Ester naʼni káwíin xa̱bu̱ xuajñu

Ester ninindxu̱u̱ mbáa dxáʼgú judía bi̱ nixtáa náa xuajen Susa rí kaʼyoo Persia. Mba̱yu̱ʼ tsiguʼ ginii, rey Nabucodonosor niguwíin bi̱ kuwa náa goʼwóo náa Jerusalén. Primo ndrígóo bi̱ nigumbiʼyuu Mardoqueo bi̱ nixtáa rañajunʼ náa rey Asuero náa xuajen Persia niʼni mbaja̱a̱ Ester.

Rey Asuero nindoo imba̱a̱ nuxi̱ʼ reina. Ikha jngó bi̱ numbayíí nigún kudiin gu̱ʼu̱ bi̱ itháan mitsiʼñíin náa xuajen rúʼko̱, ga̱jma̱a̱ Ester ninindxu̱u̱ mbáa rí ikhaa. Náa xúgínʼ gu̱ʼu̱, rey niríyaʼ mu mani̱ndxu̱u̱ reina. Mardoqueo niʼthúu̱n Ester rí xáʼthúu̱n nimbáa rí ikhaa nindxu̱u̱ judía.

Mbáa xa̱bu̱ bi̱ naʼnimbamínaʼ wéñuʼ bi̱ nagumbiʼyuu Hamán bi̱ kayá edxu̱u̱ náa xúgínʼ príncipes. Ikhaa nindoo rí xúgínʼ musmbati̱gu̱u̱n náa inuu. Mú Mardoqueo tasmbáti̱go̱o̱. Hamán nikiʼnáa wéñuʼ rí asndu nigíʼ maxíyáa. Índo̱ Hamán niʼdxuun rí Mardoqueo nindxu̱u̱ judío, ikhú nindxa̱ʼwáminaʼ rí magudíin xúgínʼ judíos bi̱ kuwa náa xuajen. Niʼthúu̱n rey: “Judíos ni̱ndxu̱ún ra̱míjínʼ wéñuʼ. Gíʼmaa muradíin xúgínʼ”. Asuero niriʼña̱a̱: “Atani rí naku̱ma̱ʼ rí itháan májánʼ nindxu̱u̱”. Ga̱jma̱a̱ niniñuʼ maʼni mbá xtángoo. Xtángoo rígi̱ naʼthí rí mbiʼi 13 ñajunʼ gu̱nʼ adar xa̱bu̱ gíʼmaa muradíin xúgínʼ judíos. Mú Jeobá xtáa raʼyoo xúgíʼ.

Ester na̱nguá eʼyoo nditháan ga̱jma̱a̱ numuu xtángoo rígi̱. Ikha jngó Mardoqueo nikuʼma mbá copia ga̱jma̱a̱ niʼthúu̱n: “Gíʼmaa rí maratha̱a̱n rey”. Ester niriʼña̱a̱: “Asndu tsáa bi̱ gáʼga gáʼyoo rey á mu ikhaa táʼthúu̱n maʼga̱ gíʼmaa makhañúu. Ga̱jma̱a̱ naʼni mbá 30 mbiʼi rí rey na̱nguá eʼthúnʼ maʼgá. Mú maʼgá. Á mu nakruiyaʼ cetro ndrígóo náa ikhúúnʼ, maxtáá. Mú á mu na̱nguá, makhañúʼ”.

Ester ni̱jkha̱ náa rexo̱o̱ palacio ndrígóo rey. Índo̱ rey ndiʼyoo, nukruiyaʼ cetro o xkuiya ndrígóo náa ikhaa. Ester ni̱jkha̱ kanuu ga̱jma̱a̱ niraxu̱u̱: “Ester, ndiéjunʼ eyaʼ rá.” Ikhaa niriʼña̱a̱: “Nandoʼ mi̱dxa̱ʼ ga̱jma̱ʼ Hamán náa mbá ganitsu rí nandoʼ mani”. Náa ganitsu rúʼko̱, Ester niʼthún rí maguwáʼ náa i̱mba̱ ganitsu. Náa ganitsu rígi̱, rey niraxu̱u̱ mbu̱júu̱ Ester: “Ndiéjunʼ eyaaʼ rá.” Ikhaa niʼthúu̱n: “Xtáa mbáa xa̱bu̱ bi̱ nandoo gagudiáanʼxu ikhúúnʼ gajmíi̱nʼ xa̱bu̱ xuajñuʼ. Mbá péñu, atani káwáanʼxu”. Rey niraxi: “Tsáa eyoo gáxiña̱a̱n rá.” Ikhaa niriʼña̱a̱: “Xa̱bu̱ bugi̱ bi̱ ra̱májánʼ wéñuʼ, Hamán”. Asuero nikiʼnáa wéñuʼ rí núkhu nikuʼmaa muxiyáa Hamán.

Mú nimbáa xándoo maʼnijngudi̱i̱ xtángoo rí niʼni Hamán, ni má rey. Ikha jngó rey niʼni rí Mardoqueo mayéʼga edxu̱u̱ náa príncipes ga̱jma̱a̱ niniñuʼ rí maʼni mbá nuxi̱ʼ xtángoo. Xtángoo naʼthí rí judíos ma̱ndoo mumbayumíjná índo̱ gáguwáʼ muradíin. Mbiʼi 13 ñajunʼ gu̱nʼ adar, xa̱bu̱ xuajen bi̱ ni̱ndxu̱ún judíos niʼngu̱u̱n nini gajmiún xa̱bu̱ sia̱nʼ ndrígu̱ún. Asndu nákha mbiʼi rúʼko̱, judíos nigi̱ʼdi̱i̱ nini ndxa̱a̱ xúgíʼ tsiguʼ numuu rí niʼngu̱u̱n.