Mbáa xtángidiʼ bi̱ naʼthí

Bi̱ israelitas kuwa má mbá 40 tsiguʼ náa ku̱ba̱ʼ mixooʼ. Mbaʼa xuajin mba̱ʼu̱ má nini gámbáa. Xúgi̱ rá. Kuwa náa xkua̱ ndrígóo xuajin Moab, xígií náa nagájnuu a̱jkha̱ʼ náa mañu Jordán, ga̱jma̱a̱ imbá chíʼgíʼ ndayóoʼ matu̱ʼu̱u̱n náa Ku̱ba̱ʼ rí nijuiʼthá makhánun. Balac, xa̱bu̱ ñajunʼ ndrígóo Moab, nimiñuu rí israelitas mundrígú ku̱ba̱ʼ ndrígóo. Ikha jngó nindo̱ʼo̱o̱ mbáa xa̱bu̱ bi̱ mbiʼyuu Balaam rí maʼgá náa Moab, mu maʼtá tsrigun xa̱bu̱ israelitas, o rí maguáʼniin mbá dí ra̱májánʼ.

Mú Jeobá niʼthúu̱n Balaam: “Ragíʼmaa maratha dí ra̱májánʼ ga̱jma̱a̱ numún xa̱bu̱ israelitas”. Ikha jngó Balaam na̱nguá nindoo gáʼga náa Moab. Xa̱bu̱ Ñajunʼ Balac nindo̱ʼo̱o̱ mbu̱júu̱ ga̱jma̱a̱ niʼthúu̱n rí maxnúu asndu ndiéjunʼ má eyoo, mú Balaam mbu̱júu̱ na̱nguá nindoo. Ikhú Dios niʼthúu̱n: “Ma̱ndoo mi̱dxu̱ʼ. I̱ndó ma̱ndoo maratha rí ikhúúnʼ gáthanʼ”.

Balaam ni̱jkha̱ ga̱jma̱a̱ xtángidiʼ ndrígóo náa Moab. Rí phú nindoo maʼtá tsrigun israelitas, maski ajndu Jeobá niʼthúu̱n rí maxaʼni. Ikhú ángel ndrígio̱o̱ Jeobá nikujmaa náa kamba̱a̱ ajtsú nuthu. Balaam na̱nguá eʼyoo ángel, mú xtángidiʼ ndaʼyoo. Ginii, xtángidiʼ nigájnuu náa kamba̱a̱ ga̱jma̱a̱ nito̱ʼo̱o̱ náa xaná. Nda̱wa̱á, xtángidiʼ nikuʼmaminaʼ náa mbá xtátsí ikhú nigawúnʼ rajkúu Balaam. Rí nda̱wa̱á kayuʼ, xtángidiʼ nibo̱ʼ tapha kamba̱a̱. Xúgíʼ mbiʼi rúʼko̱, Balaam nixnúu xtángidiʼ ndrígio̱o̱ ga̱jma̱a̱ mbá ixi̱.

Nda̱wa̱á, Jeobá niʼni dí xtángidiʼ maʼthí. Xtángidiʼ niraxuʼ Balaam: “Náa numuu eraxnúʼ rá”. Balaam niriʼña̱a̱: “Numuu rí natani makujmúún xóo mbáa xa̱bu̱ skágunʼ. Á mu ka̱ya̱ mbá espada, maxíña̱a̱n”. Xtángidiʼ niʼthí: “Nidruwan tsu̱du̱ʼ mba̱yu̱ʼ tsiguʼ. Lá niniaʼ mbá miʼtsú xúʼko̱ kaʼnii ráʼ.”

Ikhú, Jeobá niniñuʼ rí Balaam mbaʼyoo ángel. Ángel niʼthúu̱n: “Jeobá niʼtháanʼ má rí xádxúʼ gárata striguii xa̱bu̱ Israel”. Balaam niriʼña̱a̱: “Nini dí raʼkhí. Matangu̱ún maʼgáaʼ goʼwóoʼ”. Mu ángel niriʼña̱a̱: “Ma̱ndoo mi̱dxu̱ʼ Moab, marata̱ i̱ndó rí Dios gáʼtháanʼ”.

Naku̱ma̱ʼ rí Balaam niʼnimbo̱o̱ ráʼ. Na̱nguá, numuu rí nda̱wa̱á ikhaa nigíʼ niʼthá striguíin ajtsú nuthu xa̱bu̱ Israel. Dí ajtsú nuthu rígi̱ Jeobá niʼni rí maguma tsajkurámíínʼ israelitas. Nda̱wa̱á, bi̱ israelitas nini gámbáa xuajin Moab, ikhú Balaam nikháñu. Itháan májánʼ niʼni á mu Balaam niʼnimbo̱o̱ kaʼyoo Jeobá nákhi ginii, lá ragájkhun ráʼ.