Moisés naraʼwíí mbaʼyamajkuu Jeobá

Nákha xóó kúwi̱i̱n náa Egipto, xa̱bu̱ bi̱ niguwáʼ náa goʼwóo Jacob nigumbiʼñún israelitas. Nda̱wa̱á rí Jacob ga̱jma̱a̱ José nikháñun, imba̱a̱ nuxi̱ʼ faraón nigíʼdu̱u̱ niʼtáñajunʼ. Faraón nimíñuu numuu dí israelitas niguáʼdáá itháan tsiakii ki xóo egipcios. Ikha jngó niʼni dí mani̱ndxu̱ún ñumbáá. Niʼniún tsiakii muni ladrillos ga̱jma̱a̱ muñajunʼ gakhi̱i̱ náa xaná. Maski ajndu egipcios niniu̱u̱n itháan xkawiʼ mámbá mbiʼi, israelitas naʼni itháan mbaʼin. Numuu rí faraón tsénigu̱u̱ʼ rígi̱, niʼthí rí muradíin xúgínʼ e̱ji̱n israelitas bi̱ ndiʼkhún nigumiin, mú na̱nguá bi̱ ni̱ndxu̱ún wa̱ʼxa̱ʼ. Lá natatsaʼwáminaʼ xú káʼnii nimiñun israelitas ráʼ.

Mbáa a̱ʼgú israelita bi̱ nigumbiʼyuu Jokébed nigiʼdaa mbáa ada̱ tsiʼyáa. Mu nda̱a̱ rí gágíʼnuu, nigíwanʼ náa mbá canasta rí nirkaʼwu náa xaná dí rígá náa mañu Nilo. Míriam, ndxájuu ada̱ bugi̱, niguanúu mijngii mu mbaʼyoo ndiéjunʼ gárígá.

A̱ʼdióo faraón ni̱jkha̱ náa mañu gúwan ga̱jma̱a̱ ndiʼyoo canasta. Awúu̱n kuaʼwa̱a̱n mbáa ada̱ rambiyaʼ ga̱jma̱a̱ nigáwiinʼ a̱jkiu̱u̱n kaʼyoo. Míriam niraxu̱u̱: “Lá nandaʼ rí maʼgá gáyáaʼ mbáa a̱ʼgu̱ mu maxnúu maʼxúu ada̱ ráʼ”. Ikhaa niʼthí rí ma̱ndoo, ga̱jma̱a̱ Míriam ni̱jkha̱ gáyáaʼ ru̱dúu̱. Wáxioo faraón niʼthúu̱n Jokébed: “Ayuʼ jcháa ada̱ bugi̱, atie̱wa̱a̱n ga̱jma̱a̱ ikhúúnʼ gáni numaaʼ nda̱wa̱á”.

Índo̱ ada̱ nikhi̱i̱, Jokébed ni̱jkha̱ kayáa náa guáxioo faraón. Ikhaa nixná mbiʼyuu Moisés ga̱jma̱a̱ niʼni makhi̱i̱ xó má a̱ʼdióo. Moisés ni̱jkha̱ ragaja̱a̱ xó mbáa príncipe ga̱jma̱a̱ nigoo magiʼdoo xúgíʼ dí nindoo. Mú na̱nguá nimbumuu kaʼyoo Jeobá. Moisés ndiʼyoo dí ikhaa nindxu̱u̱ mbáa israelita, raʼkháa mbáa egipcio, ga̱jma̱a̱ niraʼwíí maʼni ñajunʼ Jeobá.

Índo̱ nigiʼdoo 40 tsiguʼ, Moisés nimbáñun xa̱bu̱ xuajñu. Mbóo mbiʼi, ndiʼyoo rí mbáa egipcio naxnúu mbáa ñumbáá israelita. Índo̱ ndiʼyoo rúʼko̱, Moisés nixnúu egipcio gakhi̱i̱ wéñuʼ rí asndu nixíyáa, ga̱jma̱a̱ nirkaʼwii náa jui̱ʼi̱. Índo̱ faraón nidxawun, nindoo maxíyáa Moisés, mú ikhaa nigáyúu ni̱jkha̱ náa Madián. Ikhí Jeobá niña̱wu̱u̱n.