Daniel náa iñáʼ rí kajchún león

Darío bi̱ nindxu̱u̱ medo ma̱ngaa ninindxu̱u̱ imba̱a̱ rey náa Babilonia. Ndiʼyoo rí Daniel nindxu̱u̱ mbáa xa̱bu̱ kiejunʼ, ikha jngó nixnúu ñajunʼ dí mayeʼga edxu̱u̱ náa xa̱bu̱ bi̱ guáʼdáá numún náa xuajen. Mú xa̱bu̱ bugi̱ naxígu̱u̱n kuyáá Daniel ga̱jma̱a̱ nandún muxiyáa. Nduyáá rí Daniel naʼthá kháñuu Jeobá ajtsú nuthu mbá mbiʼi, ikha jngó nitháán Darío: “Oh, rey, gíʼmaa marigá mbá xtángoo mu xúgínʼ xa̱bu̱ mbuyamajkuaʼ i̱ndó ikháánʼ. Á mu mbáa tséʼnimbo̱o̱ xtángoo rúʼko̱, muxuma̱ʼ náa iñáʼ rí kajchún león”. Darío niniguʼ rí nithi ikha jngó nixnúu firma xtángoo.

Índo̱ Daniel ndiʼyoo dí rígá i̱mba̱ nuxi̱ʼ xtángoo, ni̱jkha̱a̱ náa goʼwóo ga̱jma̱a̱ nismbátigo̱o̱ ga̱jma̱a̱ niʼthá kháñuu Jeobá mú ventana ndrígóo niniñuʼ kambaʼta. Xa̱bekha buʼko̱ bi̱ naxígu̱u̱n kuyáá, nda̱a̱ tsu̱ma̱ nitu̱ʼu̱u̱n náa goʼwóo ga̱jma̱a̱ ndiyáá rí xtáa raʼtájkháan. Ikhú nigún ragañun mu muthán rígi̱ Darío: “Daniel táʼnimbo̱o̱ kaʼyaʼ. Naʼthá kháñuu Dios ndrígóo ajtsú nuthu rí mbá mbiʼi”. Darío naniguʼ rí eʼni Daniel ga̱jma̱a̱ táʼndoo rí muxiyáa. Mbá kañiʼ mbiʼi nindxa̱ʼwáminaʼ xú káʼnii gáʼni mu maʼnikríyaaʼ, mú asndu ikhaa nánguá xóo mariʼkhu̱u̱ xtángoo rí niguma má firma. Ikha jngó nándáa imbo̱o̱ rí maʼni i̱ndó rí muxuma̱ʼ Daniel náa iñáʼ náa kajchún león.

Mbruʼun rúʼko̱, Darío nixmiéjunʼ wéñuʼ kaʼyoo Daniel rí asndu nánguá nindoo gígu. I̱mba̱ néjtsuu, ni̱jkha̱ ragáyúu náa iñáʼ ga̱jma̱a̱ niyexima̱ʼa̱ ikhí, ga̱jma̱a̱ niʼthúu̱n: “¡Daniel! Lá niʼni kríñanʼ Dios ndrígáʼ ráʼ.”

Darío niʼdxuun mbá aʼwá. Aʼwóo Daniel, ikhaa niriʼñuu: “Ángel ndrígóo Jeobá nirugoo rawúnʼ león, ikha jngó nda̱a̱ rí niniuʼ”. Darío nidxuu wéñuʼ ga̱jma̱a̱ nikuʼmaa rí muriyaʼ ikhí. Daniel nigájna̱a̱ ga̱jma̱a̱ nda̱a̱ rí nigíʼnuu nditháan. Nda̱wa̱á, rey niʼtáñajunʼ: “¡Guxumínʼ náa iñáʼ xa̱bu̱ bi̱ nixrui̱ga̱a̱ Daniel!”. Índo̱ nindriñinʼ, león núkhu niʼphu̱u̱n.

Darío niʼtáñajúúnʼ xa̱bu̱ xuajñu: “Xúgiáanʼ gíʼmaa mbuyamajkuíí Dios ndrígóo Daniel. Ikhaa niʼnikríyaaʼ náa león”.

Ikháánʼ rá. Lá mangáán naratá kháñii Jeobá xúgíʼ mbiʼi xó má Daniel ráʼ.