Mbá templo ndrígóo Jeobá

Índo̱ Salomón nigíʼdu̱u̱ niʼtáñajunʼ náa xuajen Israel, Jeobá niraxu̱u̱: “Ndiéjunʼ eyaʼ maxna̱ʼ rá.” Salomón niriʼña: “Kaʼnííʼ ni̱ndxu̱ʼ mbáa dxámá ga̱jma̱a̱ xóó tsejmañuʼ mani nimbá. Mbá péñu, araxnúʼ ku̱ma̱ mu majmúún mañewu̱u̱n xuajñanʼ”. Jeobá niʼthúu̱n: “Numuu rí nitando̱ʼo̱ʼ ku̱ma̱, mani rí manindxa̱ʼ xa̱bu̱ bi̱ itháan najmañuu náa xúgíʼ numbaaʼ. Ga̱jma̱a̱ raʼkháa i̱ndó ikhaa ma̱ngaa mani rí manindxa̱ʼ xa̱bu̱ bi̱ itháan najmañuu náa xúgíʼ numbaaʼ. Ma̱ngaa mani rí maraʼdáá wéñuʼ, ga̱jma̱a̱ maraxtaa mba̱yu̱ʼ tsiguʼ á mu nanimbaaʼ xta̱yo̱ʼ”.

Salomón nigíʼdu̱u̱ niʼni templo. Nijmuu oro, plata, ixi̱ ga̱jma̱a̱ itsí. Xúgíʼ rí nijmaa ninindxu̱u̱ rí itháan májánʼ. Mbaʼin xa̱bekha ga̱jma̱a̱ gu̱ʼu̱ bi̱ najmañún niñajunʼ náa guʼwá rígi̱. Templo niwáxi̱ índo̱ nirámáʼ mbá juwan tsiguʼ. Ikhú ni̱jkha̱nú mbiʼi rí maguma ndxo̱o̱ guʼwá ndrígóo Jeobá, ikha jngó nitsrigu tsigijñaʼ náa inuu altar. Salomón nismbátigo̱o̱ náa inuu altar ga̱jma̱a̱ niʼtájkáan: “Oh, Jeobá, ikháánʼ kaʼyaʼ mbá templo itháan mba̱a̱ ga̱jma̱a̱ mitsaan ki xóo rígi̱. Mú, mbá péñu, atrigú rí mbuyamajkuaʼxu ga̱jma̱a̱ atadxun rí nutajkáanʼxu”. Dí ku̱ma̱ʼ ikháánʼ rá. Lá niniguʼ Jeobá templo ráʼ. Lá niʼdxuun rí niʼtájkáan Salomón xáʼ. Nda̱wa̱á rí Salomón niguámbóo niʼtájkáan, nigajtaa aguʼ mekhuíí ga̱jma̱a̱ nitsikhá tsigijñaʼ. Xúʼko̱ nisngájma rí Jeobá niniguʼ templo. Índo̱ israelitas ndiyáá rúʼko̱ nidxún wéñuʼ.

Rey Salomón nijmaʼniiʼ wéñuʼ náa xúgíʼ Israel ga̱jma̱a̱ náa xuajen mitsínguánʼ wéñuʼ numuu rí nigiʼdoo wéñuʼ ku̱ma̱. Xa̱bu̱ nagún gúyáá mu mambáñun munimbaníí xkujndu rí guáʼdáá. Asndu reina Seba ni̱jkha̱ gáʼyoo mu mbaʼyoo á mu gajkhun nindxu̱u̱ ga̱jma̱a̱ niʼniuu graxe̱ rí itháan mingíjyúuʼ. Índo̱ niʼdxuun rí niriʼña̱a̱ Salomón, niʼthí: “Tánimboʼ rí nithu̱nʼ ga̱jma̱a̱ numaʼ, mú xúgi̱ nda̱yo̱o̱ rí itháan natayáá ki xóo rí nithu̱nʼ. Dios ndrígáʼ niʼni tsajkurámáánʼ”. Náa Israel ra̱ʼkhá tháán mitsaan kuwa xa̱bu̱, ga̱jma̱a̱ kuwa tsímáá. Mú rígi̱ maxtiʼkhuu mbá nacha̱.