Abrahán ga̱jma̱a̱ Sara nunimbu̱u̱n kuyáá Dios

Mijngii má náa Babel rígá imbo̱o̱ xuajen rí nigumbiʼyuu Ur. Ikhí xa̱bu̱ na̱nguá eyamajkuíí Jeobá, nduyamajkhún mbaʼin dioses. Mú nixtáa mbáa xa̱bu̱ náa Ur bi̱ ndiʼyamajkuu Jeobá, ikhaa nigumbiʼyuu Abrahán.

Jeobá niʼthúu̱n Abrahán: “Atatsíñaʼ guʼwáaʼ ga̱jma̱a̱ bi̱ xtañún, ga̱jma̱a̱ ayuʼ náa ku̱ba̱ʼ dí ikhúúnʼ masngajmáʼ”. Nda̱wa̱á Dios niʼthúu̱n: “Ikháánʼ manindxa̱ʼ mbá xuajen mba̱a̱. Ga̱jma̱a̱ numaʼ ikháánʼ, maxnu̱u̱n dí májánʼ mbá xúgínʼ xa̱bu̱ bi̱ kuwa náa xúgíʼ tsu̱du̱u̱ ku̱ba̱ʼ”.

Abrahán tseʼyoo náa minaʼ eyoo Jeobá maʼga̱, mú naku̱mu̱u̱ kaʼyoo ikhaa. Abrahán; a̱ʼgiu̱u̱ bi̱ mbiʼyuu, Sara; ga̱jma̱a̱ anu̱u̱ bi̱ mbiʼyuu, Taré, ma̱ngaa Lot bi̱ nindxu̱u̱ dríxio̱o̱ ninimbu̱ún kuyáá Dios. Niniratáá dí muda̱ gágun ga̱jma̱a̱ nigi̱ʼdi̱i̱ nigún.

Abrahán nigiʼdoo 75 tsiguuʼ índo̱ ikhaa gajmíi̱n bi̱ kuwa náa goʼwóo niguánu náa ku̱ba̱ʼ dí Jeobá niʼthúu̱n masngájmuu. Ikhí nigumbiʼyuu Canaán. Ikhí Jeobá niʼthúu̱n: “Xúgíʼ ku̱ba̱ʼ dí natayáá, maxnu̱u̱n e̱jña̱ʼ”. Mú Abrahán ga̱jma̱a̱ Sara ni̱ndxu̱ún xa̱bu̱ wanuu ga̱jma̱a̱ na̱nguá guáʼdiin e̱ji̱n. Ikha jngó, xú káʼnii gáʼnimbánuu Jeobá rí nikudaminaʼ rá.