KÍXNUU 37
Dí naʼthí náa Biblia numuu ñajunʼ ga̱jma̱a̱ mbújkha̱a̱
Lá nirígá mbá miʼtsu rí nixmiéjuaanʼ wéñuʼ ga̱jma̱a̱ numuu ñajunʼ o ga̱jma̱a̱ numuu mbújkha̱a̱ rá. Mbáa nguáná naʼni mingíjyúuʼ mbuʼyamajkuíí Jeobá xó má kaʼyoo ga̱jma̱a̱ ikháá má mbiʼi nduʼyáʼ mbújkha̱a̱ mu mu̱ʼtsi̱ dí ndayúlú. Mú náa Biblia naxnúlú ikha rí mambáyulú.
1. Ndiéjunʼ eʼthí náa Biblia ga̱jma̱a̱ numuu ñajunʼ rá.
Dios nandoo rí manigulúʼ muʼni ñajunʼ ndrígúlú. Ma̱ngaa náa Biblia naʼthí “nda̱a̱ imbo̱ʼ rí itháan májánʼ rí […] mbaʼyoo rí májánʼ ga̱jma̱a̱ numuu ñajunʼ ndrígóo” mbáa xa̱bu̱ (Eclesiastés 2:24). Jeobá nañajunʼ wéñuʼ. Índo̱ nduʼyaridáá ga̱jma̱a̱ ni̱ndxu̱lú mbáa bi̱ nañajunʼ, kuwáánʼ ru̱ʼni̱ dí ikhaa naniguuʼ ga̱jma̱a̱ naʼni dí maʼdxuu a̱jkiu̱lú.
Gajkhun má rí gíʼdoo numuu ñajunʼ, mú nditháan ragíʼmaa mbuʼyáá rí itháan gíʼdoo numuu ikhaa ki xóo mbuʼyamajkuíí Jeobá (Juan 6:27). Ikhaa nakudaminaʼ rí maxnúlúʼ dí gáʼyóoʼ makuwáánʼ ga̱jma̱a̱, á mu nuʼgíʼ nuʼni ginii ñajuunʼ ikhaa.
2. Xú káʼnii gíʼmaa mbuʼyáá mbújkha̱a̱ rá.
Gajkhun má náa Biblia naʼthí dí “mbújkha̱a̱ ni̱ndxu̱u̱ mbóʼ dí mañe̱wa̱a̱nʼ”, mú ma̱ngaa naʼthí dí xándoo makuwáánʼ gagi á mu naguáʼdáá i̱ndó mbújkha̱a̱ (Eclesiastés 7:12). Ikha jngóo, náa Biblia naʼthí dí xánigulú mbújkha̱a̱ ga̱jma̱a̱ naxnulú rígi̱: “Gaʼdxalá ga̱jma̱a̱ rí kuaʼdáá” (atraxnuu Hebreos 13:5). Índo̱ nakuwáánʼ gagi ga̱jma̱a̱ má rí kuaʼdáá, naʼni dí xaxmiéjunlúʼ mbuʼyáʼ má xúʼko̱ itháan. Ga̱jma̱a̱ naʼni rí xágiʼmáánʼ (Proverbios 22:7). Ma̱ngaa naʼni rí xánigulú muʼtsíin ga̱jma̱a̱ numuu mbújkha̱a̱ ni má rí mbuʼyáʼ náa ma̱ndoo maʼni rí maguaʼdáá mbújkha̱a̱ mbá nacha̱.
3. Xú káʼnii gájmulúʼ mbújkha̱a̱ xó má kaʼyoo rá.
Jeobá nindxu̱u̱ mbáa Dios bi̱ naxná dí gíʼdoo ga̱jma̱a̱ ikháanʼ nduʼyaridáá índo̱ “nuxnún rí kuaʼdáá eʼwíinʼ bi̱ nda̱ñúunʼ” (1 Timoteo 6:18). Mbá rí xóo ma̱ndoo majmulú mbújkha̱a̱ nindxu̱u̱ rí muxná mu majmaa náa congregación ga̱jma̱a̱ rí mumbáñuun bi̱ nda̱ñúunʼ, itháan bi̱ ni̱ndxu̱ún a̱ngiu̱lú náa nagimbáanʼ. Rí phú ndaʼyoo Jeobá nindxu̱u̱ náá numuu rí nuxná mbújkha̱a̱ raʼkháa nguáthá mba̱a̱ exná. Á mu nuxná xó má kaʼyoo ga̱jma̱a̱ xúgíʼ a̱jkiu̱lú, makuwáánʼ gagi ga̱jma̱a̱ muʼni rí maʼdxuu a̱jkiu̱u̱n Jeobá (atraxnuu Hechos 20:35).
GAJMAÑAAʼ ITHÁAN
Guʼyáá ndiéjunʼ gambáyulú rí mbuʼyáá awa̱án ñajunʼ ga̱jma̱a̱ rí xúʼyáʼ maguaʼdáá itháan.
4. Atani mba̱a̱ Jeobá ga̱jma̱a̱ numuu rí nindxa̱a̱ʼ mbáa bi̱ nañajunʼ májánʼ
Rí nambáxulúʼ gajmiúlú Jeobá gíʼmaa maʼni rí mbuʼyáá awa̱án ñajunʼ. Gu̱ya̱a̱ VIDEO ga̱jma̱a̱ gutamíjnála rígi̱:
Ndiéjunʼ rí itháan nitayáá xóo niʼni ga̱jma̱a̱ xóo ninindxu̱u̱ Jason náa niñajunʼ rá.
Ndiéjunʼ niʼni mu mbaʼyoo awa̱án ñajunʼ xá.
Guraxnuu Colosenses 3:23, 24 ga̱jma̱a̱ gutamíjnála rígi̱:
Ndíjkha rí gíʼdoo wéñuʼ numuu rí muñajunʼ ‹ga̱jma̱a̱ xúgíʼ tsiakii ndrígúlú› rá.
Ñajunʼ gíʼdoo numuu, mú xuʼyáá dí ikhaa gíʼdoo itháan numuu ki xóo muʼni ñajuunʼ Jeobá.
5. Rí nayambáá dí maʼdxulu ga̱jma̱a̱ dí kuaʼdáá
Mbaʼin xa̱bu̱ nunimi̱jna̱ murajxi̱i̱ xúgíʼ mbújkha̱a̱ xóo eʼngo̱o̱, mú mixtiʼkhu dí e̱ʼkha̱ raʼthí náa Biblia. Guraxnuu 1 Timoteo 6:6-8 ga̱jma̱a̱ gutamíjnála rígi̱:
Ndiéjunʼ eʼthúlú náa Biblia rá.
Ma̱ndoo makuwáánʼ gagi maski ajndu na̱nguá kuaʼdáá wéñuʼ. Gu̱ya̱a̱ VIDEO ga̱jma̱a̱ gutamíjnála rígi̱:
Ndíjkha rí kúwá gagi mbá guʼwíin bugi̱ maski ajndu na̱nguá guaʼdáá wéñuʼ mbújkha̱a̱ rá.
Á mu kuaʼdáá má wéñuʼ ga̱jma̱a̱ nandulú xóó maguaʼdáá itháan rá. Jesús nijmuu mbá xkri̱da mu maʼthí dí rúʼko̱ nindxu̱u̱ migamíi wéñuʼ. Guraxnuu Lucas 12:15-21 ga̱jma̱a̱ gutamíjnála rígi̱:
Ndiéjunʼ eʼsngáaʼ ikháán xkri̱da dí niʼthí Jesús rá. (Gu̱ya̱a̱ náa versículo 15).
Guraxnuu Proverbios 10:22 ga̱jma̱a̱ gu̱ni̱ mbríguii ma̱ngaa dí naʼthí náa 1 Timoteo 6:10. Nda̱wa̱á gutamíjnála rígi̱:
Ndiéjunʼ kuma̱a̱ʼ ikháán dí gíʼdoo itháan numuu, rí mambáxulu gajmiúlú Jeobá o rí maguaʼdáá wéñuʼ mbújkha̱a̱ dxe̱ʼ. Náá numuu rá.
Ndiéjunʼ gárígá á mu nanigua̱a̱ʼ wéñuʼ mbújkha̱a̱ rá.
6. Jeobá má gáxnulú rí ndayúlú
Índo̱ nda̱a̱ ñajunʼ ma̱ngaa índo̱ nda̱a̱ mbújkha̱a̱ nambáyulúʼ mbuʼyáá nguáthá ekumulúʼ kuʼyáá Jeobá. Gu̱ya̱a̱ VIDEO mu mbuʼyáá xóo gúraʼníí xkujndu xóo rúʼko̱ ga̱jma̱a̱ nda̱wa̱á gutamíjnála rígi̱:
Ndiéjunʼ xkujndu ndiyóoʼ maraʼnuu ndxájulú bi̱ na̱ʼkha̱ náa video rá.
Ndiéjunʼ ndiyóoʼ maʼni mu xákawabaaʼ xá.
Guraxnuu Mateo 6:25-34 ga̱jma̱a̱ gutamíjnála rígi̱:
Ndiéjunʼ ekudaminaʼ maxnúún Jeobá bi̱ nuni ñajuunʼ ikhaa ginii rá.
RÍ NUTHI TIKHUN: “Na̱nguá xóo maʼgá reunión xúgíʼ xmáná numuu rí ndayóoʼ mañajunʼ wéñuʼ mu maxnuu dí nda̱ñúunʼ bi̱ kúwá náa goʼwóʼ”.
Xú káʼnii texto ndrígóo Biblia naʼni ma̱ta̱ya̱a̱ ikháán dí muʼni ginii ñajuunʼ Jeobá nindxu̱u̱ itháan májánʼ rá.
RÍ NAGÁJNURIYO̱O̱ʼ
Ñajunʼ ga̱jma̱a̱ mbújkha̱a̱ gíʼdoo numuu, mú nditháan ragíʼmaa marikhulú dí muʼni ñajuunʼ Jeobá.
Rí nijmañaaʼ
Ndiéjunʼ gámbáyaaʼ ma̱ta̱ya̱a̱ awa̱án ñajunʼ rá.
Ndiéjunʼ eñambáá rí xatáʼyaʼ maraʼdáá itháan rá.
Á mu Jeobá nakudaminaʼ rí maxnúún rí nda̱ñúunʼ xa̱bi̱i̱, xú káʼnii gatasngajmá rí nakumaaʼ xtayáá xá.
ATAYÁÁ ITHÁAN
Atayáá á mu náa Biblia naʼthí dí mbújkha̱a̱ nindxu̱u̱ ra̱májánʼ.
Atayáá xú káʼnii gíʼmaa maraxna dí naʼni maxtáa gagi Jeobá.
“Ndiéjunʼ eʼthí náa Biblia ga̱jma̱a̱ numuu dí maraxna rá.” (Artículo dí rígá náa jw.org)
Lá raʼkhí maratsíin ga̱jma̱a̱ numuu mbújkha̱a̱ ráʼ.
“Dí na̱ʼkha̱ raʼthí náa Biblia: Gitsíin náa nuda̱a̱ʼ mbújkha̱a̱” (¡Awaxunʼ!, marzo tsiguʼ 2015)
Atayáá ndiéjunʼ nixkaxi̱i̱ mariʼkumináaʼ mbáa xa̱bu̱ bi̱ niʼtsíin ma̱ngaa numuu mbújkha̱a̱ ga̱jma̱a̱ niʼnikúwáʼ.
“Biblia niriʼkhu̱u̱ rí xóo makuwá” (Bi̱ Nayenjgoo, 1 ñajunʼ gu̱nʼ noviembre tsiguʼ 2011)