KÍXNUU 13
Religión rí mindu̱wa̱ʼ nunigachíí mbiʼyuu Dios
Á mu rí Dios nandoo kaʼyulú. Náá numuu dí religión bi̱ nuthi rí ni̱ndxu̱ún xa̱bi̱i̱ Dios nuni̱ dí raʼkhí kayuuʼ rá. Numuu dí ikhiin ni̱ndxu̱ún religión minduwaʼ. Rí nusngáa ga̱jma̱a̱ rí nuni̱, naʼni gachúu mbiʼyuu Dios. Xú káʼnii nini̱ gachíí xá. Xú káʼnii ku̱mu̱u̱ Dios índo̱ ndaʼyoo rígi̱ rá. Ndiéjunʼ gáʼni ikhaa xá.
1. Xú káʼnii nini̱ gachíí mbiʼyuu Dios religión rí mindu̱wa̱ʼ ga̱jma̱a̱ dí nusngáa rá.
Religión rí mindu̱wa̱ʼ “niriʼkui̱i̱ rí gajkhun ndrígóo Dios ga̱jma̱a̱ rí mindu̱wa̱ʼ” (Romanos 1:25). Mbá xkri̱da, religión rúʼko̱ tsésngúún xa̱bu̱ mbiʼyuu Dios. Mú, náa Biblia naʼthí rí gíʼmáanʼ majmulú (Romanos 10:13, 14). Tikhun xa̱bu̱ ede̱ bi̱ kúwá náa religión rí mindu̱wa̱ʼ nuthi rí Dios eyoo marigá, índo̱ narígá mbá gamiéjunʼ. Mú mindu̱wa̱ʼ nindxu̱u̱ rúʼko̱. Dios nditháan ragíʼdoo aʼkhúun ga̱jma̱a̱ xúgíʼ dí ra̱májánʼ narígá (atraxnuu Santiago 1:13). Phú migíná índo̱ nduʼyáá rí mindu̱wa̱ʼ xóo rígi̱ naʼni rí xa̱bu̱ matsíngu̱únʼ náa Dios.
2. Xú káʼnii nini̱ gachíí mbiʼyuu Dios religión rí mindu̱wa̱ʼ ga̱jma̱a̱ rí nuni̱ rá.
Religión rí mindu̱wa̱ʼ tséniu̱u̱n xa̱bu̱ xó má eʼni Jeobá. Náa Biblia naʼthí dí “aʼkhá ndrígóo nixtagujxu̱u̱ asndu mekhuíí” (Apocalipsis 18:5). Mba̱yu̱u̱ʼ tsiguʼ religión rí mindu̱wa̱ʼ nuxudamíjna̱ náa político, nuyambáá náa guerra ga̱jma̱a̱ nuradíin o nuniña̱a̱nʼ rí makhañún mbaʼin xa̱bu̱. Tikhun xa̱bu̱ ede̱ bi̱ kúwá náa religión rí mindu̱wa̱ʼ nuni tsiʼyámijná ga̱jma̱a̱ nunduʼu̱u̱n mbújkha̱a̱ bi̱ nagún náa religión rúʼko̱ mu muphiʼtsu ga̱jma̱a̱. Rí nuni̱ xígi̱ nusngajma rí nditháan tséniʼniiʼ Dios. Ikha jngóo, xú káʼnii lá gándoo gánindxu̱ún xa̱bi̱i̱ Dios á mu xúʼko̱ eni̱ xá. (Atraxnuu 1 Juan 4:8.)
3. Xú káʼnii kumuu Dios índo̱ ndaʼyoo xúgíʼ dí nuni̱ religión rí mindu̱wa̱ʼ rá.
Á mu ikháán tsénigua̱a̱ʼ kayuuʼ xúgíʼ rí nuni̱ religión mindu̱wa̱ʼ, ¡iwáá lá Jeobá rá! Ikhaa nandoo kaʼñún xa̱bu̱, mú nakiʼnáa kaʼñún xa̱bu̱ edi̱ bi̱ kúwá náa religión rí mindu̱wa̱ʼ numuu dí nuni gachíí mbiʼyuu ma̱ngaa nuni gíníin bi̱ nagún ikhí. Dios nakudaminaʼ rí maʼnigámbáa religión rí mindu̱wa̱ʼ “ga̱jma̱a̱ nánguá mata̱nga̱a̱ marigá” (Apocalipsis 18:21). Gítháán má tígo̱o̱ dí mambáa xúgíʼ religión rí mindu̱wa̱ʼ (Apocalipsis 18:8).
GAJMAÑAAʼ ITHÁAN
Guʼyáá itháan xú káʼnii ku̱mu̱u̱ Jeobá ga̱jma̱a̱ numuu religión rí mindu̱wa̱ʼ. Ma̱ngaa mbuʼyáá itháan ndiéjunʼ rí ikhiin nini̱. Ga̱jma̱a̱ nda̱wa̱á, mbuʼyáá náá numuu dí ragíʼmaa marikha̱a̱ʼ rí majmañaaʼ itháan ga̱jma̱a̱ numuu Jeobá dí xóo ikhiin nuni̱.
4. Dios tsíyoo gáʼyoo xúgíʼ religión
Mbaʼin xa̱bu̱ nakumu̱ún dí religión dí rígá nindxu̱u̱ mixtiʼkhu kamba̱a̱ rí na̱jkha̱ kaguánʼ náa Dios. Lá gajkhun rúʼko̱ ráʼ. Guraxnuu Mateo 7:13, 14 ga̱jma̱a̱ gutamíjnála rígi̱:
Xó má naʼthí náa Biblia, xú káʼnii nindxu̱u̱ kamba̱a̱ rí na̱jkha̱ kaguán makuwáánʼ rá.
Gu̱ya̱a̱ VIDEO ga̱jma̱a̱ gutamíjnála rígi̱:
Lá nandoo kaʼyoo Dios xúgíʼ religión, eʼthí Biblia ráʼ.
5. Religión rí mindu̱wa̱ʼ tsésngájma ngajua ndrígóo Dios
Mbaʼa xóo nini̱ gachíí mbiʼyuu Dios religión rí mindu̱wa̱ʼ, mbá rí ikhaa nindxu̱u̱ dí nuyambáá índo̱ narígá guerra. Mu mbuʼyáálú mboʼ, gu̱ya̱a̱ VIDEO. Ga̱jma̱a̱ gutamíjnála rígi̱:
Ndiéjunʼ nini̱ mbaʼin bi̱ kúwá náa guʼwá dxájkuun nákha nirígá Ragajma Guerra náa xúgíʼ Numbaaʼ rá.
Ndiéjunʼ tatsaʼwáminaʼ ikháán dí xúʼko̱ nini̱ xá.
Guraxnuu Juan 13:34, 35 ma̱ngaa 17:16. Ga̱jma̱a̱ gutamíjnála rígi̱:
Xú káʼnii eku̱mu̱u̱ Jeobá índo̱ ndaʼyoo dí religión nuxudamíjna̱ náa guerra xá.
Religión rí mindu̱wa̱ʼ gíʼdoo aʼkhúun náa mbaʼa dí ra̱májánʼ narígá ga̱jma̱a̱ tsésngajma ngajua ndrígóo Dios. Ndiéjunʼ nitayáá ikháán rí nasngájma dí xúʼko̱ rígá rá.
Religión rí mindu̱wa̱ʼ na̱nguá nisngájma ngajua ndrígóo Dios.
6. Dios nandoo maguwíín xa̱bu̱ náa religión rí mindu̱wa̱ʼ
Guraxnuu Apocalipsis 18:4a ga̱jma̱a̱ gutamíjnála rígi̱:
Dios nandoo maguwíín xa̱bu̱ náa religión rí mindu̱wa̱ʼ náa kúwá raguma nduwiinʼ. Xú káʼnii eʼni maku̱ma̱a̱ʼ ikháán rígi̱ rá.
7. Atatsiniiʼ itháan Dios bi̱ gajkhun
Lá gíʼmaa matatsaʼwamínáʼ dí raʼkhí ga̱jma̱a̱ numuu Dios, ga̱jma̱a̱ numuu dí religión mindu̱wa̱ʼ nini̱ dí raʼkhí ráʼ. Atatsaʼwáminaʼ xóo eʼni mbáa ada̱ bi̱ tséʼnimbo̱o̱ consejo rí naxnúu anu̱u̱, nagájnuu na̱jkha̱ ga̱jma̱a̱ naʼni dí ra̱májánʼ. Xa̱bu̱ nikhi̱i̱ tsénigu̱u̱ʼ xú káʼnii xtáa a̱ʼdióo. Lá májánʼ gáʼni muʼthá dí xa̱bu̱ nikhi̱i̱ gíʼdoo aʼkhúun rí xóo xtáa a̱ʼdióo bi̱ tséʼnimbo̱o̱ ráʼ.
Lá májánʼ gáʼni muʼthá dí Jeobá gíʼdoo aʼkhúun ga̱jma̱a̱ numuu xúgíʼ dí naʼni religión rí mindu̱wa̱ʼ ma̱ngaa muniʼñááʼ rajmañulu ga̱jma̱a̱ numuu ikhaa xáʼ.
RÍ NUTHI TIKHUN: “Ikhúún nditháan tsíyóʼ gáyóo ga̱jma̱a̱ numuu Dios; numuu dí religión nuni̱ raʼkhí kayuuʼ”.
Lá xúʼko̱ ku̱ma̱a̱ʼ mangáánʼ ráʼ.
Náá numuu ragíʼmaa mundxaʼwamíjna̱ dí raʼkhí ga̱jma̱a̱ numuu Jeobá, numuu dí religión mindu̱wa̱ʼ nini dí raʼkhí ráʼ.
RÍ NAGÁJNURIYO̱O̱ʼ
Religión rí mindu̱wa̱ʼ nini̱ gachíí mbiʼyuu Dios ga̱jma̱a̱ rí nusngáa ma̱ngaa xúgíʼ ra̱májánʼ rí nini̱, ikha jngóo Dios nánguá mba̱yu̱u̱ʼ maʼnigámbáa.
Rí nijmañaaʼ
Ndiéjunʼ tatsaʼwáminaʼ ikháán ga̱jma̱a̱ numuu rí nini̱ ma̱ngaa dí nisngáa religión rí mindu̱wa̱ʼ rá.
Xú káʼnii eʼyoo Jeobá religión rí mindu̱wa̱ʼ rá.
Ndiéjunʼ gáʼniuu religión rí mindu̱wa̱ʼ Dios rá.
ATAYÁÁ ITHÁAN
Mbaʼa religión, rígá a̱jma̱ rí nuni dí Dios tsénigu̱u̱ʼ, atayáá náá guáʼyaaʼ nindxu̱u̱.
“Lá numbayúlú mu makuwáánʼ mijngii náa Dios xúgíʼ religión ráʼ.” (Artículo dí rígá náa jw.org)
Náá numuu dí Jeobá nandoo mbuʼyamajkuíí mbájnduʼ raʼkháa ndajkuánʼlú rá.
“Lá ndayóoʼ makuwáanʼ náa mbá religión ráʼ.” (Artículo dí rígá náa jw.org)
Mbáa dxajkun niʼni a̱jma̱ a̱jkiu̱u̱n náa religión ndrígóo. Mú rúʼko̱ tárikhoo mu majmañuu dí gajkhun ga̱jma̱a̱ numuu Dios.
“Mbáa dxajkun niniñuuʼ ranindxu̱u̱ dxajkun” (¡Awaxunʼ!, gu̱nʼ febrero tsiguʼ 2015)
Mba̱yu̱u̱ʼ tsiguʼ religión nithi rí mindu̱wa̱ʼ ga̱jma̱a̱ numuu Dios ma̱ngaa nini̱ mbuyáá xa̱bu̱ rí Dios tsíxmiéjuunʼ ga̱jma̱a̱ nindxu̱u̱ ra̱májáanʼ. Atayáá náá nikumu̱u̱ ajtsú mindu̱wa̱ʼ rúʼko̱.
“Mindu̱wa̱ʼ rí natsíngulú náa Dios” (Bi̱ Nayejngoo, 1 ñajunʼ gu̱nʼ noviembre tsiguʼ 2013)