Ajngáa náa pared

Tsiguʼ nda̱wa̱á, Belsasar ni̱jkha̱nú ninindxu̱u̱ rey náa Babilonia. Mbá mbruʼun, niʼni mbá ndxa̱a̱ mú magún mbá mil invitados ndrígóo. Bi̱ ni̱ndxu̱ún xa̱bu̱ bi̱ itháan guáʼdáá numuu náa xuajen. Nikuʼmiin ñumbáá ndrígóo rí murawíi vasos dí oro rí Nabucodonosor niguwíi náa templo ndrígóo Jeobá. Belsasar ga̱jma̱a̱ invitados ndrígóo niʼwa̱a̱n ga̱jma̱a̱ vasos rúʼko̱ ga̱jma̱a̱ nini mba̱a̱ dioses ndrígu̱ún. Nda̱a̱ tsu̱ma̱, ningatíyaaʼ ñawúunʼ mbáa xa̱bu̱ ga̱jma̱a̱ nigíʼdu̱u̱ niʼnirámáʼ ajngáa rí tsijmaʼnuʼ náa pared náa guʼwá náa naguma ndxa̱a̱.

Belsasar nimiñuu wéñuʼ. Nindxaʼwún magos ndrígóo ga̱jma̱a̱ niʼthún: “Bi̱ gáʼthúnʼ rí eyoo gáʼthúu̱n ajngáa rígi̱, magíʼ xóo bi̱ maʼni ragajtsíin xa̱bu̱ bi̱ magiʼdoo itháan numuu náa Babilonia”. Ikha jngó nigíʼ muni, mu nimbáa táʼngo̱o̱ gáʼthi ndiéjunʼ eyoo gáʼthúu̱n ajngáa rúʼko̱. Ikhú ni̱ʼkha̱nú reina ga̱jma̱a̱ niʼthí: “Mbáa xa̱bu̱ bi̱ mbiʼyuu Daniel niʼthúu̱n xnuʼndaa ga̱jma̱a̱ ajngáa gakhi̱i̱ Nabucodonosor. Ikhaa ma̱ndoo maʼtháanʼ rí eyoo gáʼthúu̱n ajngáa rígi̱”.

Daniel ni̱jkha̱ gaʼyoo rey. Índo̱ ni̱jkha̱nú, Belsasar niʼthúu̱n: “Á mu nandoo matraxnuu ga̱jma̱a̱ marata rí eyoo gáʼthúu̱n ajngáa rígi̱, maxna̱ʼ mbá xábí oro matraʼngaʼ ga̱jma̱a̱ maʼgínʼ xóo bi̱ maʼni ragajtsíin xa̱bu̱ bi̱ gíʼdoo itháan numuu náa Babilonia”. Daniel niriʼña: “Tsíyóóʼ maraxnuʼ regalos. Mú matha̱nʼ rí eyoo gáʼthúu̱n ajngáa rúʼko̱. Ana̱ʼ, Nabucodonosor, niʼnimbamínáʼ, ga̱jma̱a̱ Jeobá niʼsngóo mu makruiguminaʼ. Ikháánʼ nitayáá rí nigíʼnuu ikhaa, mu maski ajndu xúʼko̱ ikháánʼ na̱nguá nitayamajkuíí Jeobá. Nijmaʼ vasos dí oro dí nirígá náa templo ndrígóo mu migi̱i̱n vino. Ikha jngó Dios niʼnirámáʼ ajngáa rígi̱: MENÉ, MENÉ, TEQUEL ga̱jma̱a̱ PARSÍN. Rígi̱ nandoo gáʼthúu̱n rí medos ga̱jma̱a̱ persas matu̱ʼu̱u̱n náa Babilonia, ga̱jma̱a̱ ikháánʼ ní xáni̱ndxa̱ʼ rey”.

Nakujmaa rí gakhi̱i̱ wéñuʼ rí maʼngu̱u̱n matu̱ʼu̱u̱n náa Babilonia. Numuu rí xuajen kúgumaʼá májánʼ ga̱jma̱a̱ xtátsí mba̱ʼu̱ ga̱jma̱a̱ mbá mañu mi̱jnu̱ʼ. Mú ikháá má mbruʼun rúʼko̱ nitu̱ʼu̱u̱n medos ga̱jma̱a̱ persas náa Babilonia. Ciro, rey ndrígóo persa, nixnúu ikhoo mu ma̱ndoo maʼga̱ i̱mba̱ níʼkhá mañu mu ejército ma̱ndoo maguánu asndu náa xkrugoo xuajen. Índo̱ niguánu ikhí, ¡xkrugua kambaʼtoo! Ikhú soldados núkhu nini gámbáa, ga̱jma̱a̱ nindrigú xuajen ma̱ngaa nixiyáa rey. Rí xúgi̱ Ciro nindxu̱u̱ Xa̱bu̱ Ñajunʼ náa Babilonia.

Timbá tsiguʼ rí niʼtáñajunʼ Ciro, ikhaa niʼthí rígi̱: “Jeobá niʼthúnʼ rí mani̱i̱ templo náa Jerusalén. Judíos bi̱ gándoo muyambáá, ma̱ndoo magún”. Ikha jngó, mbaʼin nitangi̱i̱n náa kubu̱únʼ 70 tsiguʼ nda̱wa̱á rí nini gámbáa Jerusalén. Xúʼko̱ nimbánuu rí Jeobá nikudaminaʼ maʼni. Ma̱ngaa, Ciro nirtanga̱a̱ vaso rí kiʼni ga̱jma̱a̱ oro ga̱jma̱a̱ plata, ga̱jma̱a̱ i̱ʼwáʼ rí Nabucodonosor niguwíi náa templo. Nitayáá xú káʼnii Jeobá nijmiuu Ciro mu mayambáá náa templo ráʼ.