Bi̱ nañewu̱u̱n guʼwá e̱jua̱nʼ najmañuu rí gajkhun

Náa xuajen Filipos, nixtáa mbáa wáxá bi̱ ndaʼyoo rí muguaʼnii xa̱bu̱ nda̱wa̱á numuu rí nigiʼdaa mbáa xa̱bu̱ wéñiʼ awúu̱n. Bi̱ nañajunʼ gajmíi̱n nudaʼ wéñuʼ mbújkha̱a̱ ga̱jma̱a̱ numuu rí naʼni. Índo̱ Pablo ga̱jma̱a̱ Silas niguánu náa Filipos, ikhaa ni̱jkha̱ kidxu̱únʼ mba̱yu̱ʼ mbiʼi. Xa̱bu̱ wéñiʼ naʼni dí ikhaa mandxaʼwá: “Xa̱bu̱ bugi̱ ni̱ndxu̱ún xa̱bi̱i̱ Dios bi̱ xtáa mitsídánʼ”. Nda̱wa̱á, Pablo niʼthúu̱n xa̱bu̱ wéñiʼ: “¡Natañájuanʼ ga̱jma̱a̱ numuu mbiʼyuu Jesús rí agajnáʼ náa ikhaa!”. Ga̱jma̱a̱ xa̱bu̱ wéñiʼ nigájnuu náa dxáʼgú.

Índo̱ xa̱bu̱ bi̱ nañajunʼ gajmíi̱n wáxá ndiyáá rí nánguá makhánun mbújkha̱a̱ ga̱jma̱a̱ numuu ikhaa, nikiʼníin wéñuʼ. Nixmajtaa Pablo ga̱jma̱a̱ Silas náa Xa̱bu̱ Ñajunʼ, bi̱ nduyáá xtángoo, ga̱jma̱a̱ nithúún: “¡Xa̱bu̱ bugi̱ na̱nguá enimbu̱ún xtángoo ga̱jma̱a̱ kuwa runinduwiinʼ xa̱bu̱ xuajen!”. Bi̱ nduyáá xtángoo nitañajunʼ rí muxnáá Pablo ga̱jma̱a̱ Silas ga̱jma̱a̱ rí muxudiinʼ náa guʼwá e̱jua̱nʼ. Bi̱ nañewu̱u̱n guʼwá e̱jua̱nʼ nikudiinʼ asndu itháan ñuʼún náa itháan mikríná. Ma̱ngaa nixudiinʼ náa cepo, xóo muʼthá nixuda̱ʼ rajkúún náa mbá xajpa.

Ikhú, Pablo ga̱jma̱a̱ Silas nigi̱ʼdi̱i̱ nini ajmúú mu muni mba̱a̱ Jeobá índo̱ eʼwíínʼ bi̱ kuwa náa guʼwá e̱jua̱nʼ nudxawíín. Nda̱a̱ tsu̱ma̱, índo̱ tikhu nduʼun, niʼxma gakhi̱i̱ wéñuʼ rí asndu niʼba̱a̱n guʼwá. Nimbaʼtoo xúgíʼ xkrugua ga̱jma̱a̱ nixtajkhúʼ cadena ga̱jma̱a̱ cepo ndrígu̱ún xa̱bu̱ bi̱ kuwa náa guʼwá e̱jua̱nʼ. Bi̱ nañewu̱u̱n guʼwá e̱jua̱nʼ nito̱ʼo̱o̱ ragáyúu asndu náa awúu̱n guʼwá e̱jua̱nʼ. Nikumu̱u̱ rí xúgínʼ xa̱bu̱ bi̱ kajchún náa guʼwá e̱jua̱nʼ nigáñun, ikha jngó nigujtuun mbá espada mu maxíyaminaʼ.

Ikhú, Pablo nindxa̱ʼóo: “¡Xátani gawuminaʼ! ¡Xúgiáanʼ kúwáanʼxu gi̱i̱!”. Xa̱bu̱ bi̱ nañewu̱u̱n guʼwá e̱jua̱nʼ nigáyúu náa wíji̱ Pablo ga̱jma̱a̱ Silas ga̱jma̱a̱ nismbátigo̱o̱ náa inún ikhiin. Niraxu̱u̱n: “Ndiéjunʼ eyóoʼ mani mu makríñunʼ rá.” Ikhiin niriʼña̱a̱: “Ikháánʼ gajmiáanʼ bi̱ kuwa náa guʼwáaʼ gíʼmaa rí munimbu̱ún kuyáá Jesús”. Ikhú Pablo ga̱jma̱a̱ Silas nigi̱ʼdi̱i̱ nisngáá ajngóo Jeobá, ga̱jma̱a̱ bi̱ nañewu̱u̱n guʼwá e̱jua̱nʼ ga̱jma̱a̱ xúgínʼ bi̱ kuwa náa goʼwóo nijngún iyááʼ.