Rí gátani náa reunión Xóo kúwi̱i̱n ga̱jma̱a̱ xóo Etaraʼa Cristianos

Índice

1. Náa i̱yi̱i̱ʼ rígi̱ na̱ʼkha̱ raʼthí xóo gíʼmaa muni bi̱ manújngún náa reunión Xóo kúwi̱i̱n ga̱jma̱a̱ xóo Etaraʼa Cristianos. Gíʼmaa majuiʼyáá ikha rígi̱, mú ma̱ngaa nákha xóó tseniratamijná mu munújngún gíʼmaa mbuyáá ikha dí na̱ʼkha̱ náa I̱yi̱i̱ʼ dí najmulú náa reunión Xóo kúwi̱i̱n ga̱jma̱a̱ xóo Etaraʼa Cristianos. Gíʼmaa majuixnúú tsiakii publicadores mu manújngún muxnajxi̱ asignación ndrígu̱ún. Ma̱ngaa ma̱ndoo manújngún xa̱bu̱ bi̱ tséniña̱a̱ʼ ragún reunión ga̱jma̱a̱ bi̱ nundrígú kiʼsngáa ndrígóo Biblia ma̱ngaa bi̱ nakuwa xó má kaʼyoo mbáa cristiano. Á mu mbáa nandoo maʼni matricularminaʼ nákha xóó tsenindxu̱u̱ publicador, superintendente ndrígóo reunión Xóo kúwi̱i̱n ga̱jma̱a̱ xóo Etaraʼa Cristianos maʼtámíjná ga̱jma̱a̱ ikhaa, mu mbaʼyoo á mu naʼnimbánuu xúgíʼ xó má gíʼmaa, ga̱jma̱a̱ nda̱wa̱á maʼthúu̱n á mu naʼnimbánuu má. Índo̱ gutamijná, mbaʼyóoʼ maxtáa ma̱ngaa bi̱ naʼsngóo (o ma̱ndoo maʼni anu̱u̱ o ru̱dúu̱ bi̱ nindxu̱u̱ testigo). Requisito rí gíʼmaa maʼnimbánuu nindxu̱u̱ ikháá má dí naʼnimbánuu mbáa bi̱ mani̱ndxu̱u̱ publicador bi̱ xóó tséjngúun iyááʼ (od 8 kutriga̱ 8).

NAJUIʼTHÁ ÍNDO̱ NAGI̱ʼDU̱U̱

2. (1 minuto). Nda̱wa̱á rí niguámbá ga̱jma̱a̱ mbá ajmúú ma̱ngaa rí nijuiʼtájkáan, presidente ndrígóo reunión Xóo kúwi̱i̱n ga̱jma̱a̱ xóo Etaraʼa Cristianos maʼni rí bi̱ kúwá awúu̱n manigu̱u̱nʼ rí majuixná. Ga̱jma̱a̱ maʼthí rí ma̱ndoo mambáñun a̱ngiu̱lú náa congregación.

GÍʼDOO NUMUU RÍ NA̱ʼKHA̱ NÁA BIBLIA

3. Discurso: (10 minutos). I̱yi̱i̱ʼ dí najmulú náa reunión ikhí na̱ʼkha̱ mbá tema ga̱jma̱a̱ a̱jma̱ o ajtsú puntos rí nagájnuriyoʼ itháán. Discurso rígi̱ maxná mbáa bi̱ kayá edxu̱u̱ o mbáa siervo ministerial bi̱ najmañuu. Índo̱ gági̱ʼdu̱u̱ magixnuu mbá nuxi̱ʼ libro ndrígóo Biblia, mbiʼyáá mbáa video rí nagíʼdu̱u̱ ga̱jma̱a̱ numuu libro rígi̱. Bi̱ maxná discurso ma̱ndoo maʼthí xú káʼnii video nambánii ga̱jma̱a̱ rí kayá edxu̱u̱ discurso, mú gíʼmaa maxná puntos rí na̱ʼkha̱ náa I̱yi̱i̱ʼ dí najmulú náa reunión. Á mu naʼngo̱o̱ tiempo, gíʼmaa majmuu xtiʼkhuu ga̱jma̱a̱ i̱ʼwáʼ rí nagájnuu náa Biblia rí ki̱ʼni̱ mu mbiʼyáá. Ma̱ndoo mbuʼyááʼ itháán ga̱jma̱a̱ numuu rí na̱ʼkha̱ raʼthí, á mu dí rígi̱ mambáyúu mu maxná májánʼ parte ndrígóo.

4. Guʼyáʼ rí gíʼdoo numuu: (10 minutos). Gi̱jyooʼ i̱ndó naguma graxe̱ ga̱jma̱a̱ naxtiʼña̱a̱ ragíʼmaa maʼthí i̱ʼwáʼ ajngáa índo̱ magi̱ʼdu̱u̱ o índo̱ gámbóo. Rígi̱ gíʼmaa maxná mbáa bi̱ kayá edxu̱u̱ o mbáa siervo ministerial bi̱ najmañuu. Ndxájulú gíʼmaa maʼni a̱jma̱ graxe̱ rí tima. Ikhaa garaʼwíi á mu magixnuu xúgíʼ versículos rí na̱ʼkha̱. A̱ngiu̱lú bi̱ muthi rí nijmañún gíʼmaa muni mbá 30 segundos o menos.

5. Migixnuu Biblia: (4 minutos). Rígi̱ maxná mbáa ndxájulú xa̱biya̱, ikhaa ragíʼmaa maʼthí i̱ʼwáʼ ajngáa índo̱ magi̱ʼdu̱u̱ o índo̱ gámbóo, i̱ndó gíʼmaa maguxnuu. Presidente gíʼmaa mambáñun bi̱ manújngún rí muraxnuu májánʼ, kaʼwu, jmbu, muthi xó má gíʼmaa ga̱jma̱a̱ maguajún náa ndayóoʼ. Numuu rí tikhuu dí magixnuu náa Biblia nindxu̱u̱ mba̱ʼu̱ wéñuuʼ ki xóo i̱ʼwáʼ, bi̱ gajkuáa ñawun náa reunión Xóo kúwi̱i̱n ga̱jma̱a̱ xóo Etaraʼa Cristianos gíʼmaa mbaʼyoo xú káʼnii guxnuu mambá ndxájulú, mu mbaʼyoo tsáa ma̱ndoo manújngoo.

GANINDXU̱LÚ MBÁA BI̱ NAʼSNGÁA MÁJÁNʼ

6. (15 minutos). Náa sección rígi̱ ki̱ʼni̱ mu mambáñún xúgínʼ muniratamijná mu mutaraʼa ga̱jma̱a̱ majmañún itháán májánʼ, mutamijná gajmiún eʼwíinʼ ma̱ngaa mutaraʼa ga̱jma̱a̱ musngáa. Bi̱ kuya̱ edxu̱u̱ ma̱ngaa ma̱ndoo manújngún á mu ndayóoʼ. Bi̱ manújngún mbuyáá dí kamaa awúun paréntesis náa I̱yi̱i̱ʼ dí najmulú náa reunión mu mbuyáá ndiéjunʼ kíxnuu gíʼma munimbánii ndrígóo folleto Marasngáa ga̱jma̱a̱ folleto Gumbáñún xa̱bu̱. Marígá tikhu xmáná dí bi̱ kayá edxu̱u̱ o mbáa siervo ministerial bi̱ najmañuu, ma’támijná gajmíín bi̱ kúwá ikhí (atayáá kutriga̱ 15 mu mata̱ya̱a̱ xú káʼnii maratamijná gajmiáan bi̱ kúwá ikhí).

7. Atagíʼdi̱i̱ marata̱: Asignación rígi̱ ma̱ndoo manújngoo mbáa ndxájulú xa̱biya̱ o ndxájulú a̱ʼgu̱. Bi̱ manújngún gíʼmaa mani̱ndxu̱ún ki̱nikhiin xa̱bekha o ki̱nikhiin gu̱ʼu̱ o mbáa bi̱ xtáa náa goʼwóo. Najmiin ma̱ndoo mutrigi̱i̱n o maguajún. Mu ma̱ta̱ya̱a̱ xóó itháan ga̱jma̱a̱ numuu rí nagájnuriyo̱o̱ʼ ma̱ngaa náa maratará’a, atayáá kutriga̱ 12 ga̱jma̱a̱ 13.

8. Atanga̱án gátayaa xa̱bu̱: Asignación rígi̱ ma̱ndoo manújngoo mbáa ndxájulú xa̱biya̱ o ndxájulú a̱ʼgu̱. Bi̱ manújngún gíʼmaa mani̱ndxu̱ún ki̱nikhiin xa̱bekha o ki̱nikhiin gu̱ʼu̱. (km-S 5/97 ináa 2) Najmiin ma̱ndoo matri̱gi̱i̱n o maguajún. Bi̱ naʼnigajmaa̱ gíʼmaa masngájma ndiéjunʼ gaʼthí índo̱ gatanga̱a̱ gáʼyoo xa̱bu̱ bi̱ ninigu̱u̱ʼ maʼdxun nákha timbá miʼtsú rí niʼtámíjná ga̱jma̱a̱. Mu ma̱ta̱ya̱a̱ xóó itháan ga̱jma̱a̱ numuu rí nagájnuriyo̱o̱ʼ ma̱ngaa náa maratará’a, atayáá kutriga̱ 12 ga̱jma̱a̱ 13.

9. Gusngún xa̱bu̱: Asignación rígi̱ ma̱ndoo manújngoo mbáa ndxájulú xa̱biya̱ o ndxájulú a̱ʼgu̱. Bi̱ manújngún gíʼmaa mani̱ndxu̱ún ki̱nikhiin xa̱bekha o ki̱nikhiin gu̱ʼu̱ (km-S 5/97 ináa 2). Najmiin ma̱ndoo matri̱gi̱i̱n o maguajún. Náa asignación rígi̱ musngájma xú káʼnii nindxu̱u̱ dí nuʼsngáa ga̱jma̱a̱ numuu Biblia rí awan má erígá. Tséyóoʼ má mbaʼyoo xóo magíʼdu̱u̱ ga̱jma̱a̱ xú káʼnii gámbóo, i̱ndó á mu bi̱ nanújngoo xtáa rañajunʼ náa kíxnuu rúʼko̱. Tséyóoʼ má maguxnuu xúgíʼ rí eʼthí, maski ajndu ma̱ndoo má maʼni.

10. Gu’thá dí nu’nimbulú. Á mu nindxu̱u̱ mbá discurso, asignación rígi̱ gíʼmaa maxná mbá ndxájulú xa̱biya̱. Á mu nindxu̱u̱ mbá demostración ma̱ndoo maxná mbáa ndxájulú xa̱biya̱ o ndxájulú a̱ʼgu̱. Bi̱ manújngún gíʼmaa mani̱ndxu̱ún ki̱nikhiin xa̱bekha o ki̱nikhiin gu̱ʼu̱ o mbáa bi̱ xtáa náa goʼwóo. Bi̱ naʼnigajmaa gíʼmaa mariʼñaa graxe̱ dí kayá edxu̱u̱, kaʼwu ga̱jma̱a̱ ajngáa guabaʼ, gíʼmaa majmuu referencia dí na̱ʼkha̱ ikhí. Ikhaa ma̱ndoo maʼthí o na̱nguá náá i̱yi̱i̱ʼ nagájnuu dí naʼthí.

11. Discurso: Asignación rígi̱ kaʼyoo maxná mbáa ndxájulú xa̱biya̱ ga̱jma̱a̱ majuixná xóo mbá discurso. Índo̱ gájmuu Dí na̱ʼkha̱ itháan: A ndrígóo folleto Gumbáñún xa̱bu̱, bi̱ naʼnigajmaa gíʼmaa masngájmaa xú káʼnii gájmún versículo rígi̱ náa gutaraʼa. Mbá xkri̱da ma̱ndoo maʼthí ndiéjunʼ phú eyoo gáʼthí náa versículo, nguáná gándoo majmún o xú káʼnii gájmún mu xa̱bu̱ mundxaʼwámíjnaʼ dí nuthún. Índo̱ bi̱ naʼnigajmaa gájmuu mbá kíxnuu ndrígóo folleto Gumbáñún xa̱bu̱, maʼthí kaʼwu xóo phú gíʼmaa majmaa náa miʼtáráʼa. Á mu ndaʼyoo rí májánʼ nindxu̱u̱, ma̱ndoo maʼthí xkri̱da dí na̱ʼkha̱ náa punto 1 ndrígóo kíxnuu folleto rígi̱ o i̱ʼwáʼ versículo rí na̱ʼkha̱ ikhí.

12. Rí nagájnuriyo̱o̱ʼ: Ikha rí na̱ʼkha̱ náa kutriga̱ rígi̱ ga̱jma̱a̱ imbo̱o̱ʼ kutriga̱ na̱ʼkha̱ raʼthí ga̱jma̱a̱ numuu “Atagíʼdi̱i̱ marata̱” ma̱ngaa “Atanga̱án gátayaa xa̱bu̱”. Á mu tséʼthí imbo̱o̱ʼ, bi̱ naʼnigajmaa gíʼmaa maʼthí ga̱jma̱a̱ numuu Biblia dí ramíʼskhoo dí kaʼyoo maʼdxawuun xa̱bu̱, mu xúʼko̱ maʼtámijná ga̱jma̱a̱ ikhaa nda̱wa̱á. Bi̱ naʼnigajmaa gíʼmaa maraʼwíí dí manigu̱u̱n mudxawíín ga̱jma̱a̱ mambáñún xa̱bu̱ náa xtáa ikhaa. Ikhaa má gáraʼwíi á mu nandoo maxná mbá i̱yi̱i̱ʼ o mbá video dí rígá náa caja ndrígóo herramientas mu muʼsngáa. Índo̱ ganújngún ragíʼmaa muniraʼmáʼ o magida̱ʼ edxu̱ún dí muthi, dí phú gíʼmaa, muniratáá májánʼ dí muthi xó má índo̱ kúwi̱i̱n rutamíjná gajmiún mbáa ga̱jma̱a̱ musngajma rí naxmiéjúúnʼ gajkhun kuñún xa̱bu̱.

13. Náa marataráʼa: Bi̱ manújngoo gíʼmaa masngájma xóo guni̱ a̱ngiu̱lú índo̱ gutaraʼa náa naʼñúún toca. Mbá xkri̱da:

1) Mámbá guʼwá: Rígi̱ nandoo gáʼthúu̱n índo̱ nuʼtáraʼa mámbá guʼwá (tséʼniuu má á mu nuʼtámíjná náa goʼwóo, náa teléfono o nuʼniraʼmáʼ mbá carta). Ga̱jma̱a̱ dí muʼtamíjná gajmiúlú xa̱bu̱ nda̱wa̱á rí niʼtámíjná gajmiúlú náa goʼwóo.
2) Asndu náa: Rígi̱ nandoo gáʼthúu̱n índo̱ nuʼtáraʼa asndu náá má ejkualú o asndu náá má kúwánlú, mbá xkri̱da, ma̱ndoo muraxnuu mbóó texto ndrígóo Biblia mu maʼdxawuun mbáa xa̱bu̱ índo̱ kúwáanʼ ruñajunʼ gajmiúlú, náa escuela, xa̱bu̱ bi̱ kúwáanʼ mijngii gajmiúlú, índo̱ najkua̱lú náa carro o náa i̱ʼwáʼ.
3) Náa kuwa mba’in xa̱bu̱: Rígi̱ nandoo gáʼthúu̱n índo̱ nuʼtáraʼa ga̱jma̱a̱ carrito, índo̱ nuʼtáraʼa náa naxtangujua̱, náa calle, náa parque, náa naguájun carro o i̱ʼwáʼ náa kúwi̱i̱n mbaʼin xa̱bu̱.

14. Xóo majmaa’ videos ga̱jma̱a̱ i̱yi̱i̱ʼ ndrígulú: Bi̱ ganújngoo, ikhaa garaʼwíí á mu majmuu videos o i̱yi̱i̱ʼ ndrígulú. Á mu náa asignación ndrígóo na̱ʼkha̱ video, ikhaa gáraʼwíí á mu majmuu, ragíʼmaa magrígú, mú gíʼmaa maxnájxi̱ ga̱jma̱a̱ mutamijná ga̱jma̱a̱ numuu rígi̱.

XÓO KUWÁANʼ BI̱ NI̱NDXU̱LÚ CRISTIANOS

15. Nagi̱ʼdu̱u̱ ga̱jma̱a̱ mbá ajmúú. Náa mbá 15 minutos dí nagi̱ʼdu̱u̱ marígá mbóó o a̱jma̱ discurso rí mambáñun bi̱ kúwá ikhí, mu munimbaníí rí naʼthí náa Ajngá rawuunʼ Dios. I̱ndó á mu tséʼthi imbo̱o̱, rígi̱ maxná mbáa bi̱ kayá edxu̱u̱ o mbáa siervo ministerial bi̱ najmañuu. I̱ndó parte “Rí ndayóoʼ náa congregación”, gíʼmaa maxná mbáa bi̱ kayá edxu̱u̱. Índo̱ gáʼkha̱ mbá artículo náa I̱yi̱i̱ʼ dí najmulú náa reunión, ndxájulú bi̱ kayá edxu̱u̱ maʼtamijna gajmíi̱n bi̱ kúwá ikhí, ikhaa ma̱ndoo maʼni i̱ʼwáʼ graxe̱ mu ma̱ndoo makru̱ʼu̱u̱n itháán májánʼ a̱ngiu̱lú rí gíʼdoo numuu. Ragíʼmaa mbajyúuʼ wéñuuʼ índo̱ nagíʼdu̱u̱ mu xúʼko̱ ma̱ndoo maʼthí rí itháán gíʼdoo numuu ma̱ngaa a̱ngiu̱lú ma̱ndoo muthi. Á mu marigá mbá entrevista, á mu naʼngo̱o̱, itháán májánʼ dí bi̱ gaxtajxi̱i̱ manújngoo náa plataforma mu mariʼñaa graxe̱, raʼkháa má náa eʼgíʼ.

16. Najmañulúʼ ga̱jma̱a̱ numuu Biblia náa congregación: (30 minutos). Rígi̱ maxnáa mbáa bi̱ kayá edxu̱u̱ bi̱ najmañuu. (Á mu ndawi̱i̱n mbaʼin bi̱ kuya̱ edxu̱u̱ ma̱ndoo manújngoo mbáa siervo ministerial bi̱ najmañuu). Xúgínʼ bi̱ kuya̱ edxu̱u̱ nduyáá tsíin bi̱ majmiin muxná rígi̱. A̱ngiu̱lú bugi̱ gíʼmaa muni xó má tiempo rí kaʼyoo, muraxnuu texto rí itháan gíʼdoo numuu ga̱jma̱a̱ mumbáñún xúgíinʼ mu mbuyáá rí gíʼdoo numuu rí xtaa ranújngoo. Rí mambáñún nindxu̱u̱ dí mbuyáá xú gándoo guxnajxi̱ parte náa naguma graxe̱ (w23.04 ináa 24, kúgumaʼá) Tséyóo má maʼni 30 minutos á mu niguámbá ninigajmaa i̱yi̱i̱ʼ rí kaʼyoo. Á mu nandoo, mámbá xmáná gíʼmaa mixtiʼkun a̱ngiu̱lú bi̱ muxna náa reunión ga̱jma̱a̱ bi̱ muraxnuu. Á mu presidente ndrígóo reunión na̱ndo̱ʼo̱o̱ bi̱ naxná rí nuʼnigajmaa rí xájyúuʼ mbayuuʼ, ikhaa gíʼmaa mbaʼyoo xóo maʼni. Mbá dí ma̱ndoo maʼni nindxu̱u̱ dí xágixnuu tikhuu kutriga̱.

AJNGÁA RÍ MAMBÁ GA̱JMA̱A̱

17. (3 minutos). Presidente ndrígóo reunión maʼthí tikhuu rí ninújngoo náa reunión. Ma̱ngaa maʼthí rí manigu̱u̱nʼ mbuyáá rí marigá náa imbo̱o̱ʼ xmáná. Ma̱ngaa ma̱ndoo maʼthí mbiʼñún bi̱ manújngún rí imbo̱o̱ʼ xmáná á mu rígá xóó tiempo. Índo̱ gáʼyóoʼ majuixná mbá anuncio o magixnuu mbá carta, presidente ma̱ndoo maʼni rígi̱, índo̱ gáʼthí ajngáa rí nawámbá ga̱jma̱a̱ reunión. Á mu rígá rí ndayóoʼ náa congregación, mbá xkri̱da, xóo náa hora o náa majuiʼtáraʼa ga̱jma̱a̱ bi̱ kaʼñún muni kaʼwi̱i̱, tséyóoʼ má majuiʼthá náa plataforma, numuu rí magiʼma náa tablero ndrígóo anuncios. Á mu tséʼngo̱o̱ tiempo magixnuu cartas o mixná anuncio, bi̱ presidente ndrígóo reunión mandu̱ʼu̱u̱n bi̱ kaʼñún muxná náa sección “Xóo kuwáanʼ bi̱ ni̱ndxu̱lú Cristianos” rí xájñúnʼ wéñuʼ náa rí kaʼñún muxna (atayáá kutriga̱ 16 ga̱jma̱a̱ 19). Reunión mambá ga̱jma̱a̱ ajmúú ma̱ngaa majuíʼtájkáan.

MAJUIXNÁ TSIAKII GA̱JMA̱A̱ CONSEJO

18. Nda̱wa̱á rí ganújngoo mámbá asignación, bi̱ maʼni presidente gíʼdoo mbá minuto mu maxnáa núma̱aʼ ga̱jma̱a̱ maxnúu consejo rí na̱ʼkha̱ náa folleto. Índo̱ presidente gáʼtí tsáa manújngoo, xáʼthi náa kíxnuu xtáa rañajuunʼ ndxájulú. Mú, índo̱ gámbóo asignación ga̱jma̱a̱ nda̱wa̱á rí gáxnáa núma̱aʼ, presidente ma̱ndoo maʼthí náa kíxnuu ga̱jma̱a̱ maʼthúu̱n náa numuu rí nigájnuu májánʼ o maʼthúu̱n xú káʼnii gámbáyúu dí mañajunʼ má xúʼko̱ náa kíxnuu rúʼko̱. Presidente ma̱ndoo maʼthí i̱ʼwáʼ rí ndiʼyoo náa demostración, dí ma̱ndoo mambáyúu bi̱ ninújngoo o dí mambáñun bi̱ kúwá ikhí. Índo̱ gámbá reunión o i̱mba̱ nuthu, ma̱ndoo majuixná itháan consejo xó dí na̱ʼkha̱ náa folleto Gumbáñún xa̱bu̱, Marasngáa o náa libro Benefíciese, ma̱ndoo maʼni náa kíxnuu náa nikáná mañajunʼ o imbo̱o̱ʼ náa ndayóoʼ (náa kutriga̱ 19, 24, ga̱jma̱a̱ 25, ma̱ta̱ya̱a̱ itháan ga̱jma̱a̱ numuu ñajunʼ rí naʼni presidente ndrígóo reunión Xóo kúwi̱i̱n ga̱jma̱a̱ xóo Etaraʼa Cristianos ma̱ngaa rí naʼni bi̱ maxná consejo).

TIEMPO

19. Nimbá asignación ragíʼmaa manújngoo tiempo rí kaʼyoo, ni ma rí naʼthí presidente. Maski ajndu náa I̱yi̱i̱ʼ dí najmulú náa reunión naʼthí má nguáthá mba̱yu̱u̱ʼ tiempo gíʼmaa miʼni náa asignación, tséyóo má maʼthí wéñuuʼ á mu naguámbóo wapháá. Á mu a̱ngiu̱lú bi̱ kaʼñún muxná asignación ndrígu̱ún nanújngoo tiempo, bi̱ nindxu̱u̱ presidente o bi̱ nañambá maxná consejo maʼthúu̱n ngu̱ʼwa̱á (atayáá kutriga̱ 24 ga̱jma̱a̱ 25). Xúgíʼ reunión gíʼmaa mbajyúuʼ mbá hora ga̱jma̱a̱ 45 minutos dí kaʼyoo asndu ajmúú ga̱jma̱a̱ muʼtájkáan.

ÍNDO̱ NA̱ʼKHA̱ NDXÁJULÚ CIRCUITO *

20. Índo̱ gáʼkha̱ superintendente ndrígóo circuito, maguma xóo eʼthí náa I̱yi̱i̱ʼ dí najmulú náa reunión mú rígá tikhuu rí xanújngoo ikhú. Rí manújngoo náa “Najmañulúʼ ga̱jma̱a̱ numuu Biblia náa congregación” ikhí maxná discurso ndxájulú circuito rí mbajyúuʼ 30 minutos. Nákha xóó tsígi̱ʼdu̱u̱ discurso, presidente ndrígóo reunión maʼthí mbá chíʼgíiʼ rí ndiʼyáá náa reunión ga̱jma̱a̱ maʼthí rí mbuʼyáá náa imbo̱o̱ xmáná ma̱ngaa maʼthí rí ndayóoʼ muʼdxawíín, maguxnuu carta dí rígá, nda̱wa̱á maʼthí rí manújngoo superintendente maxná discurso ndrígóo. Nda̱wa̱á rí ndxájulú circuito gámbóo raxná discurso, mambóo ga̱jma̱a̱ mbá ajmúú rí ikhaa má garaʼwíí. Ikhaa má gáʼyoo tsáa ndxájulú gáʼthúu̱n rí maʼtájkáan. Xárígá clases náa sala B índo̱ gárígá visita ndrígóo circuito. Grupo bi̱ nuthi imbo̱o̱ ajngáa ma̱ndoo muguaʼdáá reunión ndrígu̱ún maski ajndu náa congregación guaʼdáá visita. Mú, mudxawíín discurso xó miʼtáraʼa rí maxná superintendente ndrígóo circuito.

XMÁNÁ RÍ MARIGÁ ASAMBLEA

21. Xmáná rí marigá asamblea xarigá nimbá reunión. Majuiʼthúún xúgíinʼ a̱ngiu̱lú rí munigajmaa mámbíin náa guʼwún o mbá guʼwíin.

XMÁNÁ RÍ MARIGÁ CONMEMORACIÓN

22. Á mu conmemoración narígá mbá mbiʼi dí ta̱pha̱ xmáná, xarigá reunión Xóo kúwi̱i̱n ga̱jma̱a̱ xóo Etaraʼa Cristianos.

SUPERINTENDENTE NDRÍGÓO REUNIÓN XÓO KÚWI̱I̱N GA̱JMA̱A̱ XÓO ETARAʼA CRISTIANOS

23. Ndxájulú bi̱ kayá edxu̱u̱ nindxu̱u̱ mbáa bi̱ nixtaʼwíi eni̱ xúgínʼ bi̱ kuya̱ edxu̱u̱. Ikhaa gíʼmaa mbaʼyoo májánʼ dí marigá xúgíʼ ga̱jma̱a̱ dí maguma xó má gíʼmaa. Gíʼmaa maʼtámíjná májánʼ ga̱jma̱a̱ bi̱ nambáyúu maxná consejo. Índo̱ gárígá I̱yi̱i̱ʼ dí najmulú náa reunión, maʼni programa ndrígóo asignación rí kaʼyoo a̱jma̱ gu̱nʼ rúʼko̱: Asignación rígi̱ nindxu̱u̱ rí muxna publicadores ga̱jma̱a̱ bi̱ mayéʼga edxu̱u̱ náa reunión dí ta̱pha̱ xmáná ma̱ngaa iwáá parte rí ma̱ndoo manújngún muxna a̱ngiu̱lú dí bi̱ kuya̱ edxu̱u̱ nduyáá rí ma̱ndoo muni (atayáá kutriga 3-16 ga̱jma̱a̱ 24). Índo̱ gákhánún asignación ndrígún angiu̱lú (tséʼniuu á mu demostración o na̱nguá) gíʼmaa mbiʼyáá nguáthá tsigúúnʼ ga̱jma̱a̱ dí ejmañún ma̱ngaa á mu tséʼniún miʼskhoo muthi tema dí kaʼyoo. Ajtsú xmáná wapháá wáa gíʼmaa mixnún a̱ngiu̱lú xúgíʼ asignación. Xó má I̱yi̱i̱ʼ rí kaʼyoo mbayá bi̱ manújngoo Náa Reunión Xóo kúwi̱i̱n ga̱jma̱a̱ xóo Etaraʼa Cristianos (S-89). Ma̱ngaa gíʼmaa mbaʼyoo dí magiʼma programa náa tablero náa natima anuncio. Xúgíinʼ bi̱ kuya̱ edxu̱u̱ ma̱ndoo muraʼwíi mbáa ndxájulú bi̱ mambáyúu, ma̱ndoo mani̱ndxu̱u̱ mbáa siervo ministerial o mbáa bi̱ kayá edxu̱u̱. Mú, i̱ndó bi̱ kuya̱ edxu̱u̱ ma̱ndoo muthi tsáa manújngoo náa parte dí na̱nguá exna publicadores.

PRESIDENTE NDRÍGÓO REUNIÓN XÓO KÚWI̱I̱N GA̱JMA̱A̱ XÓO ETARAʼA CRISTIANOS

24. Mámbá xmáná, mbáa bi̱ kayá edxu̱u̱ mani̱ndxu̱u̱ presidente náa reunión Xóo kúwi̱i̱n ga̱jma̱a̱ xóo Etaraʼa Cristianos (náa congregación rí ndawi̱i̱n mbaʼin bi̱ kuya̱ edxu̱u̱ ma̱ndoo maʼni mbáa siervo ministerial bi̱ najmañuu). Presidente gíʼmaa mbaʼyoo kaʼnii gáʼthí índo̱ magíʼdu̱u̱ ga̱jma̱a̱ índo̱ gámbá, mbaʼyoo ga̱jma̱a̱ maʼtamijna gajmíi̱n bi̱ kúwá ikhí numuu video rí na̱ʼkha̱ xóo maratamíjná gajmiáanʼ xa̱bu̱. Naʼniu toca maʼthí bi̱ manújngún ga̱jma̱a̱ á mu nda̱wi̱i̱n mbaʼin bi̱ kuya̱ edxu̱u̱, ma̱ngaa kaʼyoo maxná i̱ʼwáʼ asignación xóo índo̱ mbuʼyáá mbá video. Ragíʼmaa maʼthí mba̱a̱ wéñuʼ índo̱ gáʼthí tsáa i̱mba̱a̱ manújngoo. Bi̱ kuya̱ edxu̱u̱ nutamijná tsáa rí ikhiin ma̱ndoo maʼni ñajunʼ rígi̱. A̱ngiu̱lú bi̱ nixtaʼwíin gíʼmaa maʼni mixtiʼkun. Xóo má gáʼyóoʼ mixná, mbáa bi̱ superintendente ndrígóo reunión Xóo kúwi̱i̱n ga̱jma̱a̱ xóo Etaraʼa Cristianos mbáa mbaʼyóoʼ maxná mbaʼa nuthu ki xóo eʼwíinʼ. Ikha jngóo, á mu mbáa bi̱ kayá edxu̱u̱ ma̱ndoo maxná rí najmañulúʼ ga̱jma̱a̱ numuu Biblia náa congregación, ma̱ngaa ma̱ndoo maʼni presidente náa reunión. Mú, gíʼmaa mbuyáá rí presidente najmañuu maxníin núma̱aʼ a̱ngiu̱lú ga̱jma̱a̱ maxnún májánʼ consejo bi̱ ganújngún. Ma̱ngaa kaʼyoo mbaʼyoo dí reunión mambá xóo má tiempo rí kaʼyoo (atayáá kutriga̱ 17 ga̱jma̱a̱ 19.) Á mu najxóo, o ma̱ja̱nʼ xóó ga̱jma̱a̱ á mu nandoo presidente, ma̱ndoo mawiji̱ imbo̱o̱ micrófono mu majmuu ikhaa, mu maʼthí tsíin bi̱ gánújngún, mu ikhiin ma̱ndoo má mutrigi̱i̱n. Ma̱ngaa ma̱ndoo marígá mbá mesa ga̱jma̱a̱ mbá xílí náa plataforma mu presidente ma̱ndoo magiʼi índo̱ nagixnuu Biblia ga̱jma̱a̱ náa sección “Ganindxu̱lú mbáa bi̱ naʼsngáa májánʼ”.

BI̱ NAÑAMBÁ MAXNÁ CONSEJO

25. Gíʼdoo numuu rí maxtiyáa mbáa bi̱ kayá edxu̱u̱ bi̱ naxná májánʼ discurso. Índo̱ gáʼyóoʼ, maxnún consejo bi̱ kuya̱ edxu̱u̱ ga̱jma̱a̱ siervos ministeriales bi̱ nuyambáá náa reunión Xóo kúwi̱i̱n ga̱jma̱a̱ xóo Etaraʼa Cristianos, discurso público, náa nuʼnigajmaa i̱yi̱i̱ʼ Bi̱ Nayejngoo, náa Najmañulúʼ ga̱jma̱a̱ numuu Biblia náa congregación o muñambáá índo̱ nagixnuu kutriga̱ (atayáá kutriga̱ 19.) Á mu náa congregación kúwá mbaʼin bi̱ kuya̱ edxu̱u̱ bi̱ nuxná májánʼ discurso, ma̱ndoo maxtiʼkuii mámbá tsiguʼ mu mani̱ndxu̱u̱ bi̱ nañambá maxná consejo. Tséyóoʼ má maxná consejo índo̱ naguámbá mámbá asignación.

I̱MBA̱ SALA NÁA NUXNA ASIGNACIÓN NDRÍGU̱ÚN (O SALA B)

26. Á mu mbaʼin bi̱ kúwá rajmañún náa congregación ma̱ndoo majmúún sala B. Náa mámbáa rí ikhiin maxtáa mbáa bi̱ najmañuu mu maxnún consejo, gíʼmaa maʼni mbáa bi̱ kayá edxu̱u̱. Mú á mu ndayóoʼ, ma̱ndoo mani̱ndxu̱u̱ mbáa siervo ministerial bi̱ najmañuu. Xúgínʼ bi̱ kuya̱ edxu̱u̱ muthi tsíin gándoo gúyambáá náa ñajunʼ rígi̱, á mu ma̱ndoo maxtiʼkhún. Bi̱ maxná consejo gíʼmaa maʼnimbánuu xó má eʼthí náa kutriga̱ 18. Maxtandu̱ʼu̱un bi̱ kúwá rajmañún magún náa sala B nda̱wa̱á rí gámbá rajuixná “Guʼyáʼ rí gíʼdoo numuu” náa sección “Gíʼdoo numuu rí na̱ʼkha̱ náa Biblia”. Nda̱wa̱á rí naguámbá sección “Ganindxu̱lú mbáa bi̱ naʼsngáa májánʼ”, matangi̱ín náa reunión.

VIDEOS

27. Náa reunión dí narígá náa ta̱pha̱ xmáná majmaa tikhuu video rí ma̱ndoo mundrígú náa aplicación JW Library^® náa mixtiʼkhu dispositivos.

S-38-TLN 12/23