Jeobá nambáyúu Jehosafat náa xa̱bu̱ sia̱nʼ

Jehosafat ninindxu̱u̱ mbáa rey náa Judá bi̱ niʼni gámbóo xúgíʼ náa ndiyamajkuíí dios Baal ga̱jma̱a̱ xándú dí rígá náa xuajen mba̱a̱ rúʼko̱. Ikhaa nindoo rí xa̱bu̱ muniʼnuʼ xtángoo ndrígóo Jeobá. Ikha jngó nikuʼmiin príncipes ga̱jma̱a̱ levitas náa xúgíʼ Judá mu musngáa xtángoo ndrígóo Jeobá náa xuajen.

Xuajen dí rígá mijngii namiñun muxnún xa̱bu̱ Judá numuu rí nduyáá rí Jeobá gámbáyúu xuajñu. Asndu nigún ku̱ñu̱u̱n regalo náa rey Jehosafat. Mú ikhú xa̱bu̱ bi̱ kuwa náa Ammón, Moab ga̱jma̱a̱ i̱ʼwáʼ xuajen rí kaʼyoo Seír nigún guxmijná gajmiún Judá. Jehosafat ndiʼyoo rí mbaʼyóoʼ rí Jeobá mambáyúu. Ikha jngó nigímbíin xa̱bekha gu̱ʼu̱ mangiin e̱ji̱n. Inún ikhiin niʼtájkáan: “Jeobá, á mu tsetambáyuxuʼ xáʼnguxu guxmijna. Mbá péñu, aratúxu ndiéjunʼ gíʼmaa munixu”.

Jeobá niʼdxaun Jehosafat ga̱jma̱a̱ niriʼñuu: “Xámiñalaʼ, ikhúúnʼ má gambáyalaʼ. Guguajún náa kaʼyala ga̱jma̱a̱ gu̱ya̱a̱ xú káʼnii gáni káwáanʼ”. Xú káʼnii gambáñun Jeobá xá.

I̱mba̱ néjtsuu, Jehosafat niraʼwíin bi̱ muni ajmúú ga̱jma̱a̱ niʼthún rí magún náa inún ejército. Ikhiin nigájnun náa Jerusalén mu magún náa muxmijná, náa nagumbiʼyuu Tecoa.

Bi̱ nuni ajmúú nidxún wéñuʼ índo̱ nigún runi ajmúú náa Jeobá ga̱jma̱a̱ aʼwá gakhi̱i̱. Ikhú, Jeobá nixmínaʼ ga̱jma̱a̱ numuu xuajñu. Niʼni jngi̱i̱n ammonitas ga̱jma̱a̱ moabitas, ga̱jma̱a̱ nigíʼdi̱i̱ nixmijná kanikhiin. Xúgínʼ nikháñun. Mú Jeobá niñewu̱u̱n xa̱bu̱ Judá, soldados ga̱jma̱a̱ ndxajkun. Xúgínʼ xuajen mba̱ʼu̱ dí rígá mijngii nidxawíín rí Jeobá niʼni ga̱jma̱a̱ niguánu ndiyáá rí ikhaa xóó nañewu̱u̱n xuajñu náa xa̱bu̱ sia̱nʼ. Xú káʼnii eñawu̱u̱n xuajñu Jeobá rá. Mbaʼa enii. Ikhaa tséyóoʼ rí xa̱bu̱ mumbayíí.