Jonatán tsímiñuu ga̱jma̱a̱ jmbii

Jonatán ninindxu̱u̱ aʼdá giʼniuu rey Saúl, ninindxu̱u̱ mbáa xa̱bu̱ bi̱ najmañuu naxmínaʼ májánʼ ga̱jma̱a̱ tsímiñuu. David niʼthí rí Jonatán nagáyúu itháan nacha̱ ki xóo mbáa bi̱yú ga̱jma̱a̱ itháan gíʼdoo tsiakii ki xóo mbáa león. Mbóo mbiʼi, Jonatán ndiʼñún tikhun soldados filisteos náa ndíjtsúu kúbá. Ikha jngó niʼthúu̱n bi̱ nambáyúu nagu ajua̱nʼ ndrígóo: “Muxmijna gajmiúlú i̱ndó á mu Jeobá naxnúlú mbá seña. Á mu filisteos nuthulú rí mutsimulú, ikhú gúʼyáá rí gíʼmáanʼ muxmíjná gajmiúlú”. Filisteos nithi: “¡Atsimala mu muxmíjná!”. Ikhú Jonatán ga̱jma̱a̱ bi̱ nambáyúu nitsimún náa kúbá ga̱jma̱a̱ niʼngu̱u̱n niradíin mbá 20 soldados.

Numuu rí Jonatán ninindxu̱u̱ a̱ʼdióo giʼnii Saúl, gíʼmaa mani̱ndxu̱u̱ rey nda̱wa̱á rí anu̱u̱ gakháñuu. Mú Jonatán ndaʼyoo rí Jeobá niraʼwíi David mu mani̱ndxu̱u̱ imba̱a̱ rey náa Israel, ga̱jma̱a̱ tsíxígúu kaʼyoo. Rí phú nirígá, rí Jonatán ga̱jma̱a̱ David nimbáxu̱u̱n májánʼ wéñuʼ. Nimbánun rí muñeumíjna̱ ga̱jma̱a̱ mumbayumíjná. Mu musngajma rí nambáxu̱u̱n, Jonatán nixnúu David xtíñuu, espada ndrígóo, xkamídá ga̱jma̱a̱ cinturón.

Índo̱ David xtáa rarkaʼwuminaʼ numuu rí Saúl nindoo maxíyáa, tán ni̱jkha̱ gáʼyoo ga̱jma̱a̱ niʼthúu̱n: “Xákaguabáánʼ ga̱jma̱a̱ xámiñaʼ. Jeobá niraʼwíín mu manindxa̱ʼ rey. Asndu anu̱ʼ ndaʼyoo májánʼ rígi̱”. Lá manigua̱ʼ maraʼdaa mbáa bi̱ matambáxaʼ ga̱jma̱ʼ bi̱ mani̱ndxu̱u̱ májánʼ xó má Jonatán ráʼ.

Mbaʼa nuthu Jonatán nimbáyúu bi̱ nambáxu̱u̱ ga̱jma̱a̱ maski ajndu migamíi makhañúu. Ikhaa ndaʼyoo rí anu̱u̱ nindoo maxíyáa David, ikha jngó niʼthí: “Á mu nataxíyáa David, mataxuʼdáminaʼ mbá aʼkhá numuu rí ikhaa táʼni nimbá dí raʼkhí”. Saúl nikiʼnáa kaʼyoo wéñuʼ Jonatán. Nguáthá tsiguʼ nda̱wa̱á, Saúl ga̱jma̱a̱ Jonatán nikháñun náa nuxmijná.

Nda̱wa̱á rí Jonatán nikháñu, David ndiyáaʼ Mefibóset, a̱ʼdióo Jonatán. Índo̱ nixkama̱a̱, niʼthí: “Mañe̱wa̱nʼ xúgíʼ mbiʼi rí gáraxtaa numuu rí nimbáxuʼ májánʼ ga̱jmu̱ʼ ana̱ʼ. Maraxtaa náa palacio ndrígóʼ ga̱jma̱a̱ mbóó gutrigáanʼ mu muphiʼtsu náa mesa”. David támbumuu kaʼyoo Jonatán bi̱ nimbáxu̱u̱ ga̱jma̱a̱.