Jeobá naxnúu tsiakii Sansón

Mbaʼin israelitas nitangi̱ín ndiyamajkhún xándú. Ikha jngó Jeobá niniñuʼ rí xa̱bu̱ Filistea mutañajunʼ náa xúgíʼ xuajen Israel. Mú nikuwa tikhun israelitas bi̱ nindúún kuyáá Jeobá, xóo Manóah. Ikhaa ga̱jma̱a̱ a̱ʼgiu̱u̱ na̱nguá gíʼdiin e̱ji̱n. Mbóo mbiʼi, Jeobá nikuʼmaa mbáa ángel mu maʼthúu̱n a̱ʼgiu̱u̱ Manóah: “Maraʼdaa mbáa ada̱ bi̱ maʼni káwíin israelitas náa xa̱bu̱ filisteos. Mani̱ndxu̱u̱ mbáa nazareo”. Lá natayáá tsíin ni̱ndxu̱ún nazareos ráʼ. Ninindxu̱ún xa̱bu̱ bi̱ nini ñajunʼ Jeobá kiejunʼ wéñuʼ ga̱jma̱a̱ na̱nguá niniñu̱nʼ murujtu xtátsu edxu̱ún.

Nda̱wa̱á, nixtáa a̱ʼdióo Manóah, ga̱jma̱a̱ nixna mbiʼí Sansón. Índo̱ nigaja̱a̱, Jeobá nixnúu wéñuʼ tsiakii. ¡Maʼngo̱o̱ maxíyáa mbáa león i̱ndó ga̱jma̱a̱ ñawúunʼ! Mbóo mbiʼi mbáwíi nigudíin mbá 30 filisteos. Ikha jngó filisteos niguiñunʼ kuyáá ga̱jma̱a̱ nindúún mbuyáá xú káʼnii muxiyáa. Mbóo mbruʼun, índo̱ Sansón xtáa raʼgu náa Gaza. Ikhú xa̱bu̱ sia̱nʼ nigún náa xkrugua ga̱jma̱a̱ niguaʼti̱i̱n ikhí mu muxiyáa índo̱ gájtsi. Mú tikhu mbruʼun, Sansón nigixi̱i̱, ni̱jkha̱ náa xkrugua ndrígóo xuajen ga̱jma̱a̱ niguwíi xkrugua ndrígóo xtátsí. Nda̱wa̱á nigu náa xpajpoo ni̱jkha̱ kagu̱u̱ asndu náa inuu kúbá mijngii Hebrón.

Nda̱wa̱á, filisteos nigún gutamijná gajmiún Dalila, bi̱ ninindxu̱u̱ novia ndrígóo Sansón, ga̱jma̱a̱ nitháán: “Muni númaaʼxu mbaʼa wéñuʼ mbújkha̱a̱ plata á mu na̱dxu̱ʼnú natayáá ndiéjunʼ eʼni mu mani̱ndxu̱u̱ migújkuíʼ wéñuʼ Sansón. Numuu rí nanduxu nurtúwiin ga̱jma̱a̱ nanduxu muxuʼdáʼxu náa guʼwá e̱jua̱nʼ”. Dalila nandoo mbújkha̱a̱ ikha jngó niriʼña rí maʼni. Ginii, Sansón tándoo gáʼthúu̱n Dalila náa minaʼ e̱ʼkha̱ tsiakii ndrígóo. Mú ikhaa nitsudaa má xúʼko̱ Sansón asndu náa má gáʼthúu̱n. Ikhú ikhaa niʼthí: “Nditháan turujtu xtátsúun edxu̱ʼ numuu rí ni̱ndxu̱ʼ nazareo. Á mu nurujtu xtátsúun edxu̱ʼ, ní xáguʼdoo tsiakii”. Ninindxu̱u̱ raʼkhí wéñuʼ rí Sansón maʼthúu̱n rúʼko̱ Dalila, lá ragájkhun ráʼ.

Nacha̱ má Dalila niʼthún filisteos: “¡Nda̱yo̱o̱ xúgi̱ rá!”. Niʼni rí Sansón migu náa xtiyuu ga̱jma̱a̱ nindxa̱ʼóo mbáa mu marujtu xtátsúun edxu̱u̱. Ikhú Dalila nindxa̱ʼwá: “¡Sansón, filisteos kuwa gi̱jyooʼ!”. Ikhaa ndi̱jui̱ʼ ga̱jma̱a̱ ndiʼyoo rí nánguá gíʼdoo tsiakii. Ikhú filisteos nirtuwiin, ga̱jma̱a̱ nirawíi iduu ga̱jma̱a̱ nixuda̱ʼ guʼwá e̱jua̱nʼ.

Mbóo mbiʼi, mbaʼin wéñuʼ filisteos nigimbíin náa templo ndrígóo dios Dagón. Nindxa̱ʼwa̱ “dios ndrígúlú nixnáxi̱i̱ Sansón náa ikháanʼlu. Guríyaʼ Sansón mu maʼni̱i̱ a̱jkiu̱lú mbégu̱ʼ”. Nitsijii náa tapo̱o̱ rí wájun a̱jma̱ columnas ma̱ngaa ninduʼwajmaa. Sansón niʼthí gakhi̱i̱: “Oh, Jeobá, mbá péñu, araxnúʼ tsiakii imbóó miʼtsú rígi̱”. Ndi̱ʼya̱a̱ má xtátsúun edxu̱u̱ mbu̱júu̱, ikha jngó nikudinguanʼ nájma̱ columnas ndrígóo templo ga̱jma̱a̱ xúgíʼ tsiakii ndrígóo. Ikhú templo nijngudiri̱ga̱a̱ ga̱jma̱a̱ nigudíin xúgínʼ bi̱ kuwa ikhí. Sansón ma̱ngaa nikháñu.