Josué gajmíi̱n xa̱bu̱ gabaonitas

Eʼwáʼ xuajen Canaán nidxawíín dí nigíʼnuu Jericó. Rey bi̱ kuwa náa xuajen rúʼko̱ niruwamijná mu muxmijná gajmiún israelitas. Mú xa̱bu̱ xuajen Gabaón i̱mba̱ dí nindxa̱ʼwa̱míjna̱. Nigíʼ xtíin dí wayuu, nigún gúyáá Josué ga̱jma̱a̱ nitháán: “Nagúwaʼxu náa mbá xuajen mitsínguánʼ. Nidxáwinxu numuu Jeobá ga̱jma̱a̱ xúgíʼ rí niʼni ga̱jma̱a̱ numala náa Egipto ga̱jma̱a̱ náa Moab. Á mu nuta rí xúni̱ gámbáa xuajñuxu, mani̱ndxu̱xuʼ ñumbáá ndrígála”.

Josué niʼnimbo̱o̱ kaʼñún ga̱jma̱a̱ niʼthún dí xágudíin. Mú ajtsú mbiʼi nda̱wa̱á, Josué ni̱jkha̱nú ndiʼyoo rí gabaonitas ragájkhun rí naguwáʼ mitsínguánʼ, ni̱ndxu̱ún xa̱bu̱ Canaán. Ikha jngó, Josué niraxu̱u̱n: “Náa numuu nini nduwáanʼxu rá.” Ikhiin niriʼña̱a̱: “Numuu rí nimíñuxuʼ. Ndu̱ya̱a̱xu rí Jeobá Dios ndrígála naxmínaʼ ga̱jma̱á numala. Mbá péñu, xúradiáanʼxu”. Josué niʼnimbánuu ajngóo ga̱jma̱a̱ nda̱a̱ rí niʼniún.

Nguáthá mbiʼi nda̱wa̱á, witsuun reyes cananeos gajmiún soldados ndrígu̱ún nigún guxmijná gajmiún xa̱bu̱ gabaonitas. Josué gajmíi̱n soldados ndrígóo nigún kañiʼ mbruʼun mu mumbañún gabaonitas. Nigíʼdi̱i̱ nixmijná miʼcha̱ rí imbo̱o̱ mbiʼi. Xa̱bu̱ cananeos nigi̱ʼdi̱i̱ nigañún, mú Jeobá niʼni rí majngutígú eʼtsí mba̱ʼu̱ asndu náa má egún. Ikhú Josué nindo̱ʼo̱o̱ Jeobá dí mawiji̱ a̱jkha̱ʼ. Nákha ginii nimbá miʼtsú táwi̱ji̱ a̱jkha̱ʼ. Náa numuu rí Josué ninda̱ʼa̱ rúʼko̱ rá. Numuu rí phú nikumu̱u̱ kaʼyoo Jeobá. Ikha jngó a̱jkha̱ʼ na̱nguá nirmáʼáan. Mbiʼi rúʼko̱ takína asndu índo̱ rí israelitas niradíin xúgínʼ reyes cananeos ga̱jma̱a̱ soldado ndrígu̱ún.