Rí nikudaminaʼ maʼni Jefté

Israelitas nimbumún kuyáá Jeobá mbu̱júu̱ ga̱jma̱a̱ nigi̱ʼdi̱i̱ ndiyamajkhún dios bi̱ ragájkhun. Mú dios bi̱ ragájkhun na̱nguá niñewu̱u̱n índo̱ xa̱bu̱ Ammón niguwáʼ guxmijná gajmiún. Xa̱bu̱ buʼko̱ nimíniiʼ wéñuʼ mba̱yu̱ʼ tsiguʼ. Nda̱wa̱á nitháán Jeobá: “Nikiéʼkuxu. Mbá péñu, atani káwáanʼxu náa xa̱bu̱ bi̱ guáʼdáanʼxu sia̱nʼ”. Israelitas nini gámbáa xándú ga̱jma̱a̱ ndiyamajkuíí mbu̱júu̱ Jeobá. Ikhú ikhaa nigáwiinʼ a̱jkiu̱u̱n rí xa̱bu̱ numíniiʼ wéñuʼ.

Ikha jngó israelitas niraʼwíí mbáa bi̱ najmañuu naxmínaʼ bi̱ nagumbiʼyuu Jefté. Ikhaa mani̱ndxu̱u̱ xa̱bu̱ ede̱ náa guerra rí muni gajmiún ammonitas. Jefté niʼthúu̱n Jeobá: “Á mu natambáyuxu maʼnguxu náa guxmijnáxu, nakuʼdáminaʼ rí maxniaʼ timbáa bi̱ gagájnuu náa goʼwóoʼ garaʼnuʼ índo̱ ikhúúnʼ gátangaán”. Jeobá niʼdxuun rí niʼtájkáan Jefté ga̱jma̱a̱ nimbáyúu maʼngo̱o̱ náa maxmínaʼ.

Índo̱ Jefté niguta̱nga̱a̱ goʼwóo, timbáa bi̱ nigájnuu gáraʼnuu ninindxu̱u̱ wáxioo. Nigájnuu raʼsianʼ ga̱jma̱a̱ naʼdu̱u̱ pandereta. Rí xúgi̱ ndiéjunʼ gáʼni Jefté rá. Nirmáʼáan a̱jkiu̱u̱n rí nikudaminaʼ ga̱jma̱a̱ niʼthí: “¡Ay, wáxioʼ ni̱ndxa̱ʼ! Nagawúunʼ wéñuʼ. Rígá rí nikuʼdáminaʼ náa Jeobá, mu manimbánuu gíʼmaa makuʼmán ikháánʼ mu matiajunʼ náa tabernáculo dí rígá náa Siló”. A̱ʼdióo niriʼña̱a̱: “Papá, á mu rígá rí nitaxúdaminaʼ náa Jeobá gíʼdoo rí matanimbaníí. I̱ndó na̱nda̱ʼa̱ʼ rí matatsiʼñúnʼ maʼgá a̱jma̱ igu̱nʼ náa kúbá gajmíi̱nʼ bi̱ nambáxuʼ. Nda̱wa̱á maʼgá náa tabernáculo”. Wáxioo Jefté ninindxu̱u̱ jmbii ga̱jma̱a̱ niñajunʼ náa tabernáculo xúgíʼ mbiʼi rí nixtáa. Ga̱jma̱a̱ bi̱ nambáxu̱u̱ gajmíi̱n nagún gúyáá náa Siló.