Ángel ndrígóo Jeobá nañewu̱u̱n Ezequías

Xa̱bu̱ Ñajunʼ asirio niʼngo̱o̱ nigruigú reino dí mbá 10 xuajen ma̱jkha̱ʼ ndrígóo Israel. Ikhú rey ndrígóo Asiria, Senaquerib, ma̱ngaa nindoo maguanún ga̱jma̱a̱ a̱jma̱ tribus ndrígóo Judá. Ikhú ni̱jkha̱ ragruigú mámbá xuajen rí kaʼyoo Judá. Mú xuajen rí itháan nindoo ikhaa ninindxu̱u̱ Jerusalén. Senaquerib tseʼyoo rí Jeobá xtáa rañewu̱u̱n xuajen rúʼko̱.

Ezequías, rey ndrígóo Judá, niʼni numuu mba̱a̱ wéñuʼ mbújkha̱a̱ Senaquerib mú xáʼni gámbáa Jerusalén. Senaquerib nigruigú mbújkha̱a̱, maski ajndu xúʼko̱ nikuʼmiin tsiakii ejército ndrígóo mu muni gámbáa. Xa̱bu̱ bi̱ kuwa náa xuajen nimiñun wéñuʼ numuu rí bi̱ asirios naguwáʼ itháan mijngii. Ikhú Ezequías niʼthúún: “Xámiñalaʼ. Bi̱ asirios guáʼdáá tsiakii, mú Jeobá maʼni dí ikháanʼ maguaʼdáá itháan tsiakii”.

Senaquerib nikuʼmaa rabsaqué, bi̱ maʼga̱ kayóo ajngáa, mú matsíjmiin xa̱bu̱ bi̱ kuwa náa Jerusalén. rabsaqué niwi̱ji̱ náa rexo̱o̱ xuajen ga̱jma̱a̱ niʼthí: “Jeobá xáʼngo̱o̱ gambáyalá. Xuʼniñamíjnála dí Ezequías maʼni nduwáanʼla. Nimbáa dios xáʼngo̱o̱ gañewanla náa ikháanʼxu”.

Ezequías niraxu̱u̱ Jeobá ndiéjunʼ rí gáʼni, ga̱jma̱a̱ Jeobá niriʼña̱a̱: “Xámiñaʼ ga̱jma̱a̱ numuu rí niʼthí rabsaqué. Senaquerib xáto̱ʼo̱o̱ náa Jerusalén”. Nda̱wa̱á, Ezequías nigruigú tikhu cartas ndrígóo Senaquerib, náa naʼthí: “Guniʼñamijnala. Jeobá xáʼngo̱o̱ gáʼni káwáanʼla”. Ikhú Ezequías niʼtájkáan: “Jeobá, mbá péñu, atani káwáanʼxu, mú xúgínʼ mbuyáá rí mbáwíín ikháanʼ ni̱ndxa̱ʼ Dios gajkhun”. Ga̱jma̱a̱ Jeobá niriʼña̱a̱: “Rey ndrígóo Asiria xáto̱ʼo̱o̱ náa Jerusalén. Ikhúúnʼ gáñewu̱u̱n xuajñuʼ”.

Senaquerib ndiʼyoo gajkhun rí magruigúu Jerusalén. Mú mbá mbruʼun, Jeobá nikuʼmaa mbáa ángel náa campamento ndrígu̱ún bi̱ asirio, dí rígá náa rexo̱o̱ xuajen. ¡Ángel nigudíin mbá 185,000 soldados! Nikháñuun xa̱bi̱i̱ Rey Senaquerib bi̱ itháan mixkujinʼ, ga̱jma̱a̱ ikhú nitanga̱a̱ náa goʼwóo. Xúʼko̱ Jeobá nimbáyúu Ezequías ga̱jma̱a̱ xuajen Jerusalén, xó má niʼthí maʼni. Á mu ikháánʼ niraxtaa náa Jerusalén, Lá maku̱ma̱ʼ xtayáá Jeobá ráʼ.