“Náa xtáa Dios rá.”

IKHÁÁNʼ RÁ. LÁ NITRAXIMÍNÁʼ XÚʼKO̱ ÍNDO̱ NITAYÁÁ MBÁ GAMIÉJUNʼ RÁʼ. LÁ NITRAʼNÍÍ MBÁ RÍ NIʼNI GAWÁANʼ WÉÑUʼ RÍ NIʼNI MATATSAʼWA̱A̱ EDXA̱ʼ RÍ DIOS TSIXMIÉJUNʼ KAʼYAʼ RÁʼ.

Sheila, bi̱ xtáa Estados Unidos nigaja̱a̱ náa mbá guʼwá náa xúgínʼ nunimbu̱ún kuyáá Dios, ikhaa naʼthí: “Asndu nákha chíʼgiúnʼ ninimbooʼ ka̱yo̱o̱ Dios numuu rí nda̱yo̱o̱ rí ikhaa Niʼniáanʼ, mú na̱nguá ku̱mu̱ʼ rí xtáá mijngii náa ikhaa. Maski ajndu nda̱yo̱o̱ rí ndaʼyoʼ, niku̱mu̱ʼ rí tséʼyoo rí eni. Na̱nguá ku̱mu̱ʼ rí ikhaa naguiyuʼ kaʼyoʼ, mú tséku̱mu̱ʼ rí ikhaa naxmiéjunʼ kaʼyoʼ”. Náa numuu rí ikhaa nikumu̱u̱ xúʼko̱ xá. Ikhaa naʼthí: “Bi̱ kuwa náa goʼwóoʼ nimíniiʼ wéñuʼ ga̱jma̱a̱ nikumuʼ rí Dios támbáyuxu nditháan”.

Xó má Sheila, mbáa ikháánʼ natanimbaaʼ xtayáá Dios bi̱ gíʼdoo xúgíʼ tsiakii ga̱jma̱a̱ maski ajndu xúʼko̱, mbáa ikháánʼ natraximínáʼ á mu ikhaa naxmiéjunʼ kaʼyaʼ. Ma̱ngaa Job niʼni graxe̱ rúʼko̱, mbáa xa̱bu̱ jmbii bi̱ nikumu̱u̱ kaʼyoo tsiakii ga̱jma̱a̱ ku̱ma̱ ndrígóo bi̱ Niʼniáanʼ (Job 2:3; 9:4). Nda̱wa̱á rí nigíʼnuu xúgíʼ gamiéjunʼ ga̱jma̱a̱ nindáti̱go̱o̱ xúgíʼ, niraxu̱u̱ Dios: “Náa numuu rí natarkaʼwu inaʼ ga̱jma̱a̱ natayoʼ xóo mbáa bi̱ sia̱nʼ ga̱jma̱ʼ rá.” (Job 13:24.)

Mú ndiéjunʼ eʼthí náa Biblia rá. Lá Dios aʼkhúun ga̱jma̱a̱ numuu rí narígá tsingíná ráʼ. Lá naxmiéjunʼ kaʼñún xúgínʼ xa̱bu̱ numbaaʼ ga̱jma̱a̱ mámbáa rí ikháanʼ ráʼ. Lá rígá náa ma̱ndoo mbuʼyáá á mu naniniáanʼ mámbáa rí ikháanʼ, nakro̱ʼo̱o̱ kaʼyulú ga̱jma̱a̱ nambáyulúʼ índo̱ kuaʼdáá xkujndu ráʼ.

Náa artículos rí na̱ʼkha̱, mbuʼyáá xóo rí nigumiin xa̱bu̱ numbaaʼ ga̱jma̱a̱ Biblia nasngájma rí Dios naxmiéjunʼ kaʼyulú (Romanos 1:20). Xúʼko̱ ikháánʼ matatsiʼniiʼ itháan májánʼ bi̱ Niʼniáanʼ, ga̱jma̱a̱ índo̱ gídxúʼ ratatsiniiʼ itháan, itháan gáta̱ya̱a̱ rí “naxmiéjunʼ” kaʼyaʼ (1 Juan 2:3; 1 Pedro 5:7).