Carta ndrígóo Cuerpo Gobernante

A̱ngiu̱xu:

Bi̱ nduʼyamajkuíí Jeobá nanduxu ku̱ya̱a̱ Ajngá rawunʼ rí nindxu̱u̱ Biblia. Ndu̱ya̱a̱xu májánʼ rí náa libro rúʼko̱ nuxkamaaxu historia rí gajkhun, xtágabu rí májánʼ rí xú káʼnii gakuwáanʼ ga̱jma̱a̱ rí nasngájma rí Jeobá nandoo kaʼñún xa̱bu̱ numbaaʼ (Salmo 119:105; Lucas 1:3; 1 Juan 4:19). Nanduxu mumbáñuun eʼwíínʼ mu majmañún rí gajkhun rí gíʼdoo wéñuʼ numuu rí na̱ʼkha̱ náa Ajngá rawunʼ Dios. Ga̱jma̱a̱ numuu rúʼko̱, nadxuxu musngajmála libro rígi̱: Ikha rí najmañuʼ náa Biblia. Guniʼñúxu mutala tikhuu ikha rí na̱ʼkha̱ náa i̱yi̱i̱ʼ rígi̱.

Libro rígi̱ niguma májánʼ mu muraxnuu e̱ji̱n. Mú ma̱ngaa mambáñun wéñuʼ xa̱bu̱ guanuu bi̱ nandún majmañún itháan ga̱jma̱a̱ numuu Biblia. Ga̱jma̱a̱ numuu rí Biblia nindxu̱u̱ mbá libro mu muraxnuu xúgínʼ xa̱bu̱ numbaaʼ, xúgiáanʼ mambáyulúʼ ikha rí na̱ʼkha̱ ikhí, numuu dí mambáyulúʼ makuwáanʼ tsímáá.

Xúgíʼ rígi̱ nigájnuu náa Biblia, libro rígi̱ na̱ʼkha̱ raʼthí xú káʼnii nigi̱ʼdu̱u̱ nikuwa xa̱bu̱ numbaaʼ. Niguma mbá tsiakii mu magumaraʼmáʼ kaʼwu, dí xáʼni mingíjyúuʼ wéñuʼ ga̱jma̱a̱ rí magumaraʼmáʼ mámbá rí xú káʼnii ni̱jkha̱ rarígá.

Mú náa libro rígi̱, raʼkháa i̱ndó na̱ʼkha̱ raʼthí numuu historias rí nirígá nákha wajyúúʼ. Xó má rí na̱ʼkha̱ raʼthí ga̱jma̱a̱ xtiʼkhu, nigumaratáá mu makujmaa itháan májánʼ ga̱jma̱a̱ masngájma rí nikumu̱ún xa̱bu̱ bi̱ nikuwa wajyúúʼ.

I̱yi̱i̱ʼ rígi̱ nasngájmulúʼ rí Biblia nindxu̱u̱ mbá libro rí na̱ʼkha̱ raʼthí ga̱jma̱a̱ numún xa̱bu̱: Bi̱ ninimbu̱ún kuyáá Jeobá ga̱jma̱a̱ bi̱ túnimbu̱ún. Ma̱ngaa nambáyulúʼ majmañulúʼ ikha ndrígu̱ún xa̱bu̱ bi̱ nikuwa nákha ikhú (Romanos 15:4; 1 Corintios 10:6). Libro rígi̱ naguiʼtóo mbá 14 secciones. Mámbá índo̱ nagi̱ʼdu̱u̱, naʼthí rí phú itháan gíʼdoo numuu rí ma̱ndoo majmañulúʼ.

Á mu ikháánʼ xtaʼdiin e̱ji̱n, ma̱ndoo matraxnuu mbá capítulo gajmiáanʼ, ga̱jma̱a̱ xúgiáanʼ ma̱ndoo muthala xtiʼkhuu rí na̱ʼkha̱ ikhí. Nda̱wa̱á ma̱ndoo matraxnuu textos rí na̱ʼkha̱ náa Biblia náa nagájnuu rí na̱ʼkha̱ náa capítulo. Atambáyii a̱ʼdiáaʼ mu mbaʼyoo rí kagujtuminaʼ náa Biblia ga̱jma̱a̱ mámbá ikha rí naʼsngáa náa mámbá capítulo rí na̱ʼkha̱ náa libro. Xúʼko̱ má ma̱ndoo matani mu matambáyii mbáa xa̱bu̱ nikhi̱i̱ majmañuu itháan rí naʼthí náa Biblia.

Nanduxu rí i̱yi̱i̱ʼ rígi̱ mambáñun xa̱bu̱ bi̱ guáʼdáá mbá a̱jkiu̱ún májánʼ, xó má jiáma ga̱jma̱a̱ xa̱bu̱ guanii, majmañún Ajngá rawunʼ Dios. Ga̱jma̱a̱ mugími̱jna̱ munimbánii ikha rígi̱ náa vida ndrígu̱ún. Xúʼko̱ mangiin ma̱ndoo mbuyamajkuíí Jeobá ga̱jma̱a̱ maguanu mani̱ndxu̱ún e̱ji̱i̱n ikhaa.