Mbá reino nawiʼtáa

Xúgíʼ mbiʼi rí Salomón ndiʼyamajkuu Jeobá, nirígá tsímáá náa Israel. Mú ikhaa nigu̱u̱n mbaʼin gu̱ʼu̱ bi̱ naguwáʼ i̱mba̱ níʼkhá, ga̱jma̱a̱ nduyamajkhún dios bi̱ ragájkhun. Mañuu mañúú, Salomón niriʼkuminaʼ ga̱jma̱a̱ ma̱ngaa nigíʼdu̱u̱ ndiʼyamajkhún xándú. Jeobá nikiʼnáa ga̱jma̱a̱ niʼthúu̱n: “Marigu kaʼñúnʼ reino e̱jña̱ʼ ga̱jma̱a̱ maruiʼta̱a̱. Maxnu̱u̱ dí itháan mba̱a̱ bi̱ nambáyaʼ, ga̱jma̱a̱ bi̱ kuwa náa guʼwáaʼ mutañajunʼ rí itháan chíʼgíʼ”.

Jeobá niʼni rí makru̱ʼu̱u̱n xúgíʼ rí niʼthí. Mbáa bi̱ nambáyúu Salomón, bi̱ nigumbiʼyuu Jeroboán, xtáa ra̱jkha̱ náa kamba̱a̱, ikhí nixka̱ma̱a̱ gaʼyee Ahíya. Gaʼyee niríyaʼ xtíñuu rí kagúwunʼ mbájnii, nixkuʼtu mbá gu̱wa̱ʼ ijma̱ xuíʼtóo ga̱jma̱a̱ niʼthúu̱n Jeroboán: “Jeobá mariya kaʼyúʼ reino ndrígóo Israel náa e̱ji̱i̱n Salomón ga̱jma̱a̱ maʼni̱i̱ a̱jma̱. Ayá gu̱wa̱ʼ xuíʼtóo xtíin rígi̱, numuu rí manindxa̱ʼ rey náa gu̱wa̱ʼ xuajen ma̱jkha̱ʼ”. Índo̱ rey Salomón niʼdxuun rí nirígá, nindoo maxíyáa Jeroboán. Ikha jngó Jeroboán nigáyúu ni̱jkha̱ náa Egipto. Nda̱wa̱á, Salomón nikháñuu, ikhú a̱ʼdióo bi̱ nigumbiʼyuu Rehoboam nigíʼdu̱u̱ niʼtáñajunʼ. Jeroboán nindxa̱ʼwáminaʼ rí nándáa gamíi ga̱jma̱a̱ nitanga̱a̱ náa Israel.

Nda̱wa̱á bi̱ kuya̱ edxu̱u̱ náa Israel nitháán Rehoboam: “Á mu nataniu̱u̱n rí májánʼ xa̱bu̱ xuajen, xa̱bu̱ maguajún jmbu náa ikhaa”. Mú jiáma bi̱ nimbáxu̱u̱ gajmíi̱n nitháán: “Gíʼdoo rí matani gíníi xa̱bu̱. Ataniu̱u̱n tsiakii mu muñajunʼ itháan”. Rehoboam niʼnimbo̱o̱ rí nithi bi̱ nambáxu̱u̱ gajmíi̱n ga̱jma̱a̱ niʼni gíníi xa̱bu̱. Ikha jngó, xa̱bu̱ xuajen nánguá ninimbu̱ún ga̱jma̱a̱ nígi̱i̱ʼ Jeroboán mu maʼtáñajunʼ náa gu̱wa̱ʼ xuajen ma̱jkha̱ʼ. Reino rí gu̱wa̱ʼ xuajen ma̱jkha̱ʼ nigumbiʼyuu Israel. Reino bi̱ a̱jma̱ xuajen ma̱jkha̱ʼ nigumbiʼyuu reino ndrígóo Judá, ikhiin ninindxu̱ún jmbiin náa Rehoboam. Xúʼko̱ niʼni rí niwiʼtóo, gu̱wa̱ʼ ijma̱ xuajen ma̱jkha̱ʼ ndrígóo Israel.

Jerusalén nixtáa náa reino ndrígóo Rehoboam. Jeroboán táʼndoo rí xuajñu magún mbuyamajkuíí Jeobá ikhí. Lá natayáá náa numuu ráʼ. Numuu rí Jeroboán nimíñuu rí xúnimbu̱ún kuyáá ikhaa ga̱jma̱a̱ munimbu̱ún kuyáá Rehoboam. Ikha jngó niʼniin a̱jmi̱i̱n e̱jín xédé ga̱jma̱a̱ oro ga̱jma̱a̱ niʼthún xa̱bu̱ xuajen: “Jerusalén mitsínguánʼ wéñuʼ. Itháan májánʼ rí maguanála gi̱i̱ ga̱jma̱a̱ guyamajkún e̱jín xédé”. Xa̱bu̱ ninimbu̱ún ga̱jma̱a̱ nimbumún kuyáá Jeobá mbu̱júu̱.