Lá naratámíjná ga̱jma̱ʼ Dios ráʼ.

Á mu nandoo bi̱ nambáxu̱u̱n májánʼ nutamijná má xúʼko̱ náa teléfono, correo electrónico, video o nuniraʼmáʼ carta. Ikha jngó, mu makuwáanʼ mijngii náa Dios, ndayóoʼ muʼthámijna má xúʼko̱ gajmiúlú ikhaa. Mú xú káʼnii gándoo gúʼni rá.

Ma̱ndoo muʼthámijna gajmiúlú Jeobá índo̱ muʼtájkáan. Rí muʼthámijna gajmiúlú Dios raʼkháa xóo rí muʼthámijna gajmiúlú mbáa xa̱bu̱. Gíʼdoo mbuʼyáá rí índo̱ nuʼtájkáan kuwaanʼ gajmiúlú bi̱ Niʼniáanʼ bi̱ itháan mba̱a̱ náa xúgíʼ numbaaʼ. Rígi̱ gáʼni rí muʼtájkáan ga̱jma̱a̱ gamajkhu wéñuʼ. Mu Dios maʼdxun májánʼ rí gúʼthán ma̱ngaa rígá rí ndayóoʼ muʼnimbánii. Gi̱i̱ gúʼyáá ajtsú enii.

Timbá, gíʼmaa muʼtájkáan i̱ndó náa Jeobá raʼkháa náa Jesús o náa mbáa xándú (Éxodo 20:4, 5). Náa Biblia naʼthí kaʼwu: “Gutajkháan ga̱jma̱a̱ gutakáñii Dios ma̱ngaa guxna̱a̱ núma̱aʼ, gunda̱ʼa̱a̱ xúgíʼ rí eyála” (Filipenses 4:6). Raga̱jma̱, gíʼmaa muʼtájkáan ga̱jma̱a̱ mbiʼyuu A̱ʼdióo Dios, Jesucristo. Mínaʼ má ikhaa niʼthí: “Asjndo nimba tsiʼka naʼ Ana xi raʼka gajma numuʼ Ikun” (Juan 14:6). Ragajtsú, rí muʼtájkáan gíʼmaa maʼni xó má eyoo Dios. Náa Biblia naʼthí: “Tséʼniuu ndiéjunʼ nindxu̱u̱ rí gúnda̱ʼa̱a̱, ikhaa naʼdxun á mu ikháanʼ nunda̱ʼa̱ rí nandoo ikhaa” (1 Juan 5:14).a

Índo̱ a̱jmi̱i̱n nambáxu̱u̱n májánʼ tsíyoo gáʼthi rí mbáwíi nindxu̱u̱ bi̱ naʼthí. Xó má a̱jmi̱i̱n bi̱ nambáxu̱u̱n nanigu̱nʼ mutamijná ndayóoʼ muʼniñámíjná rí Dios maʼthúlú ga̱jma̱a̱ guʼdxawíín rí gáʼthi. Lá natayáá ikháánʼ xú káʼnii eʼthúlú Dios ráʼ.

Rí mbiʼi xúgi̱ Dios najmuu Biblia mu “maʼthúlú” (2 Timoteo 3:16, 17). Náa numuu eʼthí xúʼko̱ rá. Mbá xkri̱da: Gundxaʼwamíjna̱ rí nitri̱gú mbá carta ndrígóo mbáa bi̱ nambáxa̱ʼ májánʼ ga̱jma̱ʼ. Nda̱wa̱á rí nitraxnuu, ma̱ndoo marathu̱u̱n eʼwíínʼ ga̱jma̱a̱ gagi: “¡Nidxuun niʼthúu̱nʼ migiuʼ!” Mú ikhaa táʼtáanʼ, nitraxnuu rí niʼtháanʼ. Xúʼko̱ má kaʼnii nindxu̱u̱, índo̱ natraxnuu Biblia natatsíñáʼ rí Jeobá maʼtháanʼ. Ikha jngó, Gina, bi̱ niʼthá ga̱jma̱a̱ numuu náa artículo rí nigi̱ʼdu̱u̱ naʼthí: “Á mu ikhúúnʼ nandoʼ rí Dios mbaʼyoʼ xóo mbáa bi̱ nambáxu̱u̱ ga̱jma̱a̱, gíʼmuun maguxnuu carta ndrígóo, rí nindxu̱u̱ Biblia”. Ikhaa naʼthí xóó, “Rí nagúxnuu Biblia mbéjtsi na̱jkha̱ kañún itháan mijngii náa Dios”. Lá natatsíñáʼ rí Jeobá maʼtháanʼ xúgíʼ mbiʼi índo̱ natraxnuu Ajngá rawunʼ ráʼ. Rígi̱ mambáyaʼ maraxtaa itháan mijngii náa Dios.