Esdras naʼsngáa Xtángoo ndrígóo Dios

Ninújngoo má mbá 70 tsiguʼ asndu nákha mbaʼin israelitas nitangi̱i̱n náa Jerusalén, maski ajndu mbaʼin rí ikhiin nikuwa náa mbaʼa xuajen náa mbayuuʼ persa. Mbáa rí ikhiin ninindxu̱u̱ Esdras, mbáa ndxajkun bi̱ niʼsngáa Xtángoo ndrígóo Jeobá. Esdras niʼdxuun rí xa̱bu̱ Jerusalén na̱nguá enimbu̱ún Xtángoo, ikha jngó nindoo maʼgá ikhí mu mambáñun. Artajerjes, rey ndrígóo Persia, niʼthúu̱n: “Dios nixnáʼ ku̱ma̱ mu marasngáa Xtángoo ndrígóo. Ikha jngó ayuʼ ga̱jma̱a̱ ayuʼ jcháa asndu tsáa bi̱ ma̱ndoo maʼga̱ ga̱jma̱á ni̱ndxa̱ʼ”. Esdras nigímbíin xúgínʼ bi̱ nandún matangi̱i̱n náa Jerusalén. Ninda̱ʼa̱a̱ Jeobá rí mañewu̱u̱n náa kamba̱a̱ ga̱jma̱a̱ nigi̱ʼdi̱i̱ nigún.

A̱jkhu̱ igu̱nʼ nda̱wa̱á, niguánu náa Jerusalén. Príncipes bi̱ kuwa náa xuajen nitháán Esdras: “Israelitas nánguá enimbu̱ún kuyáá Jeobá ga̱jma̱a̱ ninigu̱nʼ gajmiún gu̱ʼu̱ bi̱ nduyamajkhún dios bi̱ ragájkhun”. Ndiéjunʼ niʼni Esdras rá. Nismbátigo̱o̱ náa inún xúgínʼ xa̱bu̱ xuajen ga̱jma̱a̱ niʼtájkáan: “Jeobá, ikháánʼ nitani mbaʼa rí májánʼ ga̱jma̱a̱ numuxu, mú ikháanʼxu nikiéʼkuxuʼ náa inaʼ”. Xa̱bu̱ xuajen nitanga̱a̱ a̱jkiu̱ún, mú nini má xúʼko̱ dí ra̱májánʼ. Ikha jngó Esdras niraʼwíin bi̱ kuya̱ edxu̱u̱ ga̱jma̱a̱ jueces mu munimbaníí xkujndu rígi̱. Ajtsú igu̱nʼ nixkawíin xúgínʼ bi̱ táʼnduun guyamajkuíí Jeobá.

Ninújngoo mbá 12 tsiguʼ. Índo̱ xtátsí ndrígóo Jerusalén niguámbá niguma̱a̱ mbu̱júu̱. Esdras nigímbíin xa̱bu̱ náa xuáá mu maguxnuu Xtángoo ndrígóo Dios. Índo̱ nimbáʼtoo Xtángoo, xa̱bu̱ niguájun. Esdras ndiʼyamajkuu Jeobá, ga̱jma̱a̱ israelitas nixuxi ñawúunʼ mu musngajma rí nandún munimbaníí. Nda̱wa̱á Esdras niguxnuu ga̱jma̱a̱ niʼsngáa Xtángoo. Xa̱bu̱ xuajen nigíʼ májánʼ edxu̱ún. Ndiyáá rí nitsíngumi̱jna̱ náa Jeobá mbu̱júu̱, ga̱jma̱a̱ nimbiyaʼ. Imbo̱o̱ mbiʼi, Esdras niguxnuu má xúʼko̱ Xtángoo. Israelitas niguánu ndiyáá rí inuu má muni Ndxa̱a̱ Xtúgua. Ga̱jma̱a̱ núkhu má niniratamijná mu muni ndxa̱a̱.

Israelitas nikuwa gagi wéñuʼ mbá juwan mbiʼi rí ndijyúuʼ ndxa̱a̱. Ni̱xna̱a̱ núma̱a̱ Jeobá numuu rí májánʼ wéñuʼ rí niraxi̱i̱. Nimbá miʼtsú taguaʼdáá mbá Ndxa̱a̱ Xtúgua xóo rígi̱ asndu nákha nixtáa Josué. Índo̱ niguámbá ndxa̱a̱ nigimbíin ga̱jma̱a̱ nitajkáan: “Jeobá, ikháánʼ nitani̱ káwáanʼxu nákha nini̱ndxu̱xu̱ʼ ñumbáá. Niraxnúxu ganitsu náa ku̱ba̱ʼ mixooʼ ga̱jma̱a̱ ku̱ba̱ʼ mitsaan rígi̱. Mú ikháanʼ na̱nguá ninimbuxu ku̱ya̱ʼ mbaʼa nuthu. Maski ajndu nitaxuʼmiin mbaʼin gaʼyee, túnimbuxu. Maski ajndu xúʼko̱, ikháánʼ niʼngo̱o̱ a̱jkia̱nʼ xtayuxu. Tambumaʼ nditháan rí nitaxúdaminaʼ náa Abrahán. Rí xúgi̱ nutha̱nʼxu rí munimbuxu ku̱ya̱ʼ”. Xa̱bu̱ xuajen niʼnirámáʼ rí nixudami̱jna̱ muni, ga̱jma̱a̱ príncipes, levitas ga̱jma̱a̱ ndxajkun nixnáá firma ga̱jma̱a̱ mbá sello.