RÍ KAYÁ EDXU̱U̱ NÁA INUU I̱YI̱I̱ʼ | LÁ NAYAMBÁÁ RÍ MUʼTÁJKHÁAN RÁʼ.
Náa numuu rí nutajkháan xa̱bu̱ rá.
“Ra̱ʼkhá tháán niniguʼ matsíin. Nitajkháan numuu rí nindoʼ mada̱ʼ wéñuʼ mbújkha̱a̱. Mú nimbá miʼtsú táʼngoʼ.” (Samuel,a Kenia)
“Náa escuela i̱ndó ndiyóoʼ mutaxu tikhuu tsajkhun rí nijmañuxu.” (Teresa, Filipinas)
“Natajkháan índo̱ gúʼdoo xkujndu. Ma̱ngaa mu ma̱ndo̱ʼo̱o̱ Dios rí maʼni mba̱a̱ a̱jkiu̱u̱n kaʼyoʼ ga̱jma̱a̱ rí mani̱ndxu̱ʼ mbáa cristiana májáánʼ.” (Magdalene, Ghana)
Rí niʼthí Samuel, Teresa ga̱jma̱a̱ Magdalene nasngájma rí xa̱bu̱ nutajkháan ga̱jma̱a̱ mbaʼa numuu, tikhun nuthi ga̱jma̱a̱ mbá numuu májánʼ mú iʼwíínʼ na̱nguá. Tikhun nutajkháan ga̱jma̱a̱ xúgíʼ a̱jkiu̱ún ga̱jma̱a̱ eʼwíínʼ tséndxa̱ʼwa̱a̱ edxu̱ún rí muthi. Mú rí phú gajkhun, tséʼniuu má náa numuu etajkháan —manújngun mbá examen, munda̱ʼa̱ rí maʼngu̱u̱n equipo ndrígu̱ún, rí makuwá májánʼ mbá guʼwíin o asndu káʼnii má numuu— mbaʼin xa̱bu̱ nakumu̱ún rí ndayóoʼ mutajkháan. Asndu tikhun xa̱bu̱ bi̱ na̱nguá guáʼdáá religión nutajkháan.
Lá naratajkháan ikháanʼ ráʼ. Á mu xúʼko̱, ndiéjunʼ etanda̱ʼa̱ rá. Tséʼniuu á mu naguʼwanʼ maratajkháan o na̱nguá, mbáa natraximínáʼ: Lá nayambáá ráʼ. Lá xtáa mbáa bi̱ nadxaʼwuun rá. Mbáa xa̱bu̱ niʼthí rí maratajkháan “nindxu̱u̱ xóo mbá thana”. Tikhun médico ikhaa má endxa̱ʼwa̱a̱ edxu̱ún, nuthi rí maratajkháan nindxu̱u̱ xóo i̱ʼwáʼ “thana rí mambáyaʼ”. Ndiéjunʼ tatsaʼwáminaʼ ikháánʼ rá. Lá nutajkháan xa̱bu̱ numuu rí xúʼko̱ niguʼwún nuni o mu mambáñun xóo mbá thana xáʼ.
Náa Biblia naʼsngáa i̱mba̱ núthu. Naʼthí rí muʼtájkháan gíʼdoo itháan numuu ki xóo mbá thana. Ma̱ngaa naʼthí rí xtáa mbáa bi̱ naʼdxun índo̱ nuʼtájkháan ga̱jma̱a̱ mbá numuu májánʼ. Lá gajkhun rúʼko̱ ráʼ. Guʼyáá rí nasngájma.
a Nixtiʼkhu̱u̱ mbiʼñún.