Jesús nakháñuu náa Gólgota

Bi̱ kuya̱ edxu̱u̱ náa ndxajkun nigún ku̱ya̱a̱ Jesús náa palacio ndrígóo Xa̱bu̱ Ñajunʼ. Ikhí Pilato niraxi̱: “Ndiéjunʼ rí eni tsu̱di̱i̱ xa̱bu̱ bugi̱ rá.” Ikhiin niriʼña̱a̱: “¡Naʼthí rí nindxu̱u̱ rey!”. Pilato niraxu̱u̱ Jesús: “Lá ni̱ndxa̱ʼ ikháánʼ rey ndrígu̱ún judíos ráʼ.” Jesús niriʼñuu: “Reino ndrígóʼ na̱nguá rígá náa numbaaʼ rígi̱”.

Nda̱wa̱á Pilato nikunguanʼ Jesús náa Herodes, Xa̱bu̱ Ñajunʼ náa Galilea, mu mbaʼyoo á mu rígá mbá numuu mu muxruiga̱a̱. Herodes ndiʼyoo rí Jesús nda̱a̱ rí niʼni ga̱jma̱a̱ nikunguanʼ mbu̱júu̱ náa Pilato. Ikhú, Pilato niʼthún xa̱bu̱: “Ní má Herodes ní má ikhúúnʼ na̱nguá eya̱a̱xu rí xa̱bu̱ bugi̱ gíʼdoo aʼkhúun. Maniʼñúʼ maʼga̱a̱”. Mú xa̱bu̱ nundxa̱ʼwa̱: “¡Ataxíyáa! ¡Ataxíyáa!”. Soldados nixpajtii, nijndujtáʼ ga̱jma̱a̱ nixnáá. Nirigu mbá corona rí nini ga̱jma̱a̱ tsuwanʼ náa edxu̱u̱ ga̱jma̱a̱ nitsijmaa ma̱ngaa nithi: “¡Wajtsaʼlo, rey ndrígu̱ún judíos!”. Pilato niʼthún mbu̱júu̱ xa̱bu̱: “Ikhúúnʼ nda̱yo̱o̱ rí xa̱bu̱ bugi̱ na̱nguá gíʼdoo aʼkhúun”. Mú ikhiin nindxa̱ʼwa̱: “¡Atadujmaa náa ixi̱!”. Ikha jngó Pilato nixnáxi̱i̱ Jesús mu muxiyáa.

Ikhú, nigún ku̱ya̱a̱ Jesús náa mbaaʼ rí nagumbiʼyuu Gólgota. Nidujmaa náa ixi̱ ga̱jma̱a̱ niniñaaʼ ikhí. Jesús niʼtákáñuu Jeobá: “Anu̱ʼ, atani mba̱a̱ a̱jkia̱nʼ xtañún numuu rí tséyáá rí eni”. Xa̱bu̱ nutsijmaa Jesús índo̱ nithi: “¡Á mu ni̱ndxa̱ʼ A̱ʼdióo Dios, arajtaʼ náa ixi̱ ga̱jma̱a̱ atanikríyaminaʼ!”.

Mbáa xa̱bu̱ bi̱ naʼni dí ra̱májánʼ bi̱ frajkhaa náa níjniúu Jesús niʼthí: “Garmáʼáan a̱jkia̱nʼ xta̱yo̱ʼ índo̱ gáta̱ʼa̱ʼ náa Reino ndrígáʼ”. Jesús nixná ajngóo: “Maraxtaa ga̱jma̱á ni̱ndxu̱ʼ náa Ku̱ba̱ʼ mitsaan”. Rí wakhííʼ, niʼni kríná ajtsú hora. Tikhun xa̱bi̱i̱ ndrígóo niguanún mijngii náa ixi̱ náa nidujmaa, ma̱ngaa María, ru̱dúu̱ Jesús. Ikhaa nindo̱ʼo̱o̱ Juan rí mañewu̱u̱n María, asndu xóo ru̱dúu̱ ganindxu̱u̱.

Nda̱wa̱á, Jesús niʼthí: “¡Nimbánuu!”. Nikruígú edxu̱u̱ ningátiyaʼ iwáá xu̱ʼ. Ikhú, niʼxma gakhi̱i̱ wéñuʼ. Cortina ndrígóo templo rí gruájkha̱ tapa náa Kaʼwu ga̱jma̱a̱ Náa rí phú mikaʼwu wéñuʼ nithu mbá tu̱mba̱a̱. Ikhú, mbáa oficial ndrígóo ejército niʼthí: “Gajkhun rí bugi̱ nindxu̱u̱ A̱ʼdióo Dios”.