Aʼkhá rí nikudaminaʼ rey David

Índo̱ Saúl nikháñu, David ninindxu̱u̱ rey índo̱ nigiʼdoo 30 tsiguuʼ. Ninújngoo mba̱yu̱ʼ tsiguʼ ga̱jma̱a̱ mbóo mbruʼun ikhaa rígu náa tsu̱du̱u̱ guʼwá ikhú ndiʼyoo mbáa a̱ʼgu̱ mitsiʼyáa. David ndiʼyoo rí ikhaa mbiʼyuu Bat-Seba ga̱jma̱a̱ rí ndiyáa mbáa soldado bi̱ nigumbiʼyuu Urías. Ikhú David niʼthí rí maguwáʼ ku̱ya̱a̱ Bat-Seba náa palacio ndrígóo, nixudami̱jna̱ aʼkhá, ga̱jma̱a̱ ikhaa nigu ewáan ada̱. David nigíʼ markaʼwu rí niʼni. Ikha jngó niʼthúu̱n bi̱ kayá edxu̱u̱ náa soldados rí mutsijii Urías náa timbíi̱n bi̱ muxmijná, ga̱jma̱a̱ nda̱wa̱á muniñaʼ mbáwíi. Urías nikháñuu ikhú, nda̱wa̱á David ndiyáa Bat-Seba.

Mú Jeobá ndiʼyoo xúgíʼ dí nirígá. Ndiéjunʼ gáʼni Jeobá xúgi̱ rá. Nikuʼmaa gaʼyee Natán mu maʼtámíjná ga̱jma̱a̱ David. Natán niʼthúu̱n: “Nixtáa mbáa xa̱bu̱ bi̱ gíʼdiin mbaʼin wéñuʼ mugu̱, ga̱jma̱a̱ mbáa xa̱bu̱ migínáa bi̱ indó gíʼdaa mbáwíi mugiu̱u̱ bi̱ nandoo kaʼyoo wéñuʼ. Xa̱bu̱ bi̱ gíʼdoo niríya kaʼyúʼ xa̱bu̱ gínáa bi̱ mbáwíi mugiu̱u̱”. David nikiʼnáa wéñuʼ ga̱jma̱a̱ niʼthí: “¡Xa̱bu̱ buʼko̱ kaʼyoo rí makhañúu!”. Ikhú Natán niʼthúu̱n: “¡Ikháánʼ ni̱ndxa̱ʼ xóo xa̱bu̱ buʼko̱!”. David nixtáa gíná wéñuʼ ga̱jma̱a̱ niʼthúu̱n Natán: “Nikuʼdáminaʼ aʼkhá náa Jeobá”. Aʼkhá rúʼko̱ ni̱ʼkha̱ kagu̱u̱ mbaʼa xkujndu náa David, ga̱jma̱a̱ bi̱ kuwa náa goʼwóo. Jeobá nixnúu castigo David, mú niniñuʼ maxtáa numuu rí niʼthí rí gajkhun ga̱jma̱a̱ ninindxu̱u̱ mbáa xa̱bu̱ guabaaʼ.

David nindoo maʼni mbá templo ndrígóo Jeobá. Mú Jeobá niraʼwíi Salomón, a̱ʼdióo David mu maʼni rígi̱. Ikha jngó David nigíʼdu̱u̱ niʼniratoo rí majmuu Salomón ga̱jma̱a̱ niʼthí: “Templo ndrígóo Jeobá gíʼdoo rí maʼni mitsaan wéñuʼ. Salomón xóó nindxu̱u̱ mbáa dxámá, mú ikhúúnʼ gambáyúu mu maniratoo xúgíʼ”. David nixná mba̱a̱ mbújkha̱a̱ mu majmaa mu maguma guʼwá. Ndiñíinʼ bi̱ nuñajunʼ májánʼ, nigímbóó oro ga̱jma̱a̱ plata, ma̱ngaa ixi̱ cedro dí rígá náa Tiro ga̱jma̱a̱ Sidón. Índo̱ David itháan makhañúu, nixnúu Salomón i̱yi̱i̱ʼ rí xóo maʼni templo ga̱jma̱a̱ niʼthí: “Jeobá niʼthúnʼ xú káʼnii gaguma ga̱jma̱a̱ rí maniraʼmáʼ mu maxna̱ʼ. Ikhaa má gambáyaʼ. Xámiñaʼ mu matani ñajunʼ rígi̱”.