʼ mambáyaʼ matraʼwíí rí matani índo̱ xtaa náa gaʼkho.

NDIÉJUNʼ GÁTANI IKHÁÁNʼ RÁ.

Atatsaʼwáminaʼ rígi̱: Karen xtáa má gu̱wa̱ʼ minutos náa mbá ndxa̱a̱ ga̱jma̱a̱, nda̱a̱ tsu̱ma̱, naninuʼ mbá aʼwá:

“Ndiéjunʼ tani mbáwiin aʼkue̱ rá.”

Índo̱ natamáʼáan nayexi, ndaʼyoo Jessica bi̱ nambáxu̱u̱ ga̱jma̱a̱, rí na̱ʼkha̱ kagu̱u̱ a̱jma̱ cerveza. Naxnúu mbóo ga̱jma̱a̱ naʼthúu̱n: “Nánguá ni̱ndxa̱ʼ mbáa ada̱. Lá xándoo maraxtaa gagi mbégu̱ʼ ráʼ.”

Karen tsíyoo gágáan cerveza numuu rí kaʼnííʼ lájuíin, mú tsíyoo maku̱mu̱u̱ rí bi̱ nambáxu̱u̱ ga̱jma̱a̱ tséʼni gagiminaʼ nditháan. Ma̱ngaa, Jessica májánʼ a̱jkiu̱u̱n. Á mu ikhaa naʼga̱a̱n, xánindxu̱u̱ ra̱májánʼ wéñuʼ. “Ikhaa nandxa̱ʼwáminaʼ rí i̱ndó nindxu̱u̱ mbá cerveza. Raʼkháa rí xóo matatsikha drogas”.

Á mu ikháánʼ ni̱ndxa̱ʼ Karen, ndiéjunʼ gátani rá.

ATATSAʼWÁMINAʼ MBÉGUʼ

Mu majmañaaʼ matraʼwíí matani rí májánʼ xóo náa xkujndu rígi̱, ndayóoʼ ma̱ta̱ya̱a̱ tsáa ni̱ndxa̱ʼ. Nindxu̱u̱ mbá ku̱ma̱ dí naʼtháanʼ tsáa ni̱ndxa̱ʼ ga̱jma̱a̱ rí gíʼdoo numuu tayáá ikháánʼ. Rí ma̱ta̱ya̱a̱ májánʼ rígi̱ mañe̱wa̱nʼ ga̱jma̱a̱ maxnáʼ tsiakii mu ma̱ta̱ya̱a̱ xú káʼnii gáraxtaa ki xóo matatsiʼñáminaʼ matani xóo eñún eʼwíínʼ (1 Corintios 9:26, 27).

Xú káʼnii gándoo makánaʼ tsiakii rúʼko̱ rá. Mu ma̱ta̱ya̱a̱, mbuʼyáá graxe̱ rígi̱.

1 NDIÉJUNʼ RÍ NAJMAÑUʼ NANI RÁ.

Á mu najmañaʼ natayáá májánʼ xú káʼnii ni̱ndxa̱ʼ ga̱jma̱a̱ rí najmañaʼ natani, ma̱ta̱ya̱a̱ ndiéjunʼ rí maʼngaaʼ matani.

XKRI̱DA NDRÍGÓO BIBLIA. Apóstol Pablo niʼnirámáʼ: “Maski ajndu tséjmuu gáthá májánʼ, mu gúʼdoo ku̱ma̱” (2 Corintios 11:6). Numuu rí naninuʼ májánʼ Escrituras, niwi̱ji̱ gujkhuʼ índo̱ nitanumáá. Tániñuʼ rí ajngáa rí xámbáyuu maʼni rí mamiñúu (2 Corintios 10:10; 11:5).

ATAYÁÁ XÓO NI̱NDXA̱ʼ: Ataniraʼmáʼ mbá rí najmañaʼ natani.

Rí xúgi̱ ataniraʼmáʼ mbá rí xú káʼnii ni̱ndxa̱ʼ (mbá xkri̱da, á mu májánʼ a̱jkia̱nʼ, naraxná rí xtaʼdáá, ni̱ndxa̱ʼ jmbii o puntual).

2 NDIÉJUNʼ RÍ NAKIÉʼKÚUNʼ

Xó má mbá cadena nuthu náa kayá tsúwáʼ, ikháánʼ ma̱ndoo matanimbáti̱ga̱ rí xóo xa̱bu̱ ni̱ndxa̱ʼ, xóo muʼthá, mambumaʼ tsáa ni̱ndxa̱ʼ á mu natatsiñaminaʼ maʼga̱ kañán rí nakiéʼkáanʼ.

XKRI̱DA NDRÍGÓO BIBLIA. Pablo ndiʼyoo ndiéjunʼ rí nani makiéʼkúun. Ikha jngó niʼnirámáʼ: “A̱jkiu̱nʼ ra̱ʼkhá tháán eniguʼ xtángoo ndrígóo Dios, mu náa xuyuʼ nda̱yo̱o̱ imbo̱ʼ xtángoo rí naxmínaʼ ga̱jma̱a̱ xtángoo dí rígá náa edxu̱ʼ ma̱ngaa na̱jkha̱ kañún náa xtángoo ndrígóo aʼkhá dí rígá náa xuyuʼ” (Romanos 7:22, 23).

ATAYÁÁ XÓO NI̱NDXA̱ʼ: Ndiéjunʼ rí naʼni makiéʼkáanʼ ndayóoʼ matriʼkuíí rá.

3 NDIÉJUNʼ EYÓOʼ MANI

Lá matsimaʼ náa taxi ga̱jma̱a̱ matanda̱ʼa̱a̱ chofer rí maxnúu mbaʼa xngaa náa xuajen asndu índo̱ mambóo gasolina ráʼ. Lá ragájkhun dí rúʼko̱ ragíʼdoo numuu ráʼ. Ga̱jma̱a̱ makiéʼkáanʼ mba̱a̱ wéñuʼ mbújkha̱a̱.

Ndiéjunʼ eʼsngáa rígi̱ rá. Á mu natayáá rí matani, xáraxna̱a̱ mbaʼa xngaa dí ragíʼdoo numuu. Natayáá náa edxu̱ʼ ga̱jma̱a̱ xú káʼnii mi̱dxu̱ʼnú.

XKRI̱DA NDRÍGÓO BIBLIA. Pablo niʼnirámáʼ: “Rí xóo xtáá ragayúʼ gíʼdoo numuu” (1 Corintios 9:26). Pablo táʼga mbaaʼ maʼgáá, tágiʼthu̱u̱n rí ma̱ʼkha̱nú náa ikhaa rí májánʼ, ikhaa ndiyáaʼ rí maʼni ga̱jma̱a̱ nigíminaʼ maʼnimbánuu (Filipenses 3:12-14).

ATAYÁÁ XÓO NI̱NDXA̱ʼ: Gi̱jyooʼ gátaniraʼmáʼ ajtsú enii rí manigua̱ʼ matani tsiguʼ rí na̱ʼkha̱.

4 NDIÉJUNʼ RÍ ENIMBOOʼ

Mbá ixi̱ rí mi̱jnu̱ʼ ni̱jkha̱ ajmu̱u̱ naʼngo̱o̱ naraʼnuu giñánʼ rí gakhi̱i̱ — Á mu natayáá májánʼ tsáa ni̱ndxa̱ʼ, manindxa̱ʼ xóo mbá ixi̱ rí ni̱jkha̱ mi̱jnu̱ʼ ajmu̱u̱ rí naʼngo̱o̱ nawi̱ji̱ índo̱ naxnúu giñán mbiiʼ.

Á mu tsítayáá májánʼ rí etanimbaʼ, manindxa̱ʼ mbáa xa̱bu̱ bi̱ tseʼyoo rí eyoo maʼni. Matriʼkuminaʼ nángi eʼni mu manindxa̱ʼ xóo bi̱ nambáxa̱ʼ gajmiáanʼ, xóo má eʼni camaleón dí nariʼkhuu color ndrígóo mu ma̱ndoo maxtáa májánʼ náa xtáa. Bi̱ naʼni xúʼko̱ káʼnii, tseʼyoo tsáa nindxu̱u̱.

Mú a mu ni̱ndxa̱ʼ jmbii náa rí natanimbaaʼ, maski ajndu eʼwíínʼ muni dí rakáʼyoo, ikháánʼ xátriʼkhuminaʼ.

XKRI̱DA NDRÍGÓO BIBLIA. Mbáa Daniel nindxu̱u̱ mbáa dxámá índo̱ niriyaaʼ náa goʼwóo. Maski ajndu xúʼko̱, ikhaa “nigíwanʼ náa a̱jkiu̱u̱n” maʼnimbo̱o̱ xtángoo ndrígóo Dios (Daniel 1:8). Ikhaa táʼndoo mariʼkuminaʼ ga̱jma̱a̱ niʼni rí jmbu má xúʼko̱.

ATAYÁÁ XÓO NI̱NDXA̱ʼ: Ndiéjunʼ etanimbaʼ rá. Mbá xkri̱da: Lá natanimbaaʼ náa Dios ráʼ. Náa numuu rá. Ndiéjunʼ niʼni matanimbaaʼ rí ikhaa xtáa xá.

Lá naku̱ma̱ʼ rí xtángoo ndrígóo Dios mambáyaʼ ráʼ. Náa numuu rá.

Mú, ndiéjunʼ eyaʼ manindxa̱ʼ ikháánʼ, mbá iná rí na̱jkha̱ kayóo giñánʼ o mbá ixi̱ rí nawi̱ji̱ má xúʼko̱ maski ajndu naxnúu wéñuʼ giñánʼ ráʼ. Á mu nandaʼ manindxa̱ʼ xóo ixi̱, ataniminaʼ ma̱ta̱ya̱a̱ tsáa phú ni̱ndxa̱ʼ. Rúʼko̱ gambayaaʼ matriʼña̱a̱ graxe̱ rígi̱: Tsáa phú ni̱ndxu̱ʼ rá.