Xú eninumáá ñajunʼ ndrígu̱ún xá.

Xúgíʼ tsiguʼ nunixu imprimir ga̱jma̱a̱ nuxnaráʼaxu mbaʼa wéñuʼ Biblia xúʼko̱ má i̱yi̱i̱ʼ rí nagájnuu náa Biblia. Nunixu ga̱jma̱a̱ kuaʼdááxu sucursales ga̱jma̱a̱ imprentas náa xúgíʼ numbaaʼ. Kuwáanʼxu organizados náa mbaʼa wéñuʼ congregación ma̱ngaa nagimbáanʼxu náa guʼwá rí nagui̱i̱ ga̱jma̱a̱ na̱nguá nigumaratáá wéñuʼ rí nuxnambíʼíxu Guʼwá náa nagimbáanʼ. Tsáa eʼni numuu xúgíʼ rígi̱ rá.

Xúgíʼ ñajunʼ rí enixu najmanumáá ga̱jma̱a̱ mbújkha̱a̱ rí najuixná xó má egájnuu náa a̱jkiu̱ún (2 Corintios 9:7). Nákha tsiguʼ 1879, náa raga̱jma̱ número ndrígóo revista rígi̱, nákha ikhú nagumbiʼyuu Zionʼs Watch Tower niʼthí: “[Revista rígi̱] xó má ekumulú, xtáa rambáyúu JEOBÁ, ikha jngó nimbá miʼtsú xándaʼamínúʼ ga̱jma̱a̱ xaʼtakháñún xa̱bu̱ mu mumbayíí”. Asndu rí mbiʼi xúgi̱, ikhaa má endxa̱ʼwa̱a̱ edxu̱xuʼ.

Mbújkha̱a̱ rí najuixná ma̱ndoo muxuʼmá mbájmbu náa mbá sucursal o ma̱ndoo murajkuáa náa mbá caja dí rígá náa Guʼwá nagimbáanʼ. Nimbá miʼtsú tsénda̱ʼa̱xu diezmo ga̱jma̱a̱ mbújkha̱a̱, tserumaxu numuu ñajunʼ rí nunixu ma̱ngaa tsegujuaxu i̱yi̱i̱ʼ. Nimbáa tséʼni numuxu numuu rí nutaráʼaxu, rí musngáaxu náa congregación, ni má rí muyambáá munixu Guʼwá náa nagimbáanʼxu. Jesucristo niʼthí: “Ri nijanaʼla, guxna manganʼ” (Mateo 10:8). Xúgínʼ bi̱ kuwa náa sucursal ga̱jma̱a̱ guʼwá náa nuxna ikha, asndu má bi̱ ni̱ndxu̱ún Cuerpo Gobernante ndrígu̱ún bi̱ nutaraʼa numuu Jeobá, tsedaʼ mbújkha̱a̱.

Ma̱ngaa mbújkha̱a̱ rúʼko̱ najmaa mu mixtambáñuun eʼwíínʼ. Cristianos bi̱ nikuwa nákha siglo timbá nimbañúún ga̱jma̱a̱ gagi eʼwíínʼ bi̱ niguaʼdáá gamiéjunʼ (Romanos 15:26). Xúʼko̱ má kayuʼ, mbiʼi xúgi̱ numbañúnxu bi̱ niguaʼnii gamiéjunʼ náa námbáa guʼún ga̱jma̱a̱ ganitsu, xtíin ma̱ngaa thana. Ga̱jma̱a̱ nuni̱i̱ májáánʼ Guʼwá náa nagimbáanʼ náa xuajin rí nichúu wéñuʼ.