3 Nambáyulúʼ mu maʼngulú muraʼníí xkujndu

Rí mbiʼi xúgi̱ rígá xkujndu rí xándoo muʼni gaʼduunʼ ga̱jma̱a̱ mingíjyúuʼ muʼnimbánii. Mbá xkri̱da, á mu ikháánʼ nitanimbáti̱ga̱a̱ mbáa bi̱ xtayáá o naʼniuu mbá nandii rí gakhi̱i̱, mbáa mataʼyáaʼ i̱ʼwáʼ xóo rí ma̱ndoo mambáyaʼ mu matraʼníí gaʼkhu rí xtaa ragíʼnaʼ. Lá ma̱ndoo mambáyulúʼ Biblia náa xkujndu rígi̱ ráʼ.

NANDII RÍ NDA̱A̱ THANUU

Rosa naʼthí: “Gúʼdoo mbá nandii rí naʼni mikhu wéñuʼ ga̱jma̱a̱ na̱ʼkhu̱ má xúʼko̱. Nánguá xtáá májánʼ xóo nákha ginii”. Mbá rí naxmiéjunʼ wéñuʼ nindxu̱u̱ rí naʼniuu mingíjyúuʼ makro̱ʼo̱o̱ rí naʼthí náa Biblia ga̱jma̱a̱ i̱ʼwáʼ rí nagájnuu náa Biblia. Mú nimbáyúu wéñuʼ ajngáa rí niʼthí Jesús náa Mateo 19:26: “Dios tsi mba xugui ri mago maʼne”. Rosa ni̱jkha̱nú ndiʼyoo dí rígá mbaʼa enii xóo ma̱ndoo maʼnigajmaa. Numuu rí nguáná niʼniuu mingíjyúuʼ maguxnuu numuu rí naʼkhui̱i̱, nigíʼdu̱u̱ niʼdxaun Biblia rí nigumaa grabar ga̱jma̱a̱ i̱yi̱i̱ʼ rí nagájnuu náa Biblia.a Ikhaa naʼthí: “Á mu nda̱a̱ rúʼko̱, xándoo gañeumínáʼ mu maxtáá májánʼ náa inuu Dios”.

Índo̱ Rosa xtáa gíná numuu rí nánguá eʼngo̱o̱ gáʼni xóo nákha ginii, naʼni̱i̱ a̱jkiu̱u̱n ajngáa rí na̱ʼkha̱ náa 2 Corintios 8:12: “Á mu nunila ga̱jma̱a̱ káxi̱ a̱jkia̱la, magruigú xó má rí kuaʼdáá, raʼkháa dí raguáʼdáá”. Rígi̱ naʼni marmáʼáan a̱jkiu̱u̱n rí Dios xtáa gagi ga̱jma̱a̱ rí naʼni, numuu rí naʼni xúgíʼ asndu xó má eʼngo̱o̱.

ÍNDO̱ NAKHÁÑUU MBÁA BI̱ NANDULÚʼ KUʼYÁÁ

Diana, bi̱ niʼthá ga̱jma̱a̱ numuu, narmáʼáan a̱jkiu̱u̱n: “Índo̱ nikháñuu wáxioʼ bi̱ gíʼdoo mbá 18 tsiguʼ, nigawúnʼ wéñuʼ rí asndu nindxa̱ʼwa̱mínáʼ rí ní xáʼngo̱ʼ gáxtáá ga̱jma̱a̱ rí nánguá maxtáá xóo nákha ginii”. Diana nixnúu wéñuʼ tsiakii rí naʼthí náa Salmo 94:19, náa rí salmista niʼni ajmúú náa Dios: “Índo̱ gamiéjunʼ niʼni maʼni néʼngo̱ʼ, ikháánʼ nitani̱i̱ a̱jkiu̱nʼ”. Ikhaa naʼthí xóó: “Nindo̱ʼo̱o̱ Jeobá rí mambáyuʼ maxkamaa mbá rí maʼni̱i̱ a̱jkiu̱nʼ”.

Diana niñajunʼ xúʼkhiín náa mbá ñajunʼ rí niʼni maxtáa tsímáá. Nda̱wa̱á ni̱jkha̱nú ndiʼyáminaʼ xóo crayola rí najmún e̱ji̱n mu muníʼ i̱yi̱i̱ʼ. Asndu rí nijmigaʼ najmaa mu miʼníʼ ga̱jma̱a̱. Xúʼko̱ má nindxu̱u̱ ma̱ngaa. Maski ajndu nikumu̱u̱ xóo crayolas rí nijmigaʼ, xóó ma̱ndoo mambáñun eʼwíínʼ xa̱bu̱. Ikhaa naʼthí: “Núkhu ndi̱yo̱o̱ rí índo̱ najmuʼ ikha ndrígóo Biblia ga̱jma̱a̱ rí naʼthí náa Biblia mu maxnu̱u̱n tsiakii bi̱ nasngúún, Jeobá ma̱ngaa xtáa raʼni̱i̱ a̱jkiu̱nʼ”. Niʼni mbá lista ndrígu̱ún xa̱bu̱ bi̱ naʼthí náa Biblia bi̱ niraʼníí mbaʼa gamiéjunʼ. Ndiéjunʼ ni̱jkha̱nú ndiʼyoo xá. “Xúgínʼ ikhiin nitajkháan má xúʼko̱”. Ma̱ngaa nijmañuu rí á mu “tsitambáʼtaa Biblia, xátaxkamaa xóo maxtiʼña̱a̱ graxe̱ ndrígáʼ”.

Mú Biblia niʼsngóo itháan Diana: Rí mandxaʼwáminaʼ xú káʼnii gáxtáa nda̱wa̱á ga̱jma̱a̱ raʼkháa rí ninújngoo. Naxnúu wéñuʼ tsiakii ajngáa rí na̱ʼkha̱ náa Hechos 24:15: “Maguaxu̱ún xa̱bu̱ bi̱ nikháñun bi̱ nini rí jmbu xúʼko̱ má bi̱ túni rí jmbu”. Lá naʼnimbo̱o̱ rí Jeobá makuxi̱i̱ wáxioo xáʼ. Guniʼñáʼ rí ikhaa mariʼña̱a̱: “Nda̱yo̱o̱ májánʼ rí mba̱yo̱o̱ mbu̱júu̱ʼ wáxioʼ. Anu̱ʼ bi̱ xtáa mekhuíí gíʼdoo má mbiʼi rí mbuyamijnáxu mbu̱júu̱. Nandoʼ ndayaminaʼ ga̱jmu̱ʼ náa ixi̱ ri̱ʼi̱ ndrígúxu̱ xó má niku̱mu̱ʼ índo̱ ndi̱yo̱o̱ nákha nigumaa”.

a Mbaʼa rí niguma grabar nigixi̱i̱ náa ináa ndrígóo Internet jw.org.

Biblia ma̱ndoo maʼni̱i̱ a̱jkiu̱lú índo̱ nanújngulú mbiʼi gakhi̱i̱

XÚ KÁʼNII GÁNDOO GAMBÁYULÚ DIOS RÁ.

Rí nariʼña̱a̱ náa Biblia na̱nguá mingíjyúuʼ: “Jeobá xtáa mijngii náa xúgínʼ xa̱bu̱ bi̱ nutakáñii, náa xúgínʼ xa̱bu̱ bi̱ nutháán rí gajkhun. Maʼnimbánuu rí nandún xa̱bu̱ bi̱ nuni ñajunʼ ikhaa, ga̱jma̱a̱ maʼdxaun índo̱ gutakáñii rí mambáñun, ma̱ngaa maʼni káwíin” (Salmo 145:18, 19). ¡Ra̱ʼkhá tháán májánʼ nindxu̱u̱ ajngáa rígi̱! Mú xú káʼnii eriʼña Dios índo̱ nuʼtákáñii mu mambáyulúʼ rá.

NAXNÚLÚ TSIAKII

Xkujndu maʼni makáguabáanʼ ga̱jma̱a̱ maʼgáanʼlu, rí nundxa̱ʼwáá edxu̱lúʼ ga̱jma̱a̱ náa Dios (Proverbios 24:10). Mú Jeobá “naxnúu tsiakii bi̱ nánguá eʼngo̱o̱ ga̱jma̱a̱ naʼni rí magiʼdoo wéñuʼ bi̱ nánguá gíʼdoo tsiakii” (Isaías 40:29). Apóstol Pablo bi̱ niʼngo̱o̱ niraʼnuu tsáʼkhá rí itháan gakhi̱i̱, niʼthí: “Náa xúgíʼ rí nandoʼ mani gúʼdoo tsiakii rí na̱ʼkha̱ náa Dios” (Filipenses 4:13). Dios nixnúu tsiakii ga̱jma̱a̱ xi̱ʼ kaʼwu ndrígóo ga̱jma̱a̱ xúʼko̱ má gáʼni ga̱jma̱á ni̱ndxa̱ʼ á mu natanda̱ʼa̱a̱ (Lucas 11:13).

NAXNÚLÚ KU̱MA̱

Ndiéjunʼ gándoo matani ikháánʼ á mu ndayóoʼ makruaʼaʼ ga̱jma̱a̱ mataʼgíʼ matanimbánii consejo rí naʼthí náa Biblia rá. Discípulo Santiago niʼnirámáʼ: “Á mu rí mbáa dí ikháanʼla ndayóoʼ majmañuu xóó itháan, gando̱ʼo̱o̱ má xúʼko̱ Dios, numuu rí ikhaa naxnún xúgínʼ rí ndayóoʼ ga̱jma̱a̱ xáʼthí kikháá rí nixnáʼ” (Santiago 1:5). Mu matani xó má ratájkháan, ikháánʼ gíʼmáán matraxnuu Biblia ga̱jma̱a̱ mataʼgíʼ matani rí naʼsngáa (Santiago 1:23-25). Á mu natani matasnga̱jmá rí májánʼ nindxu̱u̱ consejos ndrígóo.

NAXNÚLÚ RÍ TSÍMÁÁ

Á mu ikháánʼ naxmiéjuanʼ wéñuʼ, Jeobá ma̱ndoo mambáyaʼ mu maraxtaa tsímáá. Ajngá rawunʼ naʼthí: “Xaxmiéjuanʼla ga̱jma̱a̱ numuu nimbá, gutajkáan ga̱jma̱a̱ gutakáñii Dios ma̱ngaa guxna̱a̱ núma̱aʼ, gunda̱ʼa̱a̱ xúgíʼ rí eyála; ikhú tsímáá rí na̱ʼkha̱ náa Dios rí itháan gíʼdoo tsiakii, mañewu̱u̱n a̱jkia̱la ga̱jma̱a̱ rí nundxa̱ʼwa̱míjna̱ ga̱jma̱a̱ numuu Cristo Jesús” (Filipenses 4:6, 7). Náa numuu rí tsitanda̱ʼa̱a̱ Jeobá rí maʼni maraxtaa tsímáá.

Mú, á mu xkujndu ndrígáʼ tsimbánuu nacha̱ rá. Xatatsaʼwamínáʼ rí Dios nigumuu kaʼyaʼ. Maski ajndu ndajyúuʼ xkujndu, Jeobá ma̱ndoo maxnáʼ tsiakii mu maʼngaaʼ (1 Corintios 10:13). Ma̱ngaa, náa Biblia naʼthí rí maʼga̱nú mbiʼi rí mandáti̱ga̱a̱ kámuu xkujndu rí kuaʼdáá.