Ndiéjunʼ regalo rí gáʼndoo gúxnáá Jeobá rá.

MBÓO miʼtsú, Jesús niʼthí: “Kuwáanʼ itháan gagi á mu nuxná ki xóo rí mundrígú” (Hech. 20:35). Ajngáa rígi̱ nambánii ga̱jma̱a̱ rí xóo nambáxulúʼ gajmiúlú Jeobá. Náa numuu eʼthá rígi̱ rá. Ikhaa naxnúlú mbaʼa rí naʼni makuwáanʼ tsímáá, mú makuwáanʼ itháan gagi á mu ikháanʼ nuxnáá mbá regalo. Ndiéjunʼ gándoo gúxnáá xá. Proverbios 3:9 naʼthí: “Atiamajkuíí Jeobá ga̱jma̱a̱ rí xtaʼdáá rí gíʼdoo wéñuʼ numuu”. Rí “gíʼdoo wéñuʼ numuu” nindxu̱u̱ mbiʼi ndrígúlú, rí najmañulúʼ nuʼni, tsiakii ndrígúlú ga̱jma̱a̱ rí kuaʼdáá. Índo̱ najmulú rí kuaʼdáá mu mbuʼyamajkuíí Jeobá, nuxnáá mbá regalo Jeobá, ga̱jma̱a̱ rígi̱ naʼni makuwáanʼ itháan gagi.

Ndiéjunʼ gambáyulú mu xámbumulú muxnáá Jeobá rí kuaʼdáá rá. Apóstol Pablo niʼthún corintios rí muyexi̱i̱ mbújkha̱a̱ mu marigá rí muxna (1 Cor. 16:2). Á mu ikháánʼ nandaʼ ma̱ta̱ya̱a̱ itháan xóo gándoo gáraxna mbújkha̱a̱ náa xtaa, atayáá kúgumaʼá rí na̱ʼkha̱ agoo.

Rígá a̱jma̱ países náa rí tsíyoo muxna mbújkha̱a̱ náa Internet. Mú náa ináa donate.jw.org naʼthí xóo ma̱ndoo muʼni. Náa i̱ʼwáʼ países, náa ináa rígi̱ na̱ʼkha̱ mbá documento náa nariʼña̱a̱ rí nuni ga̱jma̱a̱ numuu rí xóo muxná mbújkha̱a̱.