KÍXNUU 49
Xú káʼnii gándoo gákuwáanʼ gagi mbá guʼwáanʼ (níʼkhóo 1)
Bi̱ ndiʼkhún nidamijná naguáʼthi̱i̱n makuwá gagi má xúʼko̱ xúgíʼ mbiʼi rí gakúwi̱i̱n xó má gagi rí nikúwá nákha nidamijná. Ma̱ndoo makuwá xúʼko̱. Numuu rí xúʼko̱ niguánu ndiyáá cristianos bi̱ mbayuuʼ má nidamijná ga̱jma̱a̱ nuni tsiakimijna munimbánii consejo dí na̱ʼkha̱ náa Biblia.
1. Ndiéjunʼ consejo rí na̱ʼkha̱ náa Biblia na̱jkha̱ inuu xa̱biya̱ bi̱ ninigúnʼ rá.
Jeobá nixnúu ñajunʼ xa̱bu̱ bi̱ ninigúnʼ rí ikhaa gayeʼga edxu̱u̱ náa goʼwóo (atraxnuu Efesios 5:23). Ga̱jma̱a̱ ikhaa nagiʼthu̱u̱n rí garaʼwíi maʼni mambáñuun bi̱ kúwá náa goʼwóo. Ikha jngóo Biblia naxnún consejo rígi̱ bi̱ ninigu̱nʼ: “Gaʼndala kuñu̱u̱n má xúʼko̱ guʼyalaʼ” (Efesios 5:25). Ndiéjunʼ eyoo gáʼthúu̱n rígi̱ rá. Rí xa̱biya̱ bi̱ nandoo kaʼyoo a̱ʼgiu̱u̱ naʼniuu dí májánʼ tséʼniuu má náa kúwá ndajkuíín o náa inún mbaʼin xa̱bu̱. Ma̱ngaa nañewu̱u̱n ga̱jma̱a̱ naʼni xúgíʼ xóo má eʼngo̱o̱ mu maxnúu rí ndayóoʼ ma̱ngaa rí xáxtáa ngíná (1 Timoteo 5:8). Itháan gíʼdoo numuu rí ikhaa gíʼmaa mañewu̱u̱n a̱ʼgiu̱u̱ mu xúʼko̱ mambájxu̱u̱ itháán májánʼ ga̱jma̱a̱ Jeobá (Mateo 4:4). Mbá xkri̱da, ma̱ndoo mutajkáan mbóó ma̱ngaa muraxnuu mbóó Biblia. Á mu xa̱biya̱ nañewu̱u̱n májánʼ a̱ʼgiu̱u̱, xúʼko̱ ma̱ndoo mambajxu̱u̱ itháán májánʼ ga̱jma̱a̱ Jeobá (atraxnuu 1 Pedro 3:7).
2. Ndiéjunʼ consejo rí na̱ʼkha̱ náa Biblia na̱jkha̱ inún gu̱ʼu̱ bi̱ ninújunʼ rá.
Náa ajngá rawuunʼ Dios naʼthí rí a̱ʼgu̱ bi̱ ninújunʼ “gíʼmaa mbaʼyamajkuu wéñuuʼ ajmbio̱o̱” (Efesios 5:33). Xú káʼnii gándoo maʼni xá. Ma̱ndoo mandxaʼwáminaʼ náa májánʼ dí naʼni ajmbio̱o̱ ga̱jma̱a̱ tsiakii rí naʼni mu mañewu̱u̱n ikhaa ma̱ngaa e̱ji̱i̱n. Ma̱ngaa nasngájma gamajkhu náa ajmbio̱o̱ índo̱ nambáyúu dí naraʼwíí maʼni, naʼthúu̱n ga̱jma̱a̱ ajngáa mitsaanʼ ga̱jma̱a̱ naʼthí dí májánʼ numuu ikhaa maski ajndu ajmbio̱o̱ na̱nguá eʼni ñajuunʼ Dios.
3. Xú káʼnii gándoo xa̱bu̱ bi̱ nidamijná maʼndún kuyamijná itháán rá.
Náa Biblia naʼthí ga̱jma̱a̱ numún xa̱bu̱ bi̱ nudamijná rí: “Nájmi̱i̱n maguánu mani̱ndxu̱ún mbóó xuwiʼ” (Mateo 19:5). Rígi̱ nandoo gáʼthúu̱n rí gíʼmaa muniña̱a̱ʼ mbá kayuuʼ rí gamíi maʼni rí xáʼndun kuyamijná. Ikha jngóo gíʼmaa muríyaʼ mbiʼi mu makuwíin mbóó ga̱jma̱a̱ muthi rí nakumu̱ún ma̱ngaa rí nandún kuyamijná. Nduyáá rí ginii Jeobá gíʼdoo itháan numuu, mú nda̱wa̱á dí ikhaa, nimbá ga̱jma̱a̱ nimbáa ragíʼmaa magiʼdoo itháan numuu ki xóo bi̱ ndiya̱a̱. Ikha jngóo nájmi̱i̱n gíʼmaa rí muñewa̱a̱n wéñuuʼ rí xambájxu̱u̱n itháan gajmiún imba̱a̱.
GAJMAÑAAʼ ITHÁAN
Guʼyáá ndiéjunʼ ikha rí na̱ʼkha̱ náa Biblia ma̱ndoo mambáñún bi̱ nidamijná mu maʼndún kuyamijná itháan.
4. Gaʼndaaʼ xtayáá a̱ʼgia̱a̱ʼ ga̱jma̱a̱ atie̱wa̱a̱n
Náa Biblia naʼthí “bi̱ ninigu̱nʼ ndayóoʼ maʼndún kuñún má xúʼko̱ guʼñu̱ún xó má nandún kuyáá xuñúúnʼ” (Efesios 5:28, 29). Ndiéjunʼ eyoo gáʼthúu̱n rígi̱ rá. Gu̱ya̱a̱ VIDEO ga̱jma̱a̱ gutamíjnála rígi̱:
Xú káʼnii gándoo masngájma cualidad rígi̱ náa a̱ʼgiu̱u̱ mbáa xa̱biya̱ rá.
Guraxnuu Colosenses 3:12 ga̱jma̱a̱ gutamíjnála rígi̱:
Xú káʼnii gándoo xa̱biya̱ bi̱ ninigúnʼ rí masngájma cualidad rígi̱ náa bi̱ ndiyáa rá.
5. Gaʼndaaʼ xtayáá ajmbia̱a̱ʼ ga̱jma̱a̱ atayamajkuíí
Biblia naxnúu consejo a̱ʼgu̱ bi̱ ninújunʼ rí gaʼyamajkhuu ajmbio̱o̱, tséʼniuu á mu naʼni ñajuunʼ Jeobá o na̱nguá. Guraxnuu 1 Pedro 3:1, 2 ga̱jma̱a̱ gutamíjnála rígi̱:
Á mu ajmbia̱a̱ʼ tséʼni ñajuunʼ Jeobá, phú gajkhun rí ikháán nandaaʼ rí ikhaa maʼga̱nú maʼni ñajuunʼ Dios: Ndiéjunʼ gámbáyáaʼ rá. Lá dí marataráʼa xúgíʼ mbiʼi xáʼ. O dí matayamajkuíí ga̱jma̱a̱ rí ma̱nindxa̱a̱ʼ mbáa májáanʼ a̱ʼgu̱ dxe̱ʼ. Ndíjkha rí xúʼko̱ tatsaʼwáminaʼ rá.
Xa̱bu̱ bi̱ nidamijná ma̱ndoo muraʼwi̱i̱ mbóó dí muni. Gajkhun má nguáná xaxnáa xóo gutamijná. Á mu xúʼko̱ narígá, a̱ʼgu̱ ma̱ndoo maʼthúu̱n ajmbio̱o̱ ga̱jma̱a̱ gamajkhu rí naku̱mu̱u̱. Mú, gíʼmaa marmáʼáan a̱jkiu̱u̱n dí Jeobá nixnúu ñajunʼ ajmbio̱o̱ dí maraʼwíí maʼni mbá rí mambáñuun bi̱ kúwá náa goʼwóo. Ma̱ngaa ikhaa gíʼmaa maʼni xúgíʼ xóo má eʼngo̱o̱ mu mambáyúu dí naraʼwíi maʼni ajmbio̱o̱, xúʼko̱ gáʼni rí makuwíin gagi mbá guʼwi̱i̱n. Guraxnuu 1 Pedro 3:3-5 ga̱jma̱a̱ gutamíjnála rígi̱:
Xú káʼnii eku̱mu̱u̱ Jeobá índo̱ ndaʼyoo rí a̱ʼgu̱ nasngájma gamajkhu náa ajmbio̱o̱ rá.
6. Xa̱bu̱ bi̱ nidamijná maʼngu̱u̱n muraʼníí xkujndu
Xa̱bu̱ bi̱ nidamijná nimbáa dí ikhiin na̱nguá nindxu̱u̱ jmbii. Ikha jngóo rí xa̱biya̱ ga̱jma̱a̱ a̱ʼgu̱ gíʼmaa rí muñajunʼ mbóó mu xúʼko̱ maʼngu̱u̱n muraʼníí xkujndu. Gu̱ya̱a̱ VIDEO ga̱jma̱a̱ gutamíjnála rígi̱:
Xóo má nitayáá náa video, ndiéjunʼ niʼni rí xa̱bu̱ gajmii muni tsingumijná rá.
Ndiéjunʼ nini mu makuwá májánʼ mbu̱júu̱ʼ xá.
Guraxnuu 1 Corintios 10:24 ma̱ngaa Colosenses 3:13. Nda̱wa̱á índo̱ guraxnuu mámbá versículo, gutamíjnála rígi̱:
Ndíjkha rí nakúwá itháan májánʼ xa̱bu̱ gajmii índo̱ nunimbánii consejo rígi̱ rá.
Náa Biblia naʼthí rí gíʼmaa mbuʼyamajkumijnálu, rígi̱ nandoo gáʼthúu̱n rí muʼni̱i̱ rí májánʼ. Guraxnuu Romanos 12:10 ga̱jma̱a̱ gutamíjnála rígi̱:
Lá gíʼma magiʼthu̱u̱n xa̱biya̱ rí a̱ʼgiu̱u̱ ginii gaʼyamajkhuu o a̱ʼgu̱ magiʼthu̱u̱n rí ajmbio̱o̱ mbaʼyamajkuu ginii xáʼ. Náá numuu ku̱ma̱a̱ xúʼko̱ rá.
RÍ NUTHI TIKHUN: “Ikháanʼxu nánguá kuwáanʼ mbá kambáxuxu xóo nákha ginii”.
Xú káʼnii gáratha̱a̱n dí Biblia ma̱ndoo mambáyúu xá.
RÍ NAGÁJNURIYO̱O̱ʼ
Xa̱bu̱ gajmii ma̱ndoo makuwá gagi á mu nandún kuyamijná, nduyamajkumijná ga̱jma̱a̱ nugíʼ nunimbánii consejo ndrígóo Biblia.
Rí nijmañaaʼ
Xú káʼnii gándoo maʼni xa̱biya̱ mu a̱ʼgiu̱u̱ maxtáa itháan gagi rá.
Xú káʼnii gándoo maʼni a̱ʼgu̱ mu ajmbio̱o̱ maxtáa itháan gagi rá.
Á mu ikháán nitatsigún má o nitanújunʼ, ndiéjunʼ ikha dí na̱ʼkha̱ náa Biblia ma̱ndoo mambáyáaʼ mu maraxtaa itháan májánʼ ga̱jma̱a̱ bi̱ ndiyáa rá.
ATAYÁÁ ITHÁAN
Gu̱ya̱a̱ consejo rí ma̱ndoo mambáyala mu makuwáanʼ gagi mbá guʼwáanʼ.
Atayáá mbá video musical náa naʼthí xú káʼnii guma tsajkhurámiinʼ xa̱bu̱ gajmii índo̱ nunimbu̱ún consejo ndrígóo Dios.
Atayáá ndiéjunʼ eyoo gáʼthúu̱n rí matayamajkuíí xóo naʼtáñajunʼ ajmbia̱a̱ʼ.
Ndiéjunʼ nimbáñún xa̱bu̱ gajmii mu muraʼníí xkjundu ndrígún, xóo dí niniñami̱jna̱ rá.