Ndíjkha rí naxmiéjunʼ wéñuʼ rí xóo ekujmún rá.

NDIÉJUNʼ GÁTANI IKHÁÁNʼ RÁ.

Atatsaʼwáminaʼ rígi̱: Índo̱ Julia nayeximinaʼ náa niwanʼ, ndaʼyoo rí mba̱a̱ wéñuʼ. Ikhaa nandxa̱ʼwáminaʼ: “Ndayóoʼ maʼni smídúún”. Maski ajndu anu̱u̱, ru̱dúu̱ ga̱jma̱a̱ bi̱ nambáxu̱u̱ gajmíi̱n nutháán rí smídíi xóo mbá xkuiya.

Julia nandxa̱ʼwáminaʼ rí maʼniminaʼ magajta̱a̱ “i̱ndó” tikhu kilos. I̱ndó ndayóoʼ rí xákuiʼtsu nguáthá mbiʼi...

Á mu ikháánʼ naku̱ma̱ʼ xóo Julia, ndiéjunʼ gátani rá.

ATATSAʼWÁMINAʼ MBÉGU̱ʼ

Na̱nguá nindxu̱u̱ ra̱májánʼ rí maxmiéjuanʼ ga̱jma̱a̱ rí xóo kaʼníín. Asndu náa Biblia naʼthí ga̱jma̱a̱ numún tikhun xa̱bekha ma̱ngaa gu̱ʼu̱ bi̱ mitsiʼñíin wéñuʼ xóo Sara, Raquel, José, David ga̱jma̱a̱ Abigail. Mbá xkri̱da, mbáa a̱ʼgu̱ bi̱ nigumbiʼyuu Abisag najuiʼthá dí “ra̱ʼkhá tháán mitsiʼyáa” (1 Reyes 1:4).

Mú mbaʼin jiáma ga̱jma̱a̱ wa̱ʼxa̱ʼ naxmiéjunʼ wéñuʼ rí xóo ekujmiin. Rígi̱ ma̱ndoo maʼni rí maguaʼdáá wéñuʼ xkujndu. Atatsaʼwáminaʼ rígi̱:

• Náa mbá estudio, nikujmaa rí 58% wa̱ʼxa̱ʼ nithi rí mbaʼwu̱u̱n wéñuʼ, mú káaʼ i̱ndó 17% mbaʼwu̱u̱n wéñuʼ.

• I̱mba̱ estudio rí nigumiin gu̱ʼu̱ bi̱ smídíin wéñuʼ nisngájma rí 45% nikumu̱ún rí ikhiin mbaʼwu̱u̱n wéñuʼ.

• Tikhun jiáma ga̱jma̱a̱ wa̱ʼxa̱ʼ bi̱ naxná gamiéjunʼ mu maʼni̱i̱ smídíin, niguáʼnu niguáʼdáá anorexia. Rígi̱ nindxu̱u̱ mbá nandii rí migamíi makhañáaʼ rí naʼni matatsiʼñáaʼ ratsiʼtsu.

Á mu naku̱ma̱ʼ rí ikháánʼ xtaʼdáá anorexia o imbo̱o̱ nandii ga̱jma̱a̱ numuu ganitsu, atanda̱ʼa̱ rí mumbayááʼ. Arathún ana̱ʼ o imba̱a̱ xa̱bu̱ bi̱ nambáxa̱ʼ ga̱jma̱ʼ. Náa Biblia naʼthí: “Mbáa bi̱ gajkhun nambáxa̱ʼ ga̱jma̱ʼ ma̱ndoo kaʼyaʼ xúgíʼ mbiʼi, ga̱jma̱a̱ nindxu̱u̱ xóo mbáa ndxájuaʼ bi̱ nigumaa mu mambáyaʼ índo̱ narígá gamiéjunʼ” (Proverbios 17:17).

RÍ ITHÁAN MÁJÁNʼ MATANI

Rí itháan naʼni mitsiʼñáanʼ rí xóo nindxu̱u̱ a̱jkiu̱lú. Atayáá rí naʼthí náa Biblia ga̱jma̱a̱ numuu Absalón, A̱ʼdióo rey David:

“Náa xúgíʼ Israel, nda̱wa̱a̱ imba̱a̱ bi̱ niguma mba̱a̱ wéñuʼ xóo Absalón bi̱ mitsiʼyáa wéñuʼ. Nda̱a̱ nimbá dí raʼkhí náa inuu rajkúu asndu náa edxu̱u̱” (2 Samuel 14:25).

Mú ninindxu̱u̱ mbáa dxámá bi̱ naʼnimbamínaʼ wéñuʼ, ra̱ʼkhá tháán eyoo magiʼdoo ga̱jma̱a̱ naʼninduwaʼ. Ikha jngó náa Biblia tséʼthi rí májánʼ ga̱jma̱a̱ numuu; ikhí naʼthí rí ikhaa ninindxu̱u̱ mbáa xa̱biya̱ bi̱ tatiyuʼ, bi̱ táwi̱ji̱ jmbu ga̱jma̱a̱ nawiyuʼ kaʼñún xa̱bu̱ ma̱ngaa nagudíin.

Ikha jngó náa Biblia naʼthúlúʼ:

“Guriʼkumijná rí xú káʼnii nindxala” (Colosenses 3:10).

“Xátatsiʼñáʼ rí xóo etanirataminaʼ makujmaa rí mbájniin, xóo rí mataxtígúu edxa̱ʼ [...], gíʼmaa mani̱ndxu̱u̱ mbáa xa̱bu̱ bi̱ xóo mijngo̱ʼo̱o̱ a̱jkiu̱u̱n” (1 Pedro 3:3, 4).

Na̱nguá nindxu̱u̱ ra̱májánʼ rí maʼnda̱ʼ makujmáán májánʼ, mú itháan gíʼdoo numuu manindxa̱ʼ májáánʼ xa̱bu̱. Nda̱wa̱á xa̱bu̱ mbuyáá xú káʼnii ni̱ndxa̱ʼ raʼkháa xóo ku̱jmáán rí mbájniin. Mbáa wáxá bi̱ nagumbiʼyuu Phylicia naʼthí: “Á mu mitsiʼñán rí mbájnii, mbá nacha̱ guyaxaʼ, mú rí maʼni marmáʼáan a̱jkiu̱ún ku̱ya̱ʼ nindxu̱u̱ rí xú kaʼníín rí a̱jkia̱nʼ, rí xóo xa̱bu̱ ni̱ndxa̱ʼ”.

ATIEXIMINAʼ

Lá tsínigua̱ʼ xóo kaʼníín ráʼ.

Lá nitatsaʼwáminaʼ mbá miʼtsú matani mbá operación dí cirugía estética o matatsiʼñáaʼ ratatsiʼtsu mu matriʼkhu̱u̱ mbá rí tsínigua̱ʼ ráʼ.

Ndiéjunʼ gatriʼkhu̱u̱ rí xóo kujmáán rá. (Atruguamaʼa.)

• RÍ MBAÑINʼ

• RÍ MIKIWI̱I̱N

• XTÁSIANʼ

• XÓO KUJMÁÁN

• INAʼ

• CHÁʼWANʼ

Á mu nitruguamáʼa “Xúʼko̱” náa a̱jma̱ graxe̱ ga̱jma̱a̱ náa graxe̱ ragajtsú nitruguamaʼa mbá ajtsú o itháan, atatsaʼwáminaʼ rígi̱: Mbáa eʼwíínʼ tseyaʼ ra̱májánʼ xóo etayaminaʼ ikháánʼ. Garmáʼáan a̱jkia̱nʼ dí ra̱mingíjyúuʼ maxmiéjuanʼ wéñuʼ xtayaminaʼ rí xóo ku̱jmáán (1 Samuel 16:7).